କଳାହାଣ୍ଡି, (ବାଘୁଆବାର୍ତ୍ତା): ସ୍ୱାମୀର ଟାଙ୍ଗିଆ ଚୋଟରେ ସ୍ତ୍ରୀ ମୃତ ,ଜଣେ ଗୁରୁତର । ମଙ୍ଗଳବାର ରାତିରେ କଳାହାଣ୍ଡି-ରାୟଗଡା ସୀମାନ୍ତ ଭାଟିପାସ ଗାଁର ଗୁରୁନାଥ ଗଉଡ଼ ନିଜ ସ୍ତ୍ରୀ ପୁଷ୍ପା ଗଉଡ଼କୁ ଟାଙ୍ଗିଆରେ ହାଣି ହତ୍ୟା କରିଥିଲେ । ସ୍ତ୍ରୀକୁ ହତ୍ୟା କରିବା ପରେ ସେ ରକ୍ତମୁଖା ହେଇ ଗାଁ ସାରା ବୁଲି ବାଟରେ ଯାହାକୁ ଦେଖିଲେ ତାକୁ ମାରିବାକୁ ଗୋଡାଉଥିବା ଖବର ସାମ୍ନାକୁ ଆସିଥିଲା । ସେତେବେଳେ ସେହି ଗାଁର ଜଣେ ନାବାଳକ ଶିବଶଙ୍କର ପାଖାପାଖି ବୟସ ୧୨ ବର୍ଷ ହେବ । ନିଜ ଘରକୁ ଯାଉଥିବା ସମୟରେ ତାକୁ ମଧ୍ୟ ଟାଙ୍ଗିଆରେ ଆକ୍ରମଣ କରିଥିଲେ । ଶିବଶଙ୍କରଙ୍କ ଅବସ୍ଥା ଗୁରୁତର ହେବାପରେ ମଧ୍ୟ ଗ୍ରାମବାସୀ ଡରରେ କେହି ବାହାରକୁ ଯିବାପାଇଁ ସାହସ କରି ପାରି ନଥିଲେ ଏବଂ ପୋଲିସକୁ ଖବର ଦେଇଥିଲେ । ଏହି ଗାଁଟି ଥୁଆମୁଳ ରାମପୁର ପାଖରେ ଥିଲେ ବି ରାୟଗଡା ଜିଲ୍ଲା କାଶୀପୁର ଥାନା ଅଧୀନରେ ଯାଉଥିବାରୁ କାଶୀପୁର ପୋଲିସ ଏବଂ ଥୁଆମୁଳରାମପୁର ପୋଲିସର ମିଳିତ ଉଦ୍ୟମରେ ଉଭୟ ମୃତ ଏବଂ ଆହତଙ୍କୁ ଥୁଆମୁଳରାମପୁର ଡାକ୍ତରଖାନାକୁ ଅଣାଯାଇଥିଲା । ପରେ ଅଭିଯୁକ୍ତ ଗୁରୁନାଥଙ୍କୁ ଗିରଫ କରାଯାଇଥିଲା । ସେ କିଛି କହୁନଥିବାରୁ ଘଟଣାର କାରଣ କଣ ଏବଂ ସେ କଣ ପାଇଁ ଏଭଳି କାଣ୍ଡ ଘଟାଇଲେ ତାହା ଏପର୍ଯ୍ୟନ୍ତ ଜଣା ପଡିନଥିବା ସୂଚନା ।





