ଭୁବନେଶ୍ୱର, (ବାଘୁଆବାର୍ତ୍ତା): ବିବାହର ପ୍ରତିଶ୍ରୁତି ଦେଇ ୧୦ ରାଜ୍ୟର ୧୦୦ରୁ ଅଧିକ ଯୁବତୀଙ୍କ ଠାରୁ ଲକ୍ଷ ଲକ୍ଷ ଟଙ୍କା ଲୁଟିଥିବା କୁଖ୍ୟାତ ଠକକୁ ଗିରଫ କରିଛି ଦିଲ୍ଳୀ ପୁଲିସ୍ । ସେ ହେଲେ କେନ୍ଦୁଝରର ଫରହାନ୍ ତସିର ଖାନ୍ (୩୫) । ୨ ମାସ ହେବ ତାକୁ ପୁଲିସ ଖୋଜୁଥିଲା । ଗୁରୁବାର ରାତିରେ ଦିଲ୍ଳୀ ପାହାଡ଼ଗଞ୍ଜର ଏକ ହୋଟେଲ୍ରୁ ପୁଲିସ ତାକୁ ଗିରଫ କରିଥିଲା । ବହୁ ବିବାହ କ୍ଷେତ୍ରରେ ନକଲି ଡାକ୍ତର ରମେଶ ସ୍ୱାଇଁଙ୍କ କଳା କାରନାମା ଲୋକଙ୍କ ମନରୁ ନ ଲିଭୁଣୁ ଏବେ ଫରହାନ୍ର କାରନାମା ବେଶ୍ ଚର୍ଚ୍ଚାର ବିଷୟ ହୋଇଛି । ଫରହାନ୍ ବିବାହିତ । ପରିବାରରେ ପତ୍ନୀ ଓ ଗୋଟିଏ ସନ୍ତାନ ଅଛନ୍ତି । ଦେଢ଼ ବର୍ଷ ତଳେ ଫରହାନ୍ ମୁଣ୍ଡରେ ଠକେଇର ନୂଆ ଆଇଡିଆ ପଶିଥିଲା । ସେ ମାଟ୍ରିମୋନିଆଲ୍ ସାଇଟ୍ରେ ବିଭିନ୍ନ ନାମରେ ଅନେକ ଆକାଉଣ୍ଟ୍ ଖୋଲିଥିଲା । ଦାମୀ ଗାଡ଼ି ସମ୍ମୁଖରେ ଠିଆ ହୋଇ ନିଜ ପ୍ରୋଫାଇଲ୍ ଫଟୋ ରଖି ନିଜକୁ ବ୍ୟବସାୟୀ ବୋଲି ପରିଚୟ ଦେଇଥିଲା । ତା ପ୍ରୋଫାଇଲ୍କୁ ପସନ୍ଦ କରୁଥିବା ଯୁବତୀଙ୍କ ସହ ଫରହାନ ଫୋନ୍ରେ କଥା ହେଉଥିଲେ । ବିବାହ ପ୍ରଲୋଭନ ଦେଖାଇ ପ୍ରଥମେ ବିଭିନ୍ନ ଲୋଭନୀୟ ଗିଫ୍ଟ ଦେଉଥିଲା । ତା’ପରେ ମଉକା ଦେଖି ତାଙ୍କ ଠାରୁ ଲକ୍ଷ ଲକ୍ଷ ଟଙ୍କା ଠକେଇ କରୁଥିଲା । ଏମିତି ଢଙ୍ଗରେ ସେ ଓଡ଼ିଶା ସମେତ ଉତ୍ତରପ୍ରଦେଶ, ବିହାର, ପଶ୍ଚିମବଙ୍ଗ, ଗୁଜରାଟ୍, ଦିଲ୍ଳୀ, ପଞ୍ଜାବ, ମୁମ୍ବାଇ ଓ କର୍ଣ୍ଣାଟକର ୧୦୦ ଜଣଯୁବତୀଙ୍କ ଠାରୁ ଅଢ଼େଇ କୋଟିରୁ ଅଧିକ ଟଙ୍କା ଚୂନ ଲଗାଇଛି । ଏନେଇ ବିଭିନ୍ନ ରାଜ୍ୟର ଥାନାରେ ଅଭିଯୋଗ ହୋଇଛି । ହେଲେ ବାରମ୍ବାର ଫରହାନ୍ ଫୋନ୍ ନମ୍ବର ବଦଳାଉ ଥିବାରୁ ତାକୁ ଧରିବା ପୁଲିସ୍ ପାଇଁ କଷ୍ଟ ହେଉଥିଲା । କିଛି ଦିନ ତଳେ ଦିଲ୍ଳୀ ଏମସ୍ର ଜଣେ ମହିଳା ଡାକ୍ତର ଫରହାନ୍କୁ ମାଟ୍ରିମନିଆଲ୍ ସାଇଟ୍ରେ ପସନ୍ଦ କରିଥିଲେ । ବିବାହ ପାଇଁ ତାରିଖ ଠିକ୍ ହୋଇଥିଲା । ଫରହାନ୍ ତାଙ୍କୁ କହିଥିଲା ସେ ଚେନ୍ନାଇରେ ରହୁଛନ୍ତି । ବାହାଘର ପାଇଁ ସୁନା କିଣିବାକୁ କହି ଡାକ୍ତରଙ୍କ ଠାରୁ ଫରହାନ୍ ୧୫ ଲକ୍ଷ ଟଙ୍କା ଆଣିଥିଲା । ତା’ପରେ ଫୋନ୍ ବନ୍ଦ କରି ଫେରାର ହୋଇ ଯାଇଥିଲା । ଏହାପରେ ମହିଳା ଡାକ୍ତର ଦିଲ୍ଲୀ ପାହାଡ଼ଗଞ୍ଜ ଥାନାରେ ଏତଲା ଦେଇଥିଲେ । ହେଲେ ପୁଲିସ୍ ତାଙ୍କୁ ଧରିବାରେ ଫେଲ୍ ମାରିଥିଲା । ମାର୍ଚ୍ଚ ମାସରେ କୋଲକାତା ବାବୁଘାଟ ଥାନାଞ୍ଚଳରେ ମଧ୍ୟ ଜଣେ ଯୁବତୀଙ୍କଠୁ ୫ ଲକ୍ଷ ଠକେଇ କରିଥିବା ଥାନାରେ ଏତଲା ହୋଇଥିଲା । ବୁଧବାର କୋଲକାତା ପୁଲିସ୍ ଫରହାନ୍ ବିଷୟରେ ଖବର ପାଇ ତାକୁ ଧରିବାକୁ ଯୋଜନା କରିଥିଲା । ସେ ସେଠାରୁ ବିମାନରେ ଖସି ଦିଲ୍ଳୀ ପଳାଇଥିଲା । କୋଲକାତା ପୁଲିସ୍ ଦିଲ୍ଳୀ ପୁଲିସ୍ ସହ ଯୋଗାଯୋଗ କରି ପାହାଡଗଞ୍ଜର ଏକ ହୋଟେଲ୍ରେ ଚଢ଼ଉ କରି ତାକୁ ଗିରଫ କରିଥିଲା । ତା’ଠାରୁ ୫ଟି ମୋବାଇଲ, ୨୦ରୁ ଅଧିକ ସିମ୍ କାର୍ଡ, ୪ଟି ଏଟିଏମ୍ କାର୍ଡ ଜବତ କରି ପୁଲିସ ଘଟଣାର ଅଧିକ ତଦନ୍ତ ଜାରି ରଖିଛି।
ମାଟ୍ରିମୋନିଆଲ୍ ସାଇଟ୍ର ଆଉ ଜଣେ କୁଖ୍ୟାତ ଠକ: ବାହା ହେବାକୁ କହି ୧୦୦ରୁ ଅଧିକ ଯୁବତୀଙ୍କୁ ଲୁଟ୍
