ଅଜଗର ସାପ ଧରି ବାହାରକୁ ନେଇ ପଳାଉଥିବା ବେଳେ ଧରପଡିଲେ, ୩ ଜଣଙ୍କୁ ବାନ୍ଧିଲା ବନ ବିଭାଗ

ବାଙ୍କୀ, (ବାଘୁଆବାର୍ତ୍ତା): ଅଜଗର ସାପ ଧରି ବାଙ୍କୀ ଅଂଚଳରୁ ବାହାରକୁ ନେଇ ପଳାଉଥିବା ବେଳେ ଧରାପଡିଲେ ୩ ସାପ ଧରାଳି । ଧରାପଡିବା ପରେ ବନ ବିଭାଗକୁ କଲେ ହସ୍ତାନ୍ତର । ବାଙ୍କୀ ଭେଡା ଅଂଚଳରୁ ଏକ ୭ ଫୁଟ ଲମ୍ବ ଅଜଗର ସାପ ଧରି ତିନି ଜଣ ସାପ ଧରାଳି ବାହାରକୁ ନେଇ ପଳାଉଥିବା ବେଳେ ଧରାପଡିଛନ୍ତି ସ୍ଥାନୀୟ ଲୋକଙ୍କ ହାତରେ । ପରେ ବନ ବିଭାଗକୁ ହସ୍ତାନ୍ତର କରିଛନ୍ତି । ପ୍ରାଥମିକ ତଦନ୍ତରୁ ଜଣାପଡ଼ିଛି ଏହି ତିନି ଜଣ ସାପ ଧରାଳି ଯାଜପୁର ଅଂଚଳର ବୋଲି । ଏମାନେ କେଉଁଆଡେ ଚାଲାଣ କରିବାକୁ ନେଉଥିଲେ ତାହା ଏବେ ଜଣାପଡି ନାହିଁ । ବନ ବିଭାଗର ଛାନଭିନ କଲା ପରେ ତାହା ଜଣା ପଡିବ ବୋଲି ସୂଚନା ମିଳିଛି । ସେପଟେ ବାଙ୍କୀ ଶିଶୁଆ ବନଖଣ୍ଡ ଅଫିସ ଖୋର୍ଦ୍ଧା ରେଞ୍ଜରଙ୍କ ଅଧୀନରେ ଥିବାରୁ ସେଠାକୁ ନେଇ ଯାଇଛନ୍ତି ବନପାଳ ଚିତ୍ତରଞ୍ଜନ ମିଶ୍ର । ଅନ୍ୟପଟେ ସାପ ଧରାଳିଙ୍କ କହିବା କଥା ଏମାନେ କେଳା ସମ୍ପ୍ରଦାୟର ।