ଢେଙ୍କାନାଳ, (ବାଘୁଆବାର୍ତ୍ତା): ଢେଙ୍କାନାଳ ସହରରେ ଚାଲିଛି ବ୍ରାଉନ ସୁଗାର ବେପାର । ଟାଉନ ପୋଲିସ ବାରମ୍ବାର ଚଢ଼ାଉ କରି ବର୍ତ୍ତମାନ ସୁଦ୍ଧା ୧୬୬ ଗ୍ରାମ ଓ ଅନେକ ଯୁବକଙ୍କୁ ଗିରଫ କରିସାରିଛି । ଏପରି ସ୍ଥିତିକୁ ଦେଖି ଅବକାରୀ ବିଭାଗ ତତ୍ପର ହୋଇପଡିଛି । ଫଳରେ ଅବକାରୀ ବିଭାଗ ପକ୍ଷରୁ ସ୍ବତନ୍ତ୍ର ସ୍କ୍ବାଡ୍ ଗଠନ କରି ଚଢ଼ାଉ ଆରମ୍ଭ ହୋଇଛି । ତେବେ ବିଶେଷ ସୂତ୍ରରୁ ସୂଚନା ପାଇ ଧଳା ଜହର କାରବାରର ପେଣ୍ଠସ୍ଥଳୀ ସାଜିଥିବା ଢେଙ୍କାନାଳ ସହରର ବାଜିଚୌକ ଅଂଚଳରେ ଗତ ରାତିରେ ଚଢ଼ାଉ କରିଥିଲା ଅବକାରୀ ବିଭାଗର ସ୍ବତନ୍ତ୍ର ସ୍କ୍ବାଡ୍ । ଏହି ଚଢ଼ାଉ ବେଳେ ୪୦ଗ୍ରାମ ବ୍ରାଉନସୁଗାର ଜବତ କରିବାରେ ସକ୍ଷମ ହୋଇଛି ଅବକାରୀ ସ୍କ୍ବାଡ୍ । ଏହି ଧଳା ଜହର କାରବାର କରୁଥିବା ଦୁଇ ଜଣ ଯୁବକଙ୍କୁ ଗିରଫ କରାଯାଇଛି। ଗିରଫ ଦୁଇ ଜଣ ହେଲେ ଢେଙ୍କାନାଳ ସହରର କାଂଚନ ବଜାରର କୁନା ବେହେରା ଓ ବାଜିଚୌକ ଅଂଚକର ରାହୁଲ ରାଉତ । ଉଭୟେ ବିକ୍ରି କରିବାକୁ ଯାଉଥିବାବେଳେ ପ୍ରତ୍ୟେକଙ୍କଠାରୁ ୨୦ଗ୍ରାମ ଲେଖାଏଁ ବ୍ରାଉନ ସୁଗାର ଜବତ କରିଛି ଅବକାରୀ ବିଭାଗର ଏହି ସ୍ବତନ୍ତ୍ର ସ୍କ୍ବାଡ୍ ।
