ଭୁବନେଶ୍ୱର, (ବାଘୁଆବାର୍ତ୍ତା): ରୁଦ୍ଧ ଘରୁ ମହିଳାଙ୍କ ଗଳିତ ମୃତଦେହ ମିଳିବା ଘଟଣାରେ ପୁଲିସ ଅକଳରେ ପଡି଼ଛି । ଶବ ବ୍ୟବଚ୍ଛେଦ ରିପୋର୍ଟରୁ ମୃତ୍ୟୁର କାରଣ ସ୍ପଷ୍ଟ ହୋଇନି । ଭରତପୁର ଥାନା ପୁଲିସ୍ ଭିସାରା ରିପୋର୍ଟ ଭରସାରେ ଅଛି । ସେପଟେ ହତ୍ୟା ଅଭିଯୁକ୍ତ ତଥା ଗୀତା ସେଠୀଙ୍କ ପୁରୁଷବନ୍ଧୁ ସାଜିଥିବା ମିସ୍ତ୍ରୀକୁ ଗିରଫ କରିଛି କମିଶନରେଟ ପୋଲିସ। ବ୍ୟବଚ୍ଛେଦ ରିପୋର୍ଟରୁ କେବଳ ଏତିକି ଜଣାପଡ଼ିଛି ଯେ, ମୃତ୍ୟୁ ପୂର୍ବରୁ କିମ୍ବା ପରେ କୌଣସି ଧାରୁଆ ଅସ୍ତ୍ର ଯୋଗେ ଗୀତାଙ୍କୁ ଆକ୍ରମଣ କରାଯାଇନି । ମୃତଦେହରେ ବାହ୍ୟ ଆଘାତର ଚିହ୍ନ ନାହିଁ । କିନ୍ତୁ ମୃତଦେହଟି ପଚି ଯାଇଥିବାରୁ ବ୍ୟବଚ୍ଛେଦରୁ ଅଧିକ ତଥ୍ୟ ମିଳିପାରିନି । ଏପରିସ୍ଥଳରେ ପୁଲିସ ସନ୍ଦେହ କରୁଛି, ହତ୍ୟାକାରୀ ଜଣକ ତଣ୍ଟି ଚିପି ଗୀତାଙ୍କୁ ମାରିଥାଇ ପାରେ । ନଚେତ୍, ତକିଆ କିମ୍ବା କପଡ଼ା ଯୋଗେ ମୁହଁକୁ ମାଡି଼ ରଖି ତାଙ୍କର ଶ୍ୱାସରୁଦ୍ଧ କରିଥାଇ ପାରେ । ଖାଦ୍ୟ କିମ୍ବା ପାନୀୟରେ ବିଷ ମିଶାଇ ଗୀତାଙ୍କୁ ପିଇବାକୁ ଦେଇଥାଇ ପାରେ । ବ୍ୟବଚ୍ଛେଦ କରିଥିବା ଏମ୍ସ ଡାକ୍ତରୀଦଳ ମୃତଦେହର ଆଭ୍ୟନ୍ତରୀଣ ଅଙ୍ଗର ପାକସ୍ଥଳୀ, କିଡ୍ନୀ, ଶ୍ୱାସନଳୀର କିଛି ନମୁନା ସଂଗ୍ରହ କରିଛନ୍ତି । ଏସବୁକୁ ରାଜ୍ୟ ଅପରାଧ ବିଧି ବିଜ୍ଞାନଗାର (ଏସ୍ସିଆର୍ବି)କୁ ପଠାଯାଇଛି । ସେଠାରେ ଭିସାରା ପରୀକ୍ଷା ପରେ ରିପୋର୍ଟରୁ ମୃତ୍ୟୁର କାରଣ ଜଣାପଡ଼ିବ ବୋଲି ପୁଲିସ ଆଶା ରଖିଛି । ସେପଟେ ଗୀତାଙ୍କ ପରିବାର ଲୋକଙ୍କ ମୃତଦେହକୁ ଏମ୍ସ ହସ୍ପିଟାଲରୁ ଖୋର୍ଦ୍ଧା ବୋଲଗଡ଼ସ୍ଥିତ ଗାଁକୁ ନେଇଯାଇଛନ୍ତି । ସେମାନେ ଥାନାରେ ସମ୍ପୃକ୍ତ ମିସ୍ତ୍ରୀ ବିରୋଧରେ ଏକ ଏତାଲା ଦେଇଥିଲେ । ସେମାନେ ଅଭିଯୋଗ କରିଛନ୍ତି, ଗୀତା କାମ କରିବାକୁ ବାହାରକୁ ଯାନ୍ତି । ମିସ୍ତ୍ରୀଜଣକ ଗୀତାକୁ ଫୁସୁଲାଇ ଭୁବନେଶ୍ୱର ନେଇ ପଳାଇଥିଲା । ସେ ହିଁ ଗୀତାକୁ ମାରି କି କୁଆଡ଼େ ପଳାଇଛି ବୋଲି ଅଭିଯୋଗ କରିଥିଲେ। ସୂଚନା ମୁତାବିକ,ଗତ ୭ ତାରିଖରୁ ମହିଳାଙ୍କ ମୃତଦେହ ଠାବ କରିଥିଲା ପୋଲିସ। ଭରତପୁର ଥାନା ଅନ୍ତର୍ଗତ ରୁଚିକା ମାର୍କେଟ ନିକଟ ମହାବୀର ବସ୍ତିରୁ ମୃତଦେହ ମିଳିଥିଲା । ମୃତ ମହିଳା ହେଲେ ଖୋର୍ଦ୍ଧା ବୋଲଗଡ ଅଞ୍ଚଳର ଗୀତାଞ୍ଜଳି ସେଠୀ।
ରୁଦ୍ଧ ଘରୁ ମିଳିଛି ମହିଳାଙ୍କ ମୃତଦେହ
