ପୁରୀ, (ବାଘୁଆବାର୍ତ୍ତା): ନମ୍ବରବିହୀନ କାର୍ରେ ବୁଲୁଥିଲା । କାର୍ର କାଗଜପତ୍ର ବି ଠିକ୍ ନଥିଲା । ସାଙ୍ଗରେ ଏକାଧିକ ମୋବାଇଲ୍ ସହ ବନ୍ଧୁକ, ଗୁଳି ବି ରଖୁଥିଲା । ସମ୍ବଲପୁରରୁ ପୁରୀକୁ ନିୟମିତ ଭାବେ ଯାତାୟାତ କରୁଥିବାବେଳେ ଧରିଲା ପୁଲିସ । ଏକ ମାମଲା ରୁଜୁ କରି ବଳିଆପଣ୍ଡା ଥାନା ପୁଲିସ ପୁରୀକୁ ଆସିଥିବା ଏହି ଯୁବକକୁ ଗିରଫ କରିଛି । ହେଲେ ସେ କେଉଁ କାରବାରରେ ଲିପ୍ତ ଥିଲା ତାହା ଏବେ ରହସ୍ୟରେ ରହି ଯାଇଛି । ଗିରଫ ଯୁବକ ଜଣକ ସମ୍ବଲପୁର ଜିଲ୍ଲା ଅଇଁଠାପାଲିରେ ରହୁଥିବା ସୁନ୍ଦରଗଡ ଟାଉନ୍ ଥାନା ଅଧୀନ ମିଶନ୍ ଛକର ଚନ୍ଦନ ଯୋଶୀ (୪୨) ବୋଲି ଜଣାପଡିଛି । ମାମଲାରେ ପୁଲିସ ନମ୍ବର ବିହୀନ କାର୍, ଅବଧି ସରିଯାଇଥିବା ଇନ୍ସ୍ୟୁରାନ୍ସ ପେପର, ଦେଶୀ ବନ୍ଧୁକ, ୪ଟି ଗୁଳି ଭର୍ତ୍ତି ମ୍ୟାଗଜିନ୍, ୪ଟି ମୋବାଇଲ୍ ଫୋନ୍, ୨ଟି ନମ୍ବର ପ୍ଲେଟ୍ (ଓଡି-୧୬ଏ-୦୦୦୧), ଏକ ଆଧାର କାର୍ଡ ଓ କାର୍ର ମାନୁଆଲ୍ ବୁକ୍ ଜବତ କରିଛି । ପୁଲିସ କହିଛି ଯେ, ଗତ ୨୦୨୦ ମସିହା ଜୁଲାଇ ୧୮ ତାରିଖ ରାତି ୯ଟାରେ କ୍ରିଷ୍ଣା ସି ସାଇଟ୍ ପାର୍କିଂ ସ୍ଥଳ ୧୦ ନମ୍ବର ବ୍ଲକ୍ରେ ଏହି ନମ୍ବର ବିହୀନ ଧଳା କାର୍ ଥିବା ଖବର ମିଳିଥିଲା । ପୁଲିସ ସେଠାରେ ପହଞ୍ଚି କାର୍ ଯାଞ୍ଚ କରିବାବେଳେ ସେଥିରୁ ବନ୍ଧୁକ, ଗୁଳି ସହ ମାନୁଆଲ୍ ବୁକ୍ ଓ ଇନ୍ସ୍ୟୁରାନ୍ସ ପେପର ମିଳିଥିଲା । ଏଥିରେ ୨୦୧୭ ମସିହା ମାର୍ଚ୍ଚ ୨୪ରୁ ୨୦୧୮ ମାର୍ଚ୍ଚ ୨୩ ଯାଏଁ ବୀମା ଅବଧି ଥିବା ଜଣାପଡିଥିଲା । ଏଥିରୁ କାର୍ ମାଲିକ ଚନ୍ଦନ ବୋଲି ଜଣାପଡିଥିଲା । ହେଲେ ସେହି ସମୟରେ ଚନ୍ଦନ ଚତୁରତାର ସହ ଖସି ଯାଇଥିଲା । କାର୍ ସହ ଏହି ସମସ୍ତ ଜିନିଷ ଥାନାକୁ ଆଣିଥିଲା ପୁଲିସ । ଏନେଇ ଆର୍ମସ୍ ଆକ୍ଟ ୨୫ (୧) (ଏ)ରେ ମାମଲା (୭୩/୨୦) ରୁଜୁ କରିଥିଲା । ମାମଲାର ତଦନ୍ତ ଚାଲିଥିବାବେଳେ ଚନ୍ଦନ କିନ୍ତୁ ବାରମ୍ବାର ପୁରୀ ଆସୁଥିଲା । ଏହି ଖବର ପାଇଥିଲା ବଳିଆପଣ୍ଡା ଥାନା ପୁଲିସ । ବୁଧବାର ରାତିରେ ଚନ୍ଦନ ପୁରୀ ସିଟି ରୋଡ ସ୍ଥିତ ଏକ ହୋଟେଲ୍ରେ ଥିବା ଖବର ପାଇଥିଲେ ଆଇଆଇସି କୁଳମଣି ସେଠୀ । ଚଢ଼ଉ କରି ତାକୁ ଗିରଫ କରିଥିଲେ । ତା’ ପାଖରୁ ଏହି ୪ଟି ମୋବାଇଲ୍ ମିଳିଥିଲା । ସେ ପୁଲିସକୁ କହିଛି ଯେ ସେ କୁଆଡେ ମେଡିସିନ୍ ବ୍ୟବସାୟ କରୁଛି । ହେଲେ ଏହାକୁ ବିଶ୍ୱାସ କରିନି ପୁଲିସ । ଇନ୍ସ୍ୟୁରାନ୍ସ ନଥିବା ନମ୍ବରବିହୀନ କାର୍ରେ ବୁଲିବା, ବନ୍ଧୁକ ଓ ଗୁଳି ରଖିବା, ଏକାଧିକ ମୋବାଇଲ୍ ବ୍ୟବହାର କରିବା ଏବଂ ପୁରୀକୁ ନିୟମିତ ଆସିବା ଘଟଣା ପଛରେ କିଛି ନା କିଛି ଅପରାଧିକ କାର୍ୟ୍ୟକଳାପରେ ଚନ୍ଦନ ଲିପ୍ତ ଥିବା ପୁଲିସ ସନ୍ଦେହ କରିଛି । ହେଲେ କୌଣସି ଟେର୍ ପାଇ ନଥିବା କହିଛନ୍ତି ଆଇଆଇସି ଶ୍ରୀ ସେଠୀ । ଗିରଫ ପରେ ତାକୁ ଗୁରୁବାର କୋର୍ଟ ଚାଲାଣ କରାଯାଇଛି । ଜାମିନ ନାମଞ୍ଜୁର ହେବାରୁ ତାକୁ ଜେଲ୍ ପଠାଇ ଦିଆଯାଇଛି ।
