ଦାରିଙ୍ଗବାଡ଼ି, (ବାଘୁଆବାର୍ତ୍ତା): ପାଇଖାନା ଘରୁ ମୃତଦେହ ଉଦ୍ଧାର । ମୃତକ ନୟାଗଡ଼ ଜିଲ୍ଲା ଦଶପଲ୍ଲାର ରବିନ୍ଦ୍ର ନାଥ ବେହେରାଙ୍କ ପୁଅ ରାକେଶ ବେହେରା ବୋଲି ଜଣାପଡିଛି । ସେ ଆର୍କେଡ଼ି ନାମକ ଏକ ଠିକାସଂସ୍ଥାରେ ଇଞ୍ଜିନିୟର ଭାବେ କାର୍ୟ୍ୟ କରୁଥିଲେ । ଦାରିଙ୍ଗବାଡ଼ି ଲୋହରା ସାହିରେ ଘଟିଛି ଘଟଣା । ଖବର ଅନୁଯାୟୀ, ରାକେଶ କିଛି ଦିନ ହେଲା ଗାଁରୁ ଆସି କାର୍ୟ୍ୟରେ ଯୋଗଦେଇଥିଲେ । ଶନିବାର ସଂଧ୍ୟା ସମୟରେ ସେ ଆସିବା ପର ଠାରୁ ସକାଳ ଯାଏଁ ଘରୁ ବାହାରକୁ ବାହାରିନଥିଲେ । ତେବେ କୌଣସି କାରଣରୁ ଘରମାଲିକ ରାକେଶଙ୍କ ସହ କଥା ହେବାକୁ ଯାଇଥିଲେ । ହେଲେ ସେ କବାଟ ଖୋଲିନଥିଲେ କି ଉତ୍ତର ଦେଇନଥିଲେ । ଏହାର କିଛି ସମୟ ପରେ ପୁଣି ଡାକିଥିଲେ ହେଲେ ମଧ୍ୟ ଉତ୍ତର ନମିଳିବାରୁ ସାହିଲୋକ ମାନେ ଆସି କବାଟକୁ ବାଡେଇଥିଲେ । ଏହାପରେ ଥାନାକୁ ଖବର ଦିଆଯାଇଥିଲେ । ଥାନା ଅଧିକାରୀ ଆସିବା ପରେ ଅତିରିକ୍ତ ତହସିଲଦାରଙ୍କ ଉପସ୍ଥିତରେ ଘର କବାଟ ଭାଙ୍ଗିଥିଲେ । ରାକେଶ ଉଲଗ୍ନ ଅବସ୍ଥାରେ ପାଇଖାନାରେ ପଡ଼ିଥିବାର ଦେଖିଥିଲେ ଅଧିକାରୀ । ଏହାପରେ ଡାକ୍ତର ତାଙ୍କୁ ମୃତ୍ୟୁ ଘୋଷଣା କରିଥିଲେ । ମୃତଦେହକୁ ଜବତ କରି ଶବ ବ୍ୟବଚ୍ଛେଦ ପାଇଁ ପଠାଯାଇଛି । ରିପୋର୍ଟ ଆସିବା ପରେ ପ୍ରକୃତ ତଥ୍ୟ ସାମ୍ନାକୁ ଆସିବ । ଏହି ଘଟଣାରେ କେଶ ନଂ ୯/୨୦୨୧ ରେ ରୁଜୁକରି ତଦନ୍ତ ଚଳାଇଥିବା ସୂଚନା ଦେଇଛନ୍ତି ।
