ପାଟଣା (ବାଘୁଆବାର୍ତ୍ତା): ଚାରିଆଡେ କରୋନା ଜନିତ ଲକଡାଉନ, ହେଲେ ଥମୁନି ଦେଶୀ ବିଦେଶୀ ମଦ କାରବାର । କେନ୍ଦୁଝର ଜିଲ୍ଲା ପାଟଣା ବ୍ଲକ ବିଭିନ୍ନ ଅଞ୍ଚଳରେ ଦିନକୁ ଦିନ ବଢ଼ିବାରେ ଲାଗିଛି ଚୋରା ମଦ କାରବାର । ଏହି ପରିପେକ୍ଷୀରେ ତୁରୁମୁଙ୍ଗା ପୋଲିସ ବିଭିନ୍ନ ସ୍ଥାନରେ ଚଢ଼ାଉ କରି ବିପୁଳ ପରିମାଣର ବିଦେଶୀ ମଦ ଜବତ କରିଛି । ସାଧାରଣ ଲୋକଙ୍କ ପାଇଁ ରୋଜଗାର କମିବାର ଡର ଥିବା ବେଳେ ଚୋରା ମଦ ବେପାରୀଙ୍କ ପାଇଁ ଆସିଛି ରୋଜଗାର ବାଟ । ଲକଡାଉନର ସୁଯୋଗ ନେଇ ଚୋରାରେ ଦେଶୀ ବିଦେଶୀ ମଦ ବିକ୍ରି ଆରମ୍ଭ କରିଛନ୍ତି କିଛି ବେପାରୀ । ଲକଡାଉନ କାରଣରୁ ସବୁ ଦୋକାନ ବଜାର ବନ୍ଦ ରହିଛି । ଏଥିରୁ ମଦ କାଉଣ୍ଟର ମଧ୍ୟ ବାଦ ପଡିନାହିଁ । ଯାହାର ଫାଇଦା ଉଠାଇବା ପାଇଁ କିଛି ଅସାଧୁ ବେପାରୀ ଚୋରା ଚାଲାଣ କରି ଚଢ଼ା ଦରରେ ମଦ ବିକ୍ରି ହେଉଥିବା ଅଭିଯୋଗ ହୋଇଛି । ଏହାପରେ ତୁରୁମୁଙ୍ଗା ପୋଲିସ ଏକ ଢାବାରେ ଚଢ଼ାଉ କରି ବିଭିନ୍ନ କମ୍ପାନୀର ମଦ ବୋତଲ ଜବତ କରିଛି । ସେହିପରି ଜଗନ୍ନାଥ ନାମକ ଏକ ଢ଼ାବାରୁ ୫ଟି ବିଅର ବୋତଲ ଓ ହତିବାରୀ ନିକଟରେ ଥିବା ମା କାଳୀ ଢ଼ାବାରେ ଚଢ଼ାଉ କରି ପାଣି ଫିଲଟର ଭିତରେ ରଖିଥିବା ୩ ଲିଟର ଦେଶୀ ମହୁଲି ମଦ ଜବତ କରାଯାଇଛି । ବେଆଇନ ମଦ ଚୋରା କାରବାର ଓ ଚଢ଼ାଦର ରେ ମଦ ବିକ୍ରି ଅଭିଯୋଗରେ ତିନି ଢ଼ାବା ନାମରେ ମାମଲା ରୁଜୁ ହୋଇଥିବା ଥାନା ଅଧିକାରୀ ସୂଚନା ଦେଇଛନ୍ତି ।
