ରମ୍ଭା/ଗଞ୍ଜାମ, (ବାଘୁଆବାର୍ତ୍ତା): ଘରୋଇ କଳିରୁ ପତ୍ନୀଙ୍କୁ ହତ୍ୟା କଲା । ପରେ ମଦ୍ୟପ ସ୍ୱାମୀ ଗାଁରେ ଜିରୋ ନାଇଟ୍ ସେଲିବ୍ରେସନ ବି କଲା । ସକାଳେ ସ୍ତ୍ରୀକୁ ଡାକ୍ତରଖାନା ନେଇଥିଲା । ସେଠାରେ ସ୍ତ୍ରୀର ମୃତ୍ୟୁ ହୋଇଯାଇଥିବା ଡାକ୍ତର ଘୋଷଣା କରିଥିଲେ । ଏନେଇ ଡାକ୍ତରଖାନା ପକ୍ଷରୁ ପୁଲିସକୁ ଖବର ଦଆଯାଇଥିଲା । ପୁଲିସ ପହଞ୍ଚିବା ପରେ ଘଟଣା ସାମ୍ନାକୁ ଆସିଲା । ମୃତା ଗଞ୍ଜାମ ବ୍ଲକ ଅନ୍ତର୍ଗତ ପାଳିବନ୍ଧ ପଞ୍ଚାୟତ ମୟୂରପଦା ଗ୍ରାମର ସିଏଚ. ଜାନକୀ(୩୦) । ହୁମା ଫାଣ୍ଡି ପୁଲିସ ଅଭିଯୁକ୍ତ ସ୍ୱାମୀ ସିଏଚ୍ ଲକ୍ଷ୍ମଣ ରେଡି(୩୫)ଙ୍କୁ ଗିରଫ କରିଛି । ମୃତଦେହ ବ୍ୟବଚ୍ଛେଦ ପାଇଁ ଛତ୍ରପୁର ଡାକ୍ତରଖାନା ପଠାଇ ଅଧିକ ତଦନ୍ତ ଜାରି ରଖିଛି । ହୁମା ଫାଣ୍ଡି ଅଧିକାରୀ ଦେବଦତ୍ତ ପ୍ରିୟଦର୍ଶୀ ମୟୂରପଦା ଗ୍ରାମକୁ ଯାଇ ତଦନ୍ତ କରିବା ସହ ସାଇଣ୍ଟିଫିକ୍ ଟିମ୍ ଘଟଣାସ୍ଥଳରେ ଛାନଭିନ୍ କରିଛି । ପୁଲିସ ସୂତ୍ରରୁ ମିଳିଥିବା ସୂଚନା ଅନୁସାରେ, ମୟୂରପଦା ଗ୍ରାମର ଲକ୍ଷ୍ମଣ ୧୭ ବର୍ଷ ପୂର୍ବେ ବେଣୀଗୌରୀ ଗ୍ରାମର ଜାନକୀଙ୍କୁ ବିବାହ କରିଥିଲେ। ଲକ୍ଷ୍ମଣ ଜଣେ ଡ୍ରାଇଭର ଏବଂ ସେ ବାହାର ରାଜ୍ୟରେ ଗାଡ଼ି ଚଳାଉଥିଲେ । ୮ ଦିନ ତଳେ ସେ ଗାଁକୁ ଆସିଥିଲେ । ବିବାହ ପରଠାରୁ ଅଧିକ ଯୌତୁକ ଦାବିରେ ସ୍ୱାମୀ ଓ ସ୍ତ୍ରୀ ମଧ୍ୟରେ ଅଧିକାଂଶ ସମୟରେ କଳହ ହେଉଥଲା । ଏନେଇ ଜାନକୀଙ୍କୁ ମାରପିଟ୍ କରୁଥଲା ଲକ୍ଷ୍ମଣ ବୋଲି ଗ୍ରାମବାସୀ କହିଛନ୍ତି । ଶନିବାର ରାତିରେ ଲକ୍ଷ୍ମଣ ପ୍ରଚୁର ମଦ୍ୟପାନ କରି ଘରକୁ ଆସି ସ୍ତ୍ରୀଙ୍କ ସହ ଝଗଡ଼ା କରିଥିଲା । ବାପା ମା’ଙ୍କ ଝଗଡ଼ା ଦେଖି ଝିଅ ଜୟନ୍ତୀ(୧୪) ଓ ପୁଅ ନରସିଂହ (୯)ସେହି ଗ୍ରାମର ପିଉସୀ ଘରକୁ ଚାଲି ଯାଇଥିଲେ । ଜାନକୀ ଏକୁଟିଆ ଘରେ ଶୋଇଥିଲେ । ଏହାର ସୁଯୋଗରେ ଅଭିଯୁକ୍ତ ଏକ ଲୁହାରଡ୍ରେ ଜାନକୀଙ୍କ ବେକକୁ ମାଡ଼ି ବସି ହତ୍ୟା କରିଥିବା ପୁଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି ।ହତ୍ୟା କରିବା ପରେ ଗାଁ ପିଲାଙ୍କ ସହ ଜିରୋ ନାଇଟ୍ ପାଳନ କରିଥିଲା ଲକ୍ଷ୍ମଣ । ନିଶା ଛାଡ଼ିବା ପରେ ଭୋରରୁ ଘରକୁ ଯାଇ ଲକ୍ଷ୍ମଣ ଏକ ଅଟୋରେ ମୃତ ଜାନକୀଙ୍କୁ ଛତ୍ରପୁର ଡାକ୍ତରଖାନା ନେଇଥିଲେ । ମୃତଦେହ ଦେଖି ଡାକ୍ତର ହୁମା ଫାଣ୍ଡିକୁ ଜଣାଇଥିଲେ । ପୁଲିସ ଡାକ୍ତରଖାନାରେ ପହଞ୍ଚି ଶବ ଜବତ କରିବା ସହ ତଦନ୍ତ ତ୍ୱରାନ୍ୱିତ କରିଛି ।





