ବଡ଼ବିଲ, (ବାଘୁଆବାର୍ତ୍ତା): କେନ୍ଦୁଝର ଜିଲ୍ଲା ରୁଗୁଡ଼ି ପୋଲିସକୁ ବଡ଼ ସଫଳତା । ଲୁହାପଥର ଗୁଣ୍ଡ ଚୋରା ଚାଲାଣ ବେଳେ ଗୋଡ଼ାଇ ଗୋଡ଼ାଇ ଧରିଲା ପୋଲିସ୍ । ପ୍ରାୟ ୨୫ କି.ମି ଯାଏଁ ପିଛା କରି ଚମ୍ପୁଆ ଥାନା, ରିମୁଳି ନିକଟରୁ ୭ଟି ଲୁହାପଥର ଗୁଣ୍ଡ ବୋଝେଇ ଟ୍ରକ୍ ଜବତ କରିଛି ପୋଲିସ। ଏହାର ଆନୁମାନିକ ମୂଲ୍ୟ ୮ ଲକ୍ଷ ଟଙ୍କାରୁ ଉର୍ଦ୍ଧ୍ଵ ହେବ ବୋଲି ପୋଲିସ ସୂତ୍ରରୁ ସୂଚନା ମିଳିଛି। ସୁନ୍ଦରଗଡ଼ ଜିଲ୍ଲା କୋଇଡ଼ା ଅଞ୍ଚଳରୁ ୭ଟି ହାଇୱା ଟ୍ରକରେ ଝାଡଝଣ୍ଡକୁ ଲୁହାପଥର ଗୁଣ୍ଡ ଚୋରା ଚାଲାଣ ହେଉଥିବା ନେଇ ବିଶେଷ ସୂତ୍ରରୁ ଖବର ପାଇ ରୁଗୁଡ଼ି ପୋଲିସ୍ ଚଢାଉ କରିଥିଲା। ବଡ଼ବିଲ ଥାନା ରୋଇଡ଼ା ଛକରେ ଜଗିରହି ଏହି ସବୁ ଗାଡ଼ିକୁ ପୋଲିସ୍ ଅଟକାଇଥିଲା। ହେଲେ ଗାଡ଼ି ଗୁଡିକ ନଅଟକି ଦ୍ରୁତ ଗତିରେ ପଳାଇବାକୁ ଚେଷ୍ଟା କରିଥିଲେ । ତେବେ ୨୫ କି.ମି. ଯାଏଁ ପିଛା କରି ଚମ୍ପୁଆ ଥାନା, ରିମୁଳି ନିକଟରୁ ଟ୍ରକ ଗୁଡ଼ିକୁ ଅଟକାଇବାରେ ସଫଳ ହୋଇଥିଲା ପୋଲିସ୍ । ୪ଜଣ ଡ୍ରାଇଭର ଗାଡ଼ି ଗୁଡ଼ିକୁ ଛିଡା କରି ସେଠାରୁ ଫେରାର୍ ହୋଇଯାଇଥିବା ବେଳେ ୩ଜଣ ଡ୍ରାଇଭରଙ୍କୁ ପୋଲିସ୍ କାବୁ କରିଛି । ଜବତ ହୋଇଥିବା ୭ଟି ଟ୍ରକରେ ପାଖାପାଖି ୧୫୦ ମେଟ୍ରିକ ଟନ୍ ଲୁହାପଥର ଗୁଣ୍ଡ ବୋଝେଇ ହୋଇଛି। ଏହାର ଆନୁମାନିକ ମୂଲ୍ୟ ୮ଲକ୍ଷ ଟଙ୍କାରୁ ଉର୍ଦ୍ଧ୍ଵ ହେବ ବୋଲି ଆକଳନ କରାଯାଇଛି । ଜାଲ୍ କାଗଜପତ୍ର ଜରିଆରେ ଏହି ଲୁହା ପଥର ଗୁଣ୍ଡ ସବୁ ଝାଡଖଣ୍ଡକୁ ଚୋରା ଚାଲାଣ କରାଯାଉଥିବା ପୋଲିସକୁ ସୂଚନା ମିଳିଛି। ଏହି ଚୋରା କାରବାରରେ ଅନ୍ୟ କେଉଁମାନେ ସମ୍ପୃକ୍ତ ଅଛନ୍ତି ଏବଂ ଗାଡ଼ି ମାଲିକଙ୍କ କିଭଳି ସମ୍ପୃକ୍ତି ରହିଛି ସେନେଇ ଅଧିକ ତଦନ୍ତ ଚଳାଇଛି ପୋଲିସ୍ ।
