କଟକ, (ବାଘୁଆବାର୍ତ୍ତା): ମୁଁ କାଳିଆ, ଅସୁନ୍ଦର ବୋଲି ମୋ’ର ପ୍ରେମକୁ ବେଖାତିର କରିଛି । ମୋତେ ଭଲ ନପାଇ ମୋର ସାଙ୍ଗର ଗାର୍ଲଫ୍ରେଣ୍ଡ୍ ହୋଇଛି । ଠିକ୍ ଅଛି, ସୁଯୋଗ ମିଳୁ ପାନେ ଦେବି ।-ପ୍ରତିଶୋଧର ଏଭଳି କିଛି ନିଆଁରେ ଜଳୁଥିବା ଜଣେ ଛାତ୍ର ହିଁ କଟକରେ ହୋଇଥିବା ଗଣଦୁଷ୍କର୍ମ ଘଟଣାର ମୁଖ୍ୟ କାର୍ପଟଦାର ବୋଲି ପୁଲିସ ଜାଣିବାକୁ ପାଇଛି । ଅଶ୍ଲୀଳ ଭିଡିଓକୁ ଭାଇରାଲ୍ ଧମକ ଦେଇ ଏହି ଛାତ୍ର ଜଣକ ହିଁ ଯୋଜନାବଦ୍ଧ ଭାବେ ସବୁ କରିଛି । ସମସ୍ତ ଅଭିଯୁକ୍ତଙ୍କ ଜବତ ଫୋନ୍ ଓ ଘଟଣା ଦିନ ପିନ୍ଧିଥିବା ପୋଷାକକୁ ଷ୍ଟେଟ୍ ଫୋରେନ୍ସିକ୍ ଲାବ୍ (ଏସ୍ଏଫ୍ଏଲ୍) କୁ ପଠାଯାଇଥିବା ପୁଲିସ ସୂଚନା ଦେଇଛି । ପୁଲିସର କହିବାନୁସାରେ, ନୟାଗଡ଼ର ପିତୁ, ବାଦାମବାଡ଼ି ଥାନା ଅଞ୍ଚଳର ଆଶୁ ଓ ପୀଡ଼ିତା ଏକ ସଙ୍ଗେ କଲେଜରେ ପଢ଼ୁଛନ୍ତି । କିଛି ମାସ ପୂର୍ବର ଘଟଣା, ପିତୁ ପ୍ରଥମେ ପୀଡ଼ିତାଙ୍କୁ ଏକତରଫା ପ୍ରେମ କରୁଥିଲେ । ପ୍ରେମ ନିବେଦନ କଲା ପରେ କିନ୍ତୁ ପୀଡ଼ିତା ତାହାକୁ ପ୍ରତ୍ୟାଖାନ କଲେ । ଏହା ମଧ୍ୟରେ ପୀଡ଼ିତା ଓ ପିତୁର ସାଙ୍ଗ ଆଶୁ ମଧ୍ୟରେ ପ୍ରେମ ସମ୍ପର୍କ ଗଢ଼ିଉଠିଲା । ଏହି ବିଷୟ ଜାଣିବା ପରେ ପିତୁ ପ୍ରତିଶୋଧ ପରାୟଣ ହେଲା । ପୀଡ଼ିତା ଅର୍ଥାତ୍ ତାର ସହପାଠୀକୁ ଦିନେ ପାନେ ଚଖାଇବ ବୋଲି ପଣ କଲା । ଏହା ମଧ୍ୟରେ ଆଶୁ ଓ ପୀଡ଼ିତାଙ୍କର ମଧ୍ୟରେ ପ୍ରେମ ସମ୍ପର୍କ ବଢ଼ିଚାଲିଲା । କାଳୀ ଭସାଣି ବେଳେ ଆଶୁ ପୀଡ଼ିତାଙ୍କୁ ନେଇ କାଠଗଡ଼ା ସାହିରେ ଥିବା ନାବାଳକ ସାଙ୍ଗର କାଫେକୁ ଯାଇଥିଲା । ସେଠାରେ ଖିଆପିଆ ବାହାନାରେ ଆଶୁ ତାର ପ୍ରେମିକା ସହ ଜବରଦସ୍ତ ଶାରୀରିକ ସମ୍ପର୍କ ରଖିଥିଲା । ଆଉ ଏହି ସମୟର ଦୃଶ୍ୟକୁ କାଫେ ମାଲିକ ଫୋନ୍ରେ ରେକର୍ଡ କରିଦେଇଥିଲା । ପରଦିନ କାଫେ ମାଲିକ ଏହି ଭିଡିଓକୁ ଆଶୁ ଓ ପରେ ପିତୁକୁ ଦେଖାଇଲା । ପିତୁ ସେହି ଭିଡିଓ ପାଇଯିବା ପରେ ଆରମ୍ଭ କଲା ଅସଲ ଖେଳ । ପୂର୍ବରୁ ପ୍ରତିଶୋଧ ମୋଡ୍ରେ ଥିବା ପିତୁ ବ୍ଲାକମେଲ୍ ଆରମ୍ଭ କଲା । ଉକ୍ତ ଭିଡିଓ ଦେଖାଇ ପୀଡ଼ିତା ସହ ଶାରୀରିକ ସମ୍ପର୍କ ରଖିବାକୁ ପିତୁ କହିଲା । ଆଶୁ ଉକ୍ତ କଥା ପୀଡ଼ିତାଙ୍କୁ କହିବାରୁ ଭିଡିଓ ଭାଇରାଲ୍ ହେବା ଭୟରେ ପୁଣି କାଠଗଡ଼ା ସାହିର କାଫେକୁ ଆସିଲା । ସେଠାରେ କାଫେ ନାବାଳକ ମାଲିକ ପୀଡ଼ିତାକୁ ବଳାତ୍କାର କଲେ। ଏହି ଘଟଣା ଏହିଠାରେ ଅଟକିଲାନି, ପିତୁ ନିଜେ ପୀଡ଼ିତା ସହ ଶାରୀରିକ ସମ୍ପର୍କ ରଖିବ ବୋଲି ଆଶୁକୁ କହି ପୁନର୍ବାର ପୀଡ଼ିତାଙ୍କୁ ଡକାଇଲା । ଏଥର ପୀଡ଼ିତା ଆସିବା ପରେ ତାଙ୍କୁ ବାରଙ୍ଗର ତ୍ରିଶୁଳିଆକୁ ନେଇଗଲେ । ସେଠାରେ ପିତୁ ଓ ଲକି ପୀଡ଼ିତାଙ୍କୁ ବଳାତ୍କାର କରିଥିଲେ । ଏସବୁ ଘଟଣାରେ ଅନ୍ୟ ଦୁଇ ଅଭିଯୁକ୍ତ ସାମିଲ ରହିଥିଲେ ବି ସେମାନେ ବଳାତ୍କାର କରିନାହାନ୍ତି ବା ପୀଡ଼ିତା ସହ ଶାରୀରିକ ସମ୍ପର୍କ ରଖିନାହାନ୍ତି ବୋଲି ପୁଲିସ କହିଛି । ସେମାନେ କେବଳ ଭିଡିଓକୁ ଫୋନ୍ରେ ରଖି ପୀଡ଼ିତାଙ୍କୁ ଏଭଳି କରିବା ପାଇଁ ବାଧ୍ୟ କରିଥିଲେ ଓ ପୂରା ଘଟଣାରେ ସଂପୃକ୍ତ ଥିବା ପୀଡ଼ିତା ତାଙ୍କ ଏତଲାରେ ଲେଖିଥିବା ପୁଲିସ ଜଣାଇଛି । ଅନ୍ୟପଟେ ପୁଲିସ ଜବତ କରିଥିବା ପୀଡ଼ିତା, ସମସ୍ତ ଅଭିଯୁକ୍ତଙ୍କ ପୋଷାକ ଓ ୫ଟି ଫୋନ୍କୁ ଏସ୍ଏଫ୍ଏଲ୍କୁ ପଠାଇଛି । ପୀଡ଼ିତାଙ୍କର କରାଯାଇଥିବା ମେଡ଼ିକାଲ୍ ରିପୋର୍ଟକୁ ପୁଲିସ ଅପେକ୍ଷା କରିଛି । ଘଟଣାରେ ସଂଗ୍ରହ ହୋଇଥିବା ତଥ୍ୟ, ପ୍ରମାଣ ଓ ସାକ୍ଷ୍ୟ ସମସ୍ତ ଦୋଷୀଙ୍କୁ ଦଣ୍ଡିତ କରିବା ପାଇଁ ପର୍ଯ୍ୟାପ୍ତ ବୋଲି ଡିସିପି ଜଗମୋହନ ମୀନା ସୂଚନା ଦେଇଛନ୍ତି । ତେଣୁ ଖୁବ୍ଶୀଘ୍ର ଏହି ଘଟଣାରେ ପୂର୍ଣ୍ଣାଙ୍ଗ ଚାର୍ଜସିଟ୍ ଦାଖଲ କରିବ ବୋଲି ଶ୍ରୀ ମୀନା କହିଛନ୍ତି ।
ଦଳିତ ଛାତ୍ରୀଙ୍କୁ ଗଣଦୁଷ୍କର୍ମ ମାମଲା, ହତାଶ ପ୍ରେମିକ ପିତୁ ମୁଖ୍ୟ କାର୍ପଟଦାର
