ନୟାଗଡ଼, (ବାଘୁଆବାର୍ତ୍ତା): ନୟାଗଡ଼ ପୁଲିସକୁ ମିଳିଛି ବଡ଼ ସଫଳତା । ଜଣେ ବ୍ୟକ୍ତି ଲୋକଙ୍କୁ ନକଲି ଜନ୍ମ ମୃତ୍ୟୁ ସାର୍ଟିଫିକେଟ ଦେଇ ବନ୍ଧା ହେଲେ । ସୁଚନାନୁସାରେ ଜଗତସିଂପୁର ଜିଲ୍ଲା କୁଜଙ୍ଗ ଥାନା ଅଗପଡା ଗ୍ରାମର କାଳନ୍ଦୀ ଚରଣ ସାହୁଙ୍କ ପୁଅ ସୁଜିତ କୁମାର ମହାନ୍ତି ଜାଲ ମୃତ୍ୟୁ ସାର୍ଟିଫିକେଟକୁ ନେଇ ନୟାଗଡ଼ ଆରକ୍ଷୀ ଅଧୀକ୍ଷକଙ୍କୁ ଅଭିଯୋଗ କରିଥିଲେ । ଅମୁଲ୍ୟ ନିଶଙ୍କଙ୍କ ମୃତ୍ୟୁ ପରେ ତାଙ୍କ ପତ୍ନୀ ଜାନକୀ ନିଶଙ୍କଙ୍କର ମୃତ୍ୟୁ ସାର୍ଟିଫିକେଟ ଆବଶ୍ୟକ ପଡିଥିଲା । ଅଭିଯୁକ୍ତ ତାଙ୍କୁ ଏକ ଜାଲ ସାର୍ଟିଫିକେଟ ଦେଇଥିବାର ଜଣା ପଡିଥିଲା । ଲେବର କାର୍ଡରେ ସହାୟତା ପାଇବା ପାଇଁ ସେ ମୃତ୍ୟୁ ସାର୍ଟିଫିକେଟ ବାହାର କରିବା ପାଇଁ ଅଭିଯୁକ୍ତ ତାଙ୍କ ଠାରୁ ୧୦୦୦ ଟଙ୍କା ନେଇ ମୃତ୍ୟୁ ସାର୍ଟିଫିକେଟ ପ୍ରଦାନ କରିଥିଲେ । ଭେରିଫିକେସନ ବେଳେ ଏହା ଜାଲ ବୋଲି ଜଣା ପଡିଥିଲା । ନୟାଗଡ଼ ପୁଲିସ ପକ୍ଷରୁ ତଦନ୍ତ କରାଯାଇ ନୂଆଗାଁ ଥାନା ନୂଆ ସାହିର ବିଜୟ କୁମାର ମହାନ୍ତିଙ୍କ ପୁଅ ସଞ୍ଜୟ ମହାନ୍ତିଙ୍କୁ ପୁଲିସ ଗିରଫ କରିଛି । ସେ ନୂଆଗାଁ ଇଣ୍ଡିଆନ ଓଭରସିଜ ବ୍ୟାଙ୍କ ସାମ୍ନାରେ ଏକ କମ୍ପ୍ୟୁଟର ଦୋକାନ ଦେଇଛନ୍ତି । ପୁଲିସ ପକ୍ଷରୁ କିଉଆରକୋଡ ମାଧ୍ୟମରେ ତଦନ୍ତ କରି ଅଭିଯୁକ୍ତ ସଞ୍ଜୟକୁ ଗିରଫ କରିଛି । ତାଙ୍କ ଠାରୁ ଏକ ଏଲଜି କମ୍ପାନିର କମ୍ପ୍ୟୁଟର, କଲର ପ୍ରିଣ୍ଟର, ସିପିୟୁ, କି ବୋର୍ଡ, ମାଉସ, ପାୱାର କେବୁଲ ମନିଟର ଓ କନେକ୍ଟରକୁ ପୁଲିସ ଜବତ କରିଛି । ନୂଆଗାଁ ଥାନାରେ କେସ୍ ନଂ ୧୩୯ରେ ମାମଲା ରୁଜୁ କରାଯାଇ ସଞ୍ଜୟକୁ ଗିରଫ କରିବା ସହ କୋର୍ଟ ଫରୁୱାର୍ଡ କରିଛି । ସଞ୍ଜୟ ଏଥି ସହ ଏହା ପୂର୍ବରୁ ଜଣଙ୍କୁ ଜନ୍ମ ସାର୍ଟିଫିକେଟ ପ୍ରଦାନ କରିଥିଲେ । ଏହା ମଧ୍ୟ ନକଲି ଥିଲା ବୋଲି ଜଣା ପଡିଛି ।
ଲୋକଙ୍କୁ ଦେଉଥିଲେ ନକଲି ଜନ୍ମ ମୃତ୍ୟୁ ସାର୍ଟିଫିକେଟ, ବାନ୍ଧିଲା ପୁଲିସ
