ପାରିବାରିକ କଳହକୁ ନେଇ ୨ ବଡ଼ ପୁଅଙ୍କ ସହ ମିଶି ସାନ ପୁଅକୁ ହତ୍ୟାକରି ପୋତିଦେଲା ଜନ୍ମକଲା ବାପା

ବାଲିଗୁଡା, (ବାଘୁଆବାର୍ତ୍ତା): ପାରିବାରିକ କଳହର କରୁଣ ପରିଣତି। ୨ ବଡ଼ ପୁଅଙ୍କ ସହ ମିଶି ସାନ ପୁଅକୁ ହତ୍ୟା କରି ଜଙ୍ଗଲରେ ପୋତିଦେଲା ଜନ୍ମକଲା ବାପା। ଜଙ୍ଗଲରୁ କ୍ଷତାକ୍ତ ଗଳିତ ମୃତଦେହ ଉଦ୍ଧାର। କନ୍ଧମାଳ ଜିଲ୍ଲା ବାଲିଗୁଡ଼ା ଥାନା ପାଙ୍ଗୁରୁମିଲା ଗାଁରେ ଘଟିଛି ଏଭଳି ଅଭାବନୀୟ ଘଟଣା। ଅଭିଯୁକ୍ତ ବାପା ଓ ୨ ଭାଇଙ୍କୁ ଗିରଫ କରି ତଦନ୍ତ କରୁଛି ପୋଲିସ। ବାଲିଗୁଡ଼ା ଥାନା ପାଙ୍ଗୁରୁମିଲା ଗାଁର ଭୂଷ୍କର ପୂଜାରୀ ଓ ତାଙ୍କର ଦୁଇ ପୁଅ ପ୍ରଫୁଲ ପୂଜାରୀ ଓ ଜମ୍ବେବ ପୂଜାରୀଙ୍କ ସହ ମିଶି ତାଙ୍କ ସାନ ପୁଅ ଚୈତନ୍ୟ ପୂଜାରୀଙ୍କୁ ହତ୍ୟା କରିଛନ୍ତି। ପାରିବାରିକ କଳହକୁ କେନ୍ଦ୍ର କରି ଏହି ବିଭତ୍ସ ହତ୍ୟାକାଣ୍ଡ ଘଟିଛି। ଉଭୟ ବାପ-ପୁଅ ମିଶି ସାନ ଭାଇକୁ ନିଜ ଘରେ ହତ୍ୟା କରିବା ପରେ ଗାଁ ନିକଟସ୍ଥ ଭୁଶୁକୁଟି ଜଙ୍ଗଲରେ ଟାଙ୍ଗି ଦେଇଥିଲେ। ଏହି ଘଟଣା ପ୍ରଘଟ ହେବାରୁ ଦୋଷ ଲୁଚାଇବାକୁ ଉଭୟ ବାପ-ପୁଅ ଚୈତନ୍ୟଙ୍କୁ ମାଟି ତଳେ ପୋତି ଦେଇଥିଲେ। ତେବେ ଘଟଣାଟି ଲୋକଲୋଚନକୁ ଆସିବା ପରେ ଗ୍ରାମବାସୀମାନେ ପୋଲିସକୁ ଖବର ଦେଇଥିଲେ। ବାଲିଗୁଡା ପୋଲିସ ଓ ମାଜିଷ୍ଟ୍ରେଟ୍ ଶଶାଙ୍କ ଶେଖର ପାତ୍ରଙ୍କ ଉପସ୍ଥିତିରେ ମୃତଦେହ ପୋତିଥିବା ଜାଗା ଚିହ୍ନଟ କରିଥିଲେ ଅଭିଯୁକ୍ତ ବାପା। ପୋଲିସ ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ଉପଖଣ୍ଡ ମେଡିକାଲକୁ ପଠାଇଛି। ଉଭୟ ଅଭିଯୁକ୍ତ ବାପ-ପୁଅ ୩ ଜଣଙ୍କୁ ଗିରଫ କରି ତଦନ୍ତ କରୁଛି ପୋଲିସ।