ମହିଳାଙ୍କୁ ଗଣଦୁଷ୍କର୍ମ: ୧୧ ଦୁଷ୍କର୍ମକାରୀ ଗିରଫ

ଭୁବନେଶ୍ୱର, (ବାଘୁଆବାର୍ତ୍ତା): ଝାଡଖଣ୍ଡ ପାକୁଡ ଅଞ୍ଚଳରୁ ଏକ ଲଜ୍ଜାକର ଘଟଣା ସାମନାକୁ ଆସିଛି । ଜଣେ ୩୫ ବର୍ଷିୟା ମହିଳାଙ୍କୁ ୧୧ ଜଣ ବ୍ୟକ୍ତି ଗଣଦୁଷ୍କର୍ମ କରିଛନ୍ତି । ଗଣଦୁଷ୍କର୍ମ ପରେ ମହିଳା ଜଣଙ୍କ ଦୁଇ ଦିନ ପର୍ଯ୍ୟନ୍ତ ଅଚେତ ଅବସ୍ଥାରେ ପଡ଼ି ରହିଥିଲେ । ଚେତା ଫେରିବା ପରେ ମହିଳା ଜଣଙ୍କ ନିଜର ସମ୍ପର୍କୀୟଙ୍କ ସହ ମୁଫସିଲ ଥାନାରେ ଅଭିଯୋଗ କରିଥିଲେ । ଥାନାରେ ମାମଲା ରୁଜୁ ହେଲା ପରେ ପୁଲିସ ତଦନ୍ତ କରି ୧୧ ଜଣ ଦୁଷ୍କର୍ମ କାରୀଙ୍କୁ ଗିରଫ କରିଛି । ୧୧ ଜଣଙ୍କର କୋଭିଡ୍ ଟେଷ୍ଟ ପରେ ସେଥି ମଧ୍ୟରୁ ୮ ଜଣଙ୍କର କୋଭିଡ ପଜିଟିଭ୍ ଚିହ୍ନଟ ହୋଇଥିବା ନେଇ ଏସପି ମଣିଲାଲ ମଣ୍ଡଳ ସୂଚନା ଦେଇଛନ୍ତି । ସୂଚନାନୁସାରେ, ଝାଡ଼ଖଣ୍ଡର ପାକୁଡ଼ର ଅଞ୍ଚଳରେ ଜଣେ ୩୫ ବର୍ଷୀୟା ମହିଳା ଜଣଙ୍କ ସନ୍ଧ୍ୟାରେ ଶୌଚ କରିବାକୁ ଯାଉଥିଲେ । ଏହି ସମୟରେ ରାସ୍ତାରେ କିଛି ଯୁବକ ମଦ୍ୟପାନ କରୁଥିଲେ । ମହିଳାଙ୍କୁ ଏକୁଟିଆ ଦେଖି ଅଭିଯୁକ୍ତ ମାରଣାସ୍ତ୍ର ଦେଖାଇ ତାଙ୍କୁ ଡରାଇ ନେଇ ଯାଇଥିଲେ । କିଛି ଦୂରରେ ଥିବା ଏକ ବୁଦା ମୂଳକୁ ନେଇ ଅଭିଯୁକ୍ତମାନେ ମହିଳାଙ୍କ ସହ ଜଣେ ପରେ ଜଣେ ଦୁଷ୍କର୍ମ କରିଥିଲେ । ଏହାପରେ ଅଭିଯୁକ୍ତମାନେ ନିଜର ଆଉ କିଛି ସାଙ୍ଗମାନଙ୍କୁ ଡାକି ପୂରା ରାତି ମହିଳାଙ୍କୁ ଦୁଷ୍କର୍ମ କରିଥିଲେ । ସକାଳେ ମହିଳାଙ୍କୁ ଅଚେତ ଅବସ୍ଥାରେ ଛାଡ଼ି ଅଭିଯୁକ୍ତମାନେ ପଳାଇଥିଲେ । ମହିଳା ଜଣଙ୍କ କୌଣସି ପ୍ରକାରେ ଉଠି ଘରକୁ ଆସିଥିଲେ ଏବଂ ୨ ଦିନ ପର୍ଯ୍ୟନ୍ତ ସେମିତି ଅଚେତ ଅବସ୍ଥାରେ ରହିଥିଲେ । ଘଟଣା ପରେ ସମ୍ପର୍କୀୟମାନେ ମହିଳାଙ୍କ ଚିକିତ୍ସା କରାଇଥିଲେ । କିଛି ମାତ୍ରାରେ ସୁସ୍ଥ ହେବା ପରେ ମୁଫସିଲ ଥାନାକୁ ଯାଇ ଘଟଣା ବିଷୟରେ ପୁଲିସ୍କୁ କହିଥିଲେ ପୁଲିସ ମହିଳାଙ୍କ ବୟାନକୁ ନେଇ ମାମଲା ରୁଜୁ କରିଛନ୍ତି ।