ଭୁବନେଶ୍ୱର (ବାଘୁଆବାର୍ତ୍ତା): ମାଛ ବେପାର ଆଳରେ ବ୍ରାଉନସୁଗାର କାରବାର କରୁଥିବା ଏକ ରାକେଟର ପର୍ଦ୍ଦାଫାସ କରିଛି କମିସନରେଟ ପୁଲିସ । ଏହି ଘଟଣାରେ ପୁଲିସ ୨ ଜଣଙ୍କୁ ଗିରଫ କରିବା ସହ ସେମାନଙ୍କ ନିକଟରୁ ଏକ ବୋଲେରୋ, ୫୮୨ ଗ୍ରାମ ର ବ୍ରାଉନସୁଗାର, ୧୯୦୦ ଟଙ୍କା, ଦୁଇଟି ମୋବାଇଲ ଫୋନ ଜବତ କରିଛି । ଜବତ ବ୍ରାଉନସୁଗାରର ମୂଲ୍ୟ ୫୦ ଲକ୍ଷ ଟଙ୍କାରୁ ଅଧିକ ହେବ ବୋଲି ଜଣାପଡିଛି । ଗିରଫ ଅଭିଯୁକ୍ତ ଦ୍ୱୟ ହେଲେ, ବାଲେଶ୍ୱର ଜଳେଶ୍ୱର ଅଞ୍ଚଳର ଗାଡ଼ି ଚାଳକ ମଦନ କୁମାର ବେହେରା ଓ ବେପାରୀ ଶେଖ ମଙ୍ଗଲୁ । ପୁଲିସ କମିସନର ସୌମେନ୍ଦ୍ର ପ୍ରିୟଦର୍ଶୀ ସୂଚନା ଦେଇ କହିଛନ୍ତି, ମଦନ ଓ ମଙ୍ଗଲୁ ନିୟମିତ ଜଳେଶ୍ୱରରୁ ମାଛ ଆଣି ଭୁବନେଶ୍ୱରରେ ବିକ୍ରି କରନ୍ତି । ସପ୍ତାହକୁ ପ୍ରାୟ ତିନିଥର ମାଛ ଆଣନ୍ତି । ବ୍ରାଉନସୁଗାର ହବ ଜଳେଶ୍ୱରରୁ ଆସିଲା ବେଳେ ସାଙ୍ଗରେ ଧଳା ଜହର ମଧ୍ୟ ଆଣନ୍ତି । ମାଛ ବିକ୍ରି ଆଳରେ ସେମାନେ ଭୁବନେଶ୍ୱରରେ ନିଶା ବେପାରୀଙ୍କୁ ବ୍ରାଉନସୁଗାର ବିକ୍ରି କରୁଥିଲେ । ସକାଳେ ଖବର ପାଇ କୁଇକ ଆକ୍ସନ ଟିମ (କ୍ୟୁଏଟି) ଓ ମଞ୍ଚେଶ୍ୱର ଥାନାର ମିଳିତ ଟିମ ଚଢ଼ଉ କରି ଏହି ଦୁଇଜଣଙ୍କୁ ଗିରଫ କରିବା ସହ ସେମାନଙ୍କଠାରୁ ବ୍ରାଉନସୁଗାର ଜବତ କରିଛି । ମଞ୍ଚେଶ୍ୱର ଥାନା ପୁଲିସ ଏ ସଂକ୍ରାନ୍ତରେ ଏକ ମାମଲା ରୁଜୁ କରିଛି । ଗିରଫ ଦୁଇଜଣଙ୍କୁ କୋର୍ଟ ଚାଲାଣ କରାଯାଇଛି । ବ୍ରାଉନସୁଗାର କାରବାର କରୁଥିବା ଖବର କ୍ୟୁଏଟି ପାଖରେ ପହଞ୍ଚିଥିଲା । ଗତ କିଛି ଦିନ ଧରି କ୍ୟୁଏଟି ଏମାନଙ୍କ ଉପରେ ନଜର ରଖିଥିଲା । ଗ୍ରାହକ ସାଜି ଯୋଗାଯୋଗ ଆରମ୍ଭ କରିଥିଲା । ଏହା ପରେ ଆରମ୍ଭ ହୋଇଥିଲା ଡିଲ । ଆଜି ସକାଳେ ହାଇଟେକ ଛକ ନିକଟରେ ବ୍ରାଉନସୁଗାର ବିକ୍ରି ପାଇଁ ବୋଲେରୋ ଧରି ପହଞ୍ଚିଥିଲେ ମଙ୍ଗୁଲ ଓ ମଦନ । ସେହି ସମୟରେ କ୍ୟୁଏଟି ଓ ମଞ୍ଚେଶ୍ୱର ପୁଲିସର ମିଳିତ ଟିମ ଉଭୟଙ୍କୁ ଧରିଥିଲା ।
