ଭଦ୍ରକ, (ବାଘୁଆବାର୍ତ୍ତା): ବହୁ ଚର୍ଚ୍ଚିତ ମାନସ ସ୍ୱାଇଁ ହତ୍ୟା ମାମଲାରେ ମଙ୍ଗଳବାର କ୍ରାଇମବ୍ରାଞ୍ଚ ଦ୍ୱାରା ଗିରଫ ହୋଇ ଜେଲରେ ଥିବା ୬ଜଣ ଅଭିଯୁକ୍ତଙ୍କୁ କଡ଼ା ସୁରକ୍ଷା ବଳୟ ମଧ୍ୟରେ ଜେଲରୁ ଅଣାଯାଇ ଭଦ୍ରକ ଜିଲ୍ଲା ଜଜଙ୍କ କୋର୍ଟରେ ହାଜର କରାଯାଇଥିଲା । କ୍ରାଇମବ୍ରାଞ୍ଚ ଦ୍ୱାରା ଦାଖଲ ହୋଇଥିବା ଚାର୍ଜସିଟ ଅନୁଯାୟୀ ସମସ୍ତ ଦଫାରେ ସବୁ ଅଭିଯୁକ୍ତିଙ୍କୁ ଚାର୍ଜଫ୍ରେମ କରାଯାଇଛି । ପ୍ରକାଶ ଯୋଗ୍ୟ, କ୍ୟାମେରାମ୍ୟାନ ମାନସ ସ୍ୱାଇଁକୁ ଚାନ୍ଦବାଲି ପଳାସପୁର ଗ୍ରାମରୁ ଅପହରଣ କରିନେଇ ଭୁବନେଶ୍ୱର ଦୟାଲ ଆଶ୍ରମରେ ନିର୍ୟାତନା ଦିଆଯାଇ ହତ୍ୟା କରାଯାଇଥିଲା । ପରେ ତାଙ୍କ ମୃତ ଶରୀର ନୟାଗଡ଼ରୁ ନିକଟରୁ ମିଳିଥିଲା । ପ୍ରଥମେ ଚାନ୍ଦବାଲି ପୁଲିସ ଏକ ମାମଲା ରୁଜ୍ଜୁ କରିଥିଲେ ମଧ୍ୟ ମାମଲାର ଗୁରୁତ୍ୱ ଦୃଷ୍ଟିରୁ ସରକାର ଏହାକୁ କ୍ରାଇମବ୍ରାଞ୍ଚକୁ ହସ୍ତାନ୍ତର କରିଥିଲେ । ତଦନ୍ତ ସମୟରେ ମୁଖ୍ୟ ଅଭିଯୁକ୍ତ ସମ୍ପୂର୍ଣ୍ଣ ନିଉଜର ମାଲିକାଣି ଶର୍ମିଷ୍ଠା ରାଉତଙ୍କୁ ଗିରଫ କରିଥିଲା । ତାଙ୍କ ବୟାନ ଆଧାରରେ ସହଯୋଗୀ ଝୁନା ଭୋଇ, କୃଷ୍ଣଚନ୍ଦ୍ର ନାୟକ, ନିରଞ୍ଜନ ସେଠୀ, ଭାଗ୍ୟଧର ନାୟକ, ରଂଜନ କୁମାର ନାୟକଙ୍କୁ ଗିରଫ କରାଯାଇଥିଲା । ଘଟଣାର ତଦନ୍ତ କରି କ୍ରାଇମବ୍ରାଞ୍ଚ ଚାନ୍ଦବାଲି ପ୍ରଥମ ଶ୍ରେଣୀ ବିଚାର ବିଭାଗୀୟ ମାଜିଷ୍ଟ୍ରେଟଙ୍କ ନିକଟରେ ଦାଖଲ କରିବା ପରେ ଚଳିତ ମାସ ୮ ତାରିଖ ଏହା ଜିଲ୍ଲାଜଜ୍ କୋର୍ଟକୁ ସ୍ଥାନାନ୍ତର ହୋଇ ଏସଟି ନଂ ୪୭୮୯/୨୨ ମୂଳେ ଚାର୍ଜଫ୍ରେମ କରିବାକୁ ଆଜିର ତାରିଖକୁ ଧାର୍ୟ୍ୟ ହୋଇଥିଲା । ଇତି ମଧ୍ୟରେ ଅନ୍ୟତମ ଅଭିଯୁକ୍ତ ପରମେଶ୍ୱର ରାଉତଙ୍କୁ ଉଚ୍ଚ ନ୍ୟାୟାଳୟ ଜାମିନ ଦେଇ ସାରିଥିବାରୁ, ମାନସ ହତ୍ୟା ମାମଲାରେ ତାଙ୍କର କୌଣସି ସଂପୃକ୍ତି ନଥିବା ଦର୍ଶାଇ ଓ ପୁଲିସ ଆଗରେ ମାନିଥିବା ଦୋଷ ଆଇନ ଅନୁଯାୟୀ ଗ୍ରହଣ ଯୋଗ୍ୟ ହୋଇନଥିବାରୁ ତାଙ୍କୁ ମଧ୍ୟ ଜାମିନ ପ୍ରଦାନ କରିବାକୁ ଝୁନା ଭୋଇ କୋର୍ଟରେ ପ୍ରାର୍ଥନା କରିଥିଲେ । ମାନସର ମୋବାଇଲ, ଚିପ୍ସ ଓ କ୍ୟାମେରା ଝୁନା ନିକଟରୁ ମିଳିଛି ଓ ସେ ଏହି ଘଟଣାରେ ପ୍ରତ୍ୟେକ୍ଷ ଭାବେ ସଂପୃକ୍ତ ଅଛନ୍ତି ବୋଲି ପବ୍ଲିକ ପ୍ରସିକ୍ୟୁଟର କୋର୍ଟରେ ଯୁକ୍ତି କରିବା ପରେ ତାଙ୍କ ଜାମିନ ଆବେଦନ ଖାରଜ ହୋଇ ଯାଇଥିଲା । ଏହାପରେ ଝୁନା ଭୋଇ ହାଇକୋର୍ଟରେ ଜାମିନ ଆବେଦନ କରିଛନ୍ତି । ଚାର୍ଜଫ୍ରେମ ହୋଇ ସାରିଥିବାରୁ ଆସନ୍ତା ତାରିଖରେ କ୍ରାଇମବ୍ରାଞ୍ଚ ପକ୍ଷରୁ ଦିଆଯାଇଥିବା ସାକ୍ଷୀ ତାଲିକା ମୁତାବକ ସାକ୍ଷୀମାନେ କୋର୍ଟରେ ସେମାନଙ୍କ ବୟାନ ଦେବେ ବୋଲି ଜଣାପଡ଼ିଛି ।





