ରାଜସ୍ବ ନିରୀକ୍ଷକଙ୍କୁ ମାଡ଼ ମାରି ଅପହରଣ ଅଭିଯୋଗରେ ଜଣେ ଗିରଫ

ଚଣ୍ଡିଖୋଲ, (ବାଘୁଆବାର୍ତ୍ତା): ରାଜସ୍ବ ନିରୀକ୍ଷକଙ୍କୁ ମାଡ଼ମାରି ଅପହରଣ ଅଭିଯୋଗରେ ବାଲିଚନ୍ଦ୍ରପୁର ପୋଲିସ ଜଣଙ୍କୁ ଗିରଫ କରିଛି । ସୂଚନା ଅନୁଯାୟୀ ଯାଜପୁର ଜିଲ୍ଲା ଦର୍ପଣ ତହସିଲ ଅଧୀନ ବନ୍ଦରେଶ୍ୱର ରାଜସ୍ବ ନିରୀକ୍ଷକ ସୋମନାଥ ସାମଲଙ୍କୁ ତାଙ୍କ କାର୍ୟ୍ୟାଳୟରେ ସ୍ଥାନୀୟ ବିକ୍ରମତୀରଣ ଗ୍ରାମର ଅନନ୍ତ ନାରାୟଣ ଧଳ ମାଡ଼ ମାରିବା ସହ ଅପହରଣ କରି ନେଇଥିବା ଅଭିଯୋଗ ହୋଇଛି । ଏକ ଉତ୍ତରାଧିକାରୀ ପ୍ରମାଣ ପତ୍ର ରିପୋର୍ଟକୁ ବେନିୟମ ଭାବେ ପରିବର୍ତ୍ତନ କରିବା ପାଇଁ ରାଜସ୍ବ ନିରୀକ୍ଷକଙ୍କୁ କହି ଆସୁଥିବା ବେଳେ ଏନେଇ ରାଜସ୍ବ ନିରୀକ୍ଷକ ମନା କରିବାରୁ ଅଫିସ କାର୍ୟ୍ୟଳୟରେ ପଶି ରାଜସ୍ବ ନିରୀକ୍ଷକଙ୍କୁ ମାଡ଼ ମାରି ଅପହରଣ କରି ନେଇଥିଲେ । ଏ ନେଇ ରାଜସ୍ବ ନିରୀକ୍ଷକ ବାଲିଚନ୍ଦ୍ରପୁର ଥାନାରେ ଲିଖିତ ଅଭିଯୋଗ କରିବା ପରେ ବାଲିଚନ୍ଦ୍ରପୁର ପୋଲିସ ଅନନ୍ତ ନାରାୟଣ ଧଳଙ୍କୁ ଗିରଫ କରିଛି । ପୂର୍ବରୁ ଅନନ୍ତ ନାରାୟଣ ଧଳଙ୍କ ନାମରେ ବାଲିଚନ୍ଦ୍ରପୁର ଥାନାରେ ଅପରାଧିକ ମାମଲା ରହିଛି । ଏନେଇ ବାଲିଚନ୍ଦ୍ରପୁର ଥାନା ପୋଲିସ ଘଟଣାର ଅଧିକ ତଦନ୍ତ ଚଳାଇଛି ।