ଢେଙ୍କାନାଳ, (ବାଘୁଆବାର୍ତ୍ତା): ଢେଙ୍କାନାଳ ଜିଲ୍ଲା ଭୁବନ ବ୍ଲକ୍ ଅନ୍ତର୍ଗତ ମୃଦଙ୍ଗା ଗ୍ରାମ ନିକଟରେ ଏକ ଠିକାଦାରୀ କ୍ୟାମ୍ପ୍ ରେ ଚାନ୍ଦା ଆଦାୟକୁ ନେଇ ସଂଘର୍ଷ ଘଟିଛି । ଫଳରେ ଉଭୟ ଗୋଷ୍ଠୀର ୩ ଜଣ ଗୁରୁତର ହୋଇଛନ୍ତି । ଗୁରୁତରମାନଙ୍କୁ ସ୍ଥାନୀୟ ଭୁବନ ଡାକ୍ତରଖାନାରେ ଭର୍ତ୍ତି କରାଯାଇଛି । ଜାତୀୟ ରାଜପଥ ୫୩ର ଢେଙ୍କାନାଳ ଜିଲ୍ଲା ଭୁବନ ଅନନ୍ତପୁର ଛକଠାରୁ ନୀଳକଣ୍ଠପୁର ଗ୍ରାମ ସ୍ଥିତ ବାଜିରାଉତ ସେତୁ ପର୍ୟ୍ୟନ୍ତ ପୂର୍ତ୍ତ ବିଭାଗ ରାସ୍ତାର ସଂପ୍ରସାରଣ କାର୍ୟ୍ୟ ଚାଲିଛି । ପୂର୍ତ୍ତ ବିଭାଗ ରାସ୍ତାଟି ଅନନ୍ତପୁର ଛକଠାରୁ ଭାୟା ବାଲିବୋ, ମହୁଲପାଳ, ମୃଦଙ୍ଗା ଏବଂ ନୀଳକଣ୍ଠପୁର ଗ୍ରାମକୁ ସଂଯୋଗ କରୁଛି । ଏହି କାର୍ୟ୍ୟକୁ ଆରକେ ଆସୋସିଏଟେଡ଼ ନାମକ ଏକ ଠିକା ସଂସ୍ଥା କରୁଛି । ବର୍ତ୍ତମାନ ଏହି ରାସ୍ତାର ନିର୍ମାଣ କାର୍ୟ୍ୟ ମୃଦଙ୍ଗା ପଞ୍ଚାୟତରେ ଚାଲୁଥିବା ବେଳେ ଠିକାସଂସ୍ଥାର କ୍ୟାମ୍ପଟି ଗ୍ରାମ ନିକଟରେ ରହିଛି । ତେବେ ସ୍ଥାନୀୟ ଅଞ୍ଚଳର କିଛି ଅସାମାଜିକ ଯୁବକ ଏହି ସଂସ୍ଥାର ଠିକା କ୍ୟାମ୍ପରେ ରହୁଥିବା କର୍ମଚାରୀମାନଙ୍କୁ ଚାନ୍ଦା ମାଗିବା ସହିତ ଗାଳିଗୁଲଜ କରିଆସୁଛନ୍ତି । ଏପରିକି ଚାରି ପାଞ୍ଚ ଜଣ ଯୁବକ ରାସ୍ତା କାର୍ୟ୍ୟ ତଦାରଖ କରୁଥିବା ଇଞ୍ଜିନିୟର, ସୁପରଭାଇଜରଙ୍କୁ ଚାନ୍ଦା ମାଗିଥିଲେ । ଚାନ୍ଦା ନଦେବାରୁ ଏହି ଯୁବକମାନେ ସେମାନଙ୍କୁ ମରଣାନ୍ତକ ଆକ୍ରମଣ କରିଥିଲେ । ଫଳରେ ଉଭୟଙ୍କ ମଧ୍ୟରେ ସଂଘର୍ଷ ଘଟିଛି । ଏହି ସଂଘର୍ଷରେ ଠିକାସଂସ୍ଥାର ଦୁଇ ଜଣ ଓ ଆକ୍ରମଣକାରୀଙ୍କ ମଧ୍ୟରୁ ଜଣେ ଗୁରୁତର ହୋଇ ଭୁବନ ଡାକ୍ତରଖାନାରେ ଭର୍ତ୍ତି ହୋଇଥିବା ଜଣାପଡିଛି । ଏ ସମ୍ପର୍କରେ ଉଭୟ ଠିକାସଂସ୍ଥା ଓ ଆକ୍ରମଣକାରୀଙ୍କ ପକ୍ଷରୁ ଭୁବନ ଥାନାରେ ପୃଥକ ପୃଥକ ଅଭିଯୋଗ ହୋଇଥିବା ଜଣାପଡିଛି । ଭୁବନ ପୋଲିସ ଏହାର ତଦନ୍ତ ଆରମ୍ଭ କରିଛି ।
