ଗୋପାଳଗଞ୍ଜ (ବାଘୁଆବାର୍ତ୍ତା): କରୋନା ସଙ୍କଟ ଏବଂ ଲକଡାଉନ ପରେ ବି ବିହାରରେ ଅପରାଧିକ ଘଟଣା କମୁନି । ଗୋପାଳଗଞ୍ଜରେ ଏକ ବିବାହ ସମାରୋହରେ କୌଣସି ବିବାଦକୁ ନେଇ ଗୁଳିକାଣ୍ଡ ହେବା ଯୋଗୁଁ ଜଣଙ୍କର ମୃତ୍ୟୁ ହୋଇଥିବା ବେଳେ ୩ ଜଣ ଗୁରୁତର ଅବସ୍ଥାରେ ଚିକିତ୍ସିତ ହେଉଛନ୍ତି । ଗୁଳିକାଣ୍ଡରେ ବାପାଙ୍କର ମୃତ୍ୟୁ ହୋଇଥିବା ବେଳେ ୩ ପୁଅ ଏବେ ବି ଜୀବନ ଓ ମୃତ୍ୟୁ ସହ ସଂଗ୍ରାମ କରୁଛନ୍ତି । ଗୁରୁତର ଅବସ୍ଥାରେ ୩ ପୁଅଙ୍କୁ ତୁରନ୍ତ ସଦର ହସ୍ପିଟାଲରେ ଭର୍ତ୍ତି କରାଯାଇଥିଲା । ଚିକିତ୍ସା ପାଇଁ ନିଆଯାଉଥିବା ବେଳେ ଅଧାବାଟରେ ତାଙ୍କ ବାପାଙ୍କର ମୃତ୍ୟୁ ହୋଇଯାଇଥିଲା । ଏହି ଗୁଳିକାଣ୍ଡ ପରେ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖାଦେଇଛି । କିଛି ସମୟ ପୂର୍ବରୁ ଯେଉଁଠାରେ ବାହାଘରକୁ ନେଇ ଖୁବ ଖୁସିରେ ପରିବେଶ ଥିଲା ହଠାତ ସେଠାରେ ଏକ ଅଦ୍ଭୁତ ନୀରବତା ରହିଲା । ଘଟଣାର ସୂଚନା ପାଇବା ମାତ୍ରେ ବହୁ ସଂଖ୍ୟକ ପୋଲିସ ଫୋର୍ସ ଘଟଣାସ୍ଥଳରେ ପହଞ୍ଚି ମାମଲାର ତଦନ୍ତ ଆରମ୍ଭ କରିଛନ୍ତି । ଥାନା ଅଧିକାରୀଙ୍କ କହିବା ଅନୁସାରେ, ଅଭିଯୁକ୍ତଙ୍କୁ ଗିରଫ କରିବା ପାଇଁ ବିଭିନ୍ନ ସ୍ଥାନରେ ପୋଲିସ ଚଢ଼ାଉ ଜାରି ରଖିଛି । ପୀଡିତଙ୍କ ପରିବାର ପକ୍ଷରୁ ଲିଖିତ ଅଭିଯୋଗ ପାଇବା ମାତ୍ରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ପୁରା ମାମଲା ଉଚକା ଗାଓଁ ଥାନା ଅନ୍ତର୍ଗତ ନରଟକିୟାର । ଗୁଳିକାଣ୍ଡରେ ଆହତ ହୋଇଥିବା ରୋହିତ କୁମାର ସିଂ ନାମକ ଯୁବକ କହିଛନ୍ତି, ତାଙ୍କ ପଡିଶା ଘରେ ବାହାଘରକୁ ବରଯାତ୍ରୀ ଆସିଥିଲେ । ଏହି ସମୟରେ ଗାଁର କିଛି ଲୋକଙ୍କ ସହିତ ତାଙ୍କର ବିବାଦ ହୋଇଥିଲା । ବରଯାତ୍ରୀମାନେ ଖାଇବା ସମୟରେ ଏହି ହଙ୍ଗାମା ହୋଇଥିଲା । ଦେଖୁ ଦେଖୁ ମାମଲା ଏତେ ବଢ଼ିଯାଇଥିଲା ଯେ, ଗୁଳିକାଣ୍ଡ ଯାଏଁ କଥା ପହଁଞ୍ଚିଥିଲା ।
