ଦେବଗଡ଼, (ବାଘୁଆବାର୍ତ୍ତା): ଦେବଗଡ଼ ଜିଲ୍ଲା କୁଣ୍ଢେଇଗୋଳା ଥାନା ଅଧୀନ ତୁଟାବାରୀ ଗାଁ ପାଖରେ ଜଙ୍ଗଲରୁ ଜଣେ ମହିଳାଙ୍କ ରକ୍ତାକ୍ତ ମୃତ ଦେହ ଉଦ୍ଧାର ହୋଇଛି। ମୃତ ମହିଳାଙ୍କ ପରିଚୟ ମିନତୀ ଓରଫ ଦେବକୀ ନାଏକ। ସେ ତୁଟାବାରୀ ଗାଁର ବାଳକୃଷ୍ଣ ନାଏକଙ୍କ ସ୍ତ୍ରୀ। ମିନତୀଙ୍କୁ ଟାଙ୍ଗିଆରେ ହାଣି ହତ୍ୟା ପରେ ପଥରରେ ଛେଚି ଦିଆଯାଇଥିବା ସନ୍ଦେହ କରାଯାଇଛି। ମୃତକଙ୍କ ରକ୍ତ ଜୁଡୁବୁଡୁ ଶବ ଗାଁ ପାଖରେ ଥିବା ଜଙ୍ଗଲରେ ପଡିଥିବା ଦେଖି ସ୍ଥାନୀୟ ବାସିନ୍ଦା ଗାଆଁରେ ଜଣାଇଥିଲେ। ଖବରପାଇ କୁଣ୍ଢେଇଗୋଳା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ଦେବଗଡ଼ ଏସଡିପିଓ ଅନୀଲ କୁମାର ବେଉରା ଘଟଣାସ୍ଥଳରେ ପହଞ୍ଚିଛନ୍ତି। ସେପଟେ ମୃତ ମହିଳାଙ୍କ ସ୍ବାମୀ ବାଳକୃଷ୍ଣ ନାୟକ ଫେରାର ଥିବା ଜଣା ପଡ଼ିଛି। ଶବ ଉଦ୍ଧାର କରି ପୋଲିସ ବ୍ୟବଛେଦ ପାଇଁ ଡାକ୍ତରଖାନାକୁ ପଠାଇଛି।





