ଗଞ୍ଜାମ, (ବାଘୁଆବାର୍ତ୍ତା): ଗଞ୍ଜାମ ଜିଲ୍ଲାର ଗଣପର୍ବ ଭାବେ କଥିତ କୁମାର ପୂର୍ଣ୍ଣିମା । ସେଥିପାଇଁ ଜୁଆ ଖେଳ ଜୋର୍ ଧରିଛି । ସେହି ଅନୁସାରେ ପୁଲିସ ମଧ୍ୟ ଚଢ଼ଉ ଜୋରଦାର କରିଛି । ଗଞ୍ଜାମ ଥାନା ଅନ୍ତର୍ଗତ ପାଳିବନ୍ଧ ପଞ୍ଚାୟତ ପୁରୁଣାବନ୍ଧ ଗ୍ରାମରେ ଦୁଇଟି ଜୁଆ ଆଡ୍ଡା ଉପରେ ଚଢ଼ଉ କରି ୧୪ ଜଣଙ୍କୁ ଗିରଫ କରିଛି ପୁଲିସ । ସେଠାରୁ ୩୦ ହଜାର ୫୫୦ ଟଙ୍କା ଜବତ କରିବା ସହ ୮ ଜଣଙ୍କୁ ଗିରଫ କରାଯାଇଥିବା ବେଳେ ଅନ୍ୟ ଜୁଆ ଆଡ୍ଡାରୁ ୨୦ ହଜାର ୩୦ ଟଙ୍କା ଜବତ କରାଯାଇ ୬ ଜଣଙ୍କୁ ଗିରଫ କରିଛି ପୁଲିସ । ସେହିପରି ପୁରୁଷୋତ୍ତମପୁର ଥାନା ପୁଲିସ ବିଭିନ୍ନ ଜୁଆ ଆଡ୍ଡାରେ ଚଢ଼ଉ କରି ୧୨ ଜଣଙ୍କୁ ଗିରଫ କରିବା ସହ ସେମାନଙ୍କ ଠାରୁ ନଗଦ ୩୪ ହଜାର ଟଙ୍କା ଜବତ କରାଯାଇଛି । ଅପରପକ୍ଷରେ ଆସିକା ଥାନା ପୁଲିସ ସୋମବାର ସନ୍ଧ୍ୟାରେ ବାଲିସିରା, ନୂଆଗାଁ, କମାଗଡ ଆଦି ସ୍ଥାନରେ ଜୁଆ ଖେଳ ଉପରେ ଚଢ଼ଉ କରିଥିଲା । ସମସ୍ତ ସ୍ଥାନରୁ ମିଳିତ ଭାବେ ୪୨୪୫୦ ଟଙ୍କା, ୭ ବାଇକ୍ ଓ ୧୦ ମୋବାଇଲ୍ ଜବତ କରାଯାଇଛି । ୩ଟି ସ୍ଥାନରୁ ମୋଟ ୨୧ ଜଣ ଗିରଫ ହୋଇଛନ୍ତି । ସେହିପରି ବେଲଗୁଣ୍ଠା ଥାନା ପୁଲିସ ସୋମବାର ୩ଟି ଜୁଆ ଆଡ୍ଡାରେ ଚଢ଼ଉ କରି ୧୬ ଜଣଙ୍କୁ ଗିରଫ କରିଛି । ଏମାନଙ୍କ ଠାରୁ ୬ଟି ବାଇକ୍ ଓ ୭ଟି ମୋବାଇଲ୍ ସହ ମୋଟ ୩୭,୬୫୦ ଟଙ୍କା ଜବତ କରାଯାଇଛି । ହୁମ୍ମା ଫାଣ୍ଡି ପୁଲିସ ବିଭିନ୍ନ ଜୁଆ ଆଡ୍ଡା ଉପରେ ଚଢ଼ଉ କରି ୨୧ ହଜାରରୁ ଊଦ୍ଧ୍ୱର୍ ଟଙ୍କା ଜବତ କରିବା ସହ ୬ ଜଣଙ୍କୁ ଗିରଫ କରିଛି ।
କୁମାର ପୂର୍ଣ୍ଣିମା ପୂର୍ବରୁ ଚାଲିଥିଲା ଜୁଆ ଖେଳ, ବିଭିନ୍ନ ଜୁଆ ଆଡ୍ଡାରେ ଚଢ଼ଉ ବେଳେ ଧରିପଡିଲେ ୬୯ ଜଣ
