ଭଦ୍ରକ, (ବାଘୁଆବାର୍ତ୍ତା): ନିଜକୁ ଜଣେ ବଡ଼ ବିତ୍ତଶାଳୀ ପରିବାରର ଯୁବକ ବୋଲି ପରିଚୟ ଦେଇ ବନ୍ଧୁତା ସ୍ଥାପନ । ପରେ ପ୍ରେମ ଓ ବିବାହ । ବିବାହ ପରେ ନିଜ ପରିବାରକୁ କୋଟିପତି ବ୍ୟବସାୟୀ କହି ପତ୍ନୀ ଘରୁ ବାରବାର ଅର୍ଥ ଆଣିଲେ । ବାପାଙ୍କ ଆଳୁ, ପିଆଜ ଗୋଦାମ ସହ ଶୀତଳ ଭଣ୍ଡାର ପାଇଁ ବହୁ ଅର୍ଥ ଦରକାର, ନ ହେଲେ ବେପାର ଚାଲିଯିବ । ଏଭଳି କହି ଅହମଦାବାଦରୁ ବିଭିନ୍ନ ସମୟରେ ପ୍ରାୟ ୫ କୋଟି ଟଙ୍କା ଧରି ଓଡ଼ିଆ ସ୍ୱାମୀ ଓଡ଼ିଶାକୁ ଫେରି ଆସିଛନ୍ତି । ପତ୍ନୀ ଶେଷରେ କନ୍ୟା ସନ୍ତାନଙ୍କୁ ଧରି ଶାଶୂ ଘରେ ପହଞ୍ଚି ପରିବାର ଷ୍ଟାଟସ ଦେଖି କାବା ହୋଇଛନ୍ତି । ସ୍ୱାମୀଙ୍କୁ ଖୋଜି ନ ପାଇ ବନ୍ତ ଥାନାର ଦ୍ୱାରସ୍ଥ ହୋଇଛନ୍ତି । ସ୍ୱାମୀ ଫେରାର ପରେ ତାଙ୍କ ଶାଶୂ ଓ ଶ୍ୱଶୁର ନାନା ଗାଳିମନ୍ଦ କରିବା ସହ ହତ୍ୟା ଧମକ ଦେଇଥିବା ବନ୍ତ ଥାନାରେ ଅଭିଯୋଗ ହୋଇଛି । ମାମଲା ବି ରୁଜୁ ହୋଇଛି । ଏବେ ଶାଶୂ ଘର ଲୋକ ଫେରାର ହୋଇଥିବାବେଳେ ନ୍ୟାୟ ପାଇଁ ମହିଳା ଜଣଙ୍କ ଝିଅକୁ ଧରି ଏସ୍ପିଙ୍କ ଦ୍ୱାରସ୍ଥ ହୋଇଛନ୍ତି । ମଙ୍ଗଳବାର ଏହି ଘଟଣା ଭଦ୍ରକ ଜିଲ୍ଲାରେ ଚର୍ଚ୍ଚାର ବିଷୟ ସାଜିଛି । ନ୍ୟାୟ ନ ମିଳିବାରୁ ଅସନ୍ତୁଷ୍ଟ ହୋଇ ଶେଷରେ ମହିଳା ଜଣଙ୍କ ନିଜ ଭାଇ ସହ ଭୁବନେଶ୍ୱର ଗସ୍ତ କରିଛନ୍ତି । ମୁଖ୍ୟମନ୍ତ୍ରୀ ଓ ଡିଜିପିଙ୍କୁ ଦେଖା କରିବାକୁ ନିଷ୍ପତ୍ତି ନେଇ ଭଦ୍ରକରୁ ଭୁବନେଶ୍ୱର ଯାତ୍ରା ଆରମ୍ଭ କରିଛନ୍ତି । ଗୁଜରାଟର ଅହମଦାବାଦ ସହରର ନ୍ୟୁ ରୁମିପୁର ଅଞ୍ଚଳର ଯୁବତୀ ହୀରାଲବେନ ହସମୁଖଲାଲ ମୋଦି (୩୩) । ଏକ ଘରୋଇ କମ୍ପାନିରେ ବଡ଼ ଅଧିକାରୀ ଭାବେ ଅହମଦାବାଦରେ ଚାକିରି କରିଥିଲେ । ୨୦୧୯ରେ ଉକ୍ତ ସହରରେ ଭଦ୍ରକ ଜିଲ୍ଲା ବନ୍ତ ଥାନା ନରସିଂହପୁର ଗ୍ରାମର ପ୍ରଦୀପ ଲାହି ନାୟକଙ୍କ ପୁଅ ମନୋଜ ସହ ଭେଟ ହୋଇଥିଲା । ମନୋଜ ନିଜକୁ ଜଣେ କୋଟିପତି ପରିବାରର ବୋଲି ପରିଚୟ ଦେଇ ହୀରାଲବେନଙ୍କ ସହ ବନ୍ଧୁତା ବାନ୍ଧିଥିଲେ । ପରେ ପ୍ରେମ କରି ବିବାହ ପ୍ରସ୍ତାବ ଦେଇଥିଲେ । ଓଡ଼ିଶାରେ ତାଙ୍କ ପରିବାରର ଅନେକ ଖ୍ୟାତି । ତାଙ୍କ ବାପା ଏକ ରାଜନୈତିକ ଦଳର ସଭାପତି । ପୁଣି ଆଳୁ ଓ ପିଆଜ ଗୋଦାମ ରହିଛି । ଏକ ବଡ଼ ବ୍ୟବସାୟ । କୋଟି କୋଟି ଟଙ୍କାର କାରବାର କହି ହୀରାଲବେନଙ୍କୁ ବିବାହ କରିଥିଲେ । ବିବାହର ୧୫ ଦିନ ପରେ ବାପାଙ୍କର ବହୁତ ଟଙ୍କା ଦରକାର । ନ ହେଲେ ବ୍ୟବସାୟ ବୁଡ଼ିଯିବ । ଏଭଳି ମିଛ କହି ଟଙ୍କା ଲୁଟିବା ଆରମ୍ଭ କରିଥିଲା ବୋଲି ହୀରାଲବେନ ଅଭିଯୋଗ ଆଣିଛନ୍ତି । ଉଭୟ ଅହମଦାବାଦରେ ଏକାଠି ରହିଛନ୍ତି । ଓଡ଼ିଶା ବିଜନେସ ବାବଦରେ ସୁନେଲି ସ୍ୱପ୍ନ ଦେଖା ମନୋଜ ବହୁବାର ବିଭିନ୍ନ ବାହାନରେ ପ୍ରାୟ ୫ କୋଟିରୁ ଅଧିକ ଟଙ୍କା ଆଣିଛନ୍ତି । ଉଭୟଙ୍କର ଏକ ୨ ବର୍ଷର କନ୍ୟା ସନ୍ତାନ ରହିଛି । ମନୋଜ ଓଡ଼ିଶା ଆସି ଫେରାର ହୋଇଛନ୍ତି । ମଝିରେ ମଝିରେ ମନୋଜଙ୍କୁ ଯୋଗାଯୋଗ କଲେ ମୁଁ ବାପାଙ୍କ ବିଜନେସ୍ରେ ଅଛି । ଖୁବଶୀଘ୍ର ଓଡ଼ିଶାରୁ ଅହମଦାବାଦ ଫେରିବି ବୋଲି ପ୍ରତିଶ୍ରୁତି ଦେଇ ପରେ ଯୋଗାଯୋଗ ବନ୍ଦ କରିଥିଲେ । ମନୋଜ ଆଉ ନ ଫେରିବାରୁ ହୀରାଲବେନ ଶେଷରେ ୨ ବର୍ଷର ଝିଅକୁ ଧରି ବନ୍ତ ଥାନା ଅଧୀନ ଶାଶୂଘରକୁ ଆସି ସ୍ଥିତି ଦେଖି ତାଙ୍କ ହୋସ୍ ଉଡ଼ିଛି । ଯେଉଁ କୋଟିପତି ଓ ବଡ଼ ବ୍ୟବସାୟୀ ବୋଲି କହି ମନୋଜ ହାତ ଧରିଥିଲେ, ତାହା ମିଛ ବୋଲି ଜାଣିଛନ୍ତି । ମନୋଜଙ୍କ ଦେଖା ପାଇପାରିନାହାନ୍ତି । ସେପଟେ ଶାଶୂ ଘର ଲୋକ ତାଙ୍କୁ ନିର୍ଯାତନା ଦେବା ସହ ଗାଳିମନ୍ଦ କରି ଘରୁ ତଡ଼ିଛନ୍ତି । ଜୀବନରୁ ମାରିଦେବାକୁ ଧମକ ଦେଇଥିବା ହୀରାଲବେନ ବନ୍ତ ଥାନେରେ ଅଭିଯୋଗ କରିଥିଲେ । ବନ୍ତ ଥାନାରେ ୧୭୬/୨୪ରେ ଗତ ଅକ୍ଟୋବର ୨୫ରେ ପୁଲିସ ମାମଲା ଦାୟର କରିଛି । ପୁଲିସ ଗିରଫ ଭୟରେ ଏବେ ଶାଶୂ ଘର ଲୋକ ଫେରାର ହୋଇଛନ୍ତି । ଘରେ କେବଳ ବୁଢ଼ୀ ଲୋକ ଜଣେ ଥିବା ହୀରାଲବେନ କହିଛନ୍ତି । ବନ୍ତ ଥାନାକୁ ବାରବାର ସେ ଦୌଡ଼ି ନିରାଶ ହୋଇଛନ୍ତି । ଏସ୍ପିଙ୍କୁ ୪ ଥର ଭେଟିବାକୁ ଆସିଛନ୍ତି । ନ୍ୟାୟ ନ ପାଇ ଶେଷରେ ବାଧ୍ୟ ହୋଇ ଭୁବନେଶ୍ୱର ଅଭିମୁଖେ ନିଜ ଭାଇ ସହ ଯାଇଛନ୍ତି । ମୁଖ୍ୟମନ୍ତ୍ରୀ ଓ ଡିଜିପିଙ୍କ ଭେଟି ନ୍ୟାୟ ଆଶା ରଖିଛନ୍ତି ।
