ପୁରୀ, (ବାଘୁଆବାର୍ତ୍ତା): ବିବାହ ପୂର୍ବରୁ ବରକୁ ହୋଇଛି ଚୋଟ । ବରକୁ ହାଣିଛନ୍ତି ଆଗକୁ ହେବାକୁ ଥିବା ଶାଳା ଓ ଶଳା ଭାଉଜ । ଏନେଇ ବଳିଆପଣ୍ଡା ଥାନା ପୁଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଛି । ମାମଲାରେ ଅନ୍ୟଜଣେ ମଧ୍ୟ ସାମିଲ୍ ଥିବା ପୁଲିସ କହିଛି । ଆକ୍ରମଣରେ ଆହତ ଜଣକ ହେଲେ ଏହି ଥାନା ଅଧୀନ ଶାନ୍ତି ଗେଷ୍ଟ ହାଉସ୍ ନିକଟର ଜଗନ୍ନାଥ ପଣ୍ଡା । ମୁଖ୍ୟ ଆକ୍ରମଣକାରୀ ହେଲା ସେହି ଅଞ୍ଚଳର କାଳିଆ ବିଶ୍ୱାଳ । ପୁଲିସ ସୂତ୍ରରୁ ଖବର ମଳିଛି ଯେ, ଜଗନ୍ନାଥଙ୍କ ସହ କାଳିଆର(ଶଳା) ଭଉଣୀଙ୍କ ବିବାହ ସ୍ଥିର ହୋଇଛି । କାଳିଆ ନିଶା ସେବନ କରୁଥିବାରୁ ତା’ ମାଆ ଘର ସଉଦା କିଣିବା ପାଇଁ ଆଗକୁ ହେବାକୁ ଥିବା ଜ୍ୱାଇଁ ଜଗନ୍ନାଥଙ୍କୁ ଟଙ୍କା ଦେଇଥିଲେ ବୋଲି ପୁଲିସ କହିଛି । ଜଗନ୍ନାଥ ଏହି ଟଙ୍କାରେ ସଉଦା କିଣି କାଳିଆର ମା’ଙ୍କୁ ଦେଇଥିଲେ । ହେଲେ ଏସବୁ କାଳିଆ ସହି ପାରିନଥିଲା । ବିବାହ ପୂର୍ବରୁ ଏତେ, ବିବାହ ପରେ କେତେ ହେବ ବୋଲି କହି ଗତ ୧୪ ତାରିଖରେ ସ୍ଥାନୀୟ ହନୁମାନ ମନ୍ଦିର ନିକଟରେ ବସିଥିବା ଜଗନ୍ନାଥଙ୍କୁ ହାଣିଥିଲା । ହେଲେ ଏନେଇ ଜଗନ୍ନାଥ ଏତଲା ଦେଇନଥିବା ପୁଲିସ କହିଛି । ଚିକିତ୍ସା ପରେ ଘରକୁ ଫେରିଥିବାବେଳେ ୧୫ ତାରିଖରେ କାଳିଆ ତା’ ପତ୍ନୀ ଓ ସାଙ୍ଗଙ୍କୁ ନେଇ ଜଗନ୍ନାଥଙ୍କୁ ପୁଣି ଆକ୍ରମଣ କରିଥିବା ଅଭିଯୋଗ ହୋଇଛି । ଏନେଇ ଏତଲା ଦେବା ପରେ ପୁଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଛି । କାଳିଆ, ତା’ ପତ୍ନୀ ଓ ସାଙ୍ଗ ବିରୋଧରେ ଏହି ମାମଲା ରୁଜୁ ହୋଇଥିବା ପୁଲିସ କହିଛି ।
