ମୁନିଗୁଡା, (ବାଘୁଆବାର୍ତ୍ତା): ଫୁଲବାଣୀରୁ କେରଳକୁ ଗଞ୍ଜେଇ ଚୋରା ଚାଲାଣ ବେଳେ ମାଡିବସିଲା ପୋଲିସ । ରାୟଗଡା ଜିଲ୍ଲା ବିଷମକଟକ ଥାନା ଚାଟିକଣା ହାଟପଦା ନିକଟରୁ ୨୧କେଜି ଗଞ୍ଜେଇ ସହ ଦୁଇଜଣ ଚାଲାଣକାରିଙ୍କୁ ମଧ୍ୟ ଗିରଫ କରିଛି ପୋଲିସ । ଏହି ଚାଲାଣକାରୀ ମାନେ ଫୁଲବାଣିରୁ ଗଞ୍ଜେଇ ଆଣି ଟ୍ରେନରେ କେରଳ ନେବା ପାଇଁ ପ୍ରସ୍ତୁତ ହୋଇଥିବା ବେଳେ ପୁଲିସ ହାତରେ ଧରାପଡିଛନ୍ତି । ବିଶେଷ ସତ୍ରରୁ ଖବରପାଇ ବିଷମକଟକ ଥାନା ଏସ୍.ଆଇ ପ୍ରଶନ୍ନ ନାୟକଙ୍କ ନେତୃତ୍ୱରେ ଏକ ଟିମ୍ ଗାଡିମଟର ଜାଞ୍ଚ କରୁଥିବା ବେଳେ ହାଟପଦାରେ ଦୁଇଜଣ ବ୍ୟକ୍ତି ଦୁଇଟି ଜରିବସ୍ତା ଧରି ବୁଲୁଥିବାରୁ ପୋଲିସ୍ ସନ୍ଦେହ କରି ଉଭୟଙ୍କୁ ପଚରାଉଚାର କରିବା ସହ ବସ୍ତା ଗୁଡିକ ଯାଞ୍ଚ କରବାବେଳେ ସେହି ଜରିବସ୍ତାରେ ଗଞ୍ଜେଇ ଥିବା ଜାଣିବା କୁ ପାଇଥିଲା ପୋଲିସ । ଉଭୟଙ୍କୁ ବିଷମକଟକ ଥାନାକୁ ଆଣି ପଚରାଉଚାର କରିବା ସହ ମାଜିଷ୍ଟ୍ରେଟଙ୍କ ଉପସ୍ଥିତିରେ ଗଞ୍ଜେଇ ଓଜନ କରିଥିଲେ । ଦୁଇ ବସ୍ତାରେ ୨୧କିଲୋ ଗଞ୍ଜେଇ ରହିଥିବା ବେଳେ ସେମାନେ ଫୁଲବାଣି ଅଂଚଳରୁ ଆଣି ବିଷମକଟକ ଷ୍ଟେସନ ରୁ ଟ୍ରେନ୍ ଯୋଗେ କେରଳ ଯିବାର ଥିବା ପ୍ରକାଶ କରିଛନ୍ତି । ଗିରଫ ଦୁଇ ବ୍ୟବସାୟୀ ହେଲେ ଉତ୍ତର ପ୍ରଦେଶ ରାଜ୍ୟର ବୁରାହ୍ନ ଏହେମଦ୍ ଏବଂ ପଶ୍ଚିମବଙ୍ଗ ରାଜ୍ୟର ମହମ୍ମଦ ରବି । ଜବତ ଗଞ୍ଜେଇ ର ଆନୁମାନିକ ବଜାର ମୁଲ୍ୟ ୨ଲକ୍ଷ ଟଙ୍କା ହେବ ବୋଲି ଜଣାପଡିଛି ।





