ଏଟିଏମରୁ ଜଣେ ଗ୍ରାହକଙ୍କଠାରୁ କାର୍ଡ ନେଇ ଠକେଇ ଉଦ୍ୟମ, ଜଣକୁ କାବୁକଲେ ଲୋକେ

ବଲାଙ୍ଗିର, (ବାଘୁଆବାର୍ତ୍ତା): ବଲାଙ୍ଗିର ସହରରେ ମାତିଲେଣି ଲୁଟେରା । ଆଜି ଦୈନିକ ବଜାର ଭିତରେ ଥିବା ଏଟିଏମରୁ ଜଣେ ଗ୍ରାହକଙ୍କଠାରୁ କାର୍ଡ ନେଇ ଠକେଇ ଉଦ୍ୟମ ହୋଇଛି । ଗାହକ ଜଣକ ଜାଣିପାରି ପାଟି କରିବାରୁ ଲୋକେ ଜଣକୁ କାବୁ କରି ପୁଲିସକୁ ଦେଇଥିବାବେଳେ ଅନ୍ୟ ଦୁଇଜଣ ଫେରାର ହୋଇଯାଇଥିବା ଜଣାପଡିଛି । ସୂଚନା ଅନୁସାରେ, ଜଣେ ଯୁବକ ଏଟିଏମରୁ ଟଙ୍କା ଉଠାଇବାକୁ ଆସିଥିଲେ । ଏଟିଏମରେ ଲୁଟେରା ଜଣକ ଆସି ଯୁବକଙ୍କୁ ସାହାଯ୍ୟ କରିବାକୁ କାର୍ଡ ମାଗି ନେଇଥିଲେ । ହେଲେ ତାଙ୍କ ପଛରେ ରଖିଥିବା ଏକ ସ୍ବାଇବ ମେସିନରେ ସ୍ବାଇବ କରିଥିଲେ । ଫଳରେ ଟଙ୍କା ଟ୍ରାନ୍ସଫର କରିନେଇଥାନ୍ତେ । ହେଲେ ଯୁବକ ଜଣକ ତାହା ଦେଖିଦେବାରୁ ପାଟି କରିଥିଲେ । ସ୍ଥାନୀୟ ଲୋକେ ଲୁଟେରାକୁ କାବୁ କରିନେଇଥେଲେ । ବାଇକରେ ଥିବା ଅନ୍ୟ ଦୁଇଜଣ ଚମ୍ପଟ ମାରିଥିଲେ । ପରେ ପୁଲିସ ପହଞ୍ଚି ଜଣେ ଲୁଟେରାକୁ ଥାନାକୁ ନେଇଛି । ବ୍ୟାଙ୍କ କତ୍ତୃପକ୍ଷ ଏଟିଏମରେ ସୁରକ୍ଷା ବ୍ୟବସ୍ଥା କରୁନଥିବାବେଳେ, ଟାଉନଥାନାର ନିଷ୍କ୍ରିୟତାକୁ ଲୋକେ ଦାୟି କରିଛନ୍ତି ।