ବଲାଙ୍ଗିର/କଣ୍ଟାବାଞ୍ଜି, (ବାଘୁଆବାର୍ତ୍ତା): ଚାଷୀଙ୍କ ସ୍ୱାର୍ଥକୁ ଦୃଷ୍ଟିରେ ରଖି ପ୍ରଣୟନ କରାଯାଇଥିବା ପ୍ରଧାନମନ୍ତ୍ରୀ କୃଷି ବୀମା ଯୋଜନା ଉପରେ ପଡ଼ିଛି ନକଲି ଚାଷୀଙ୍କ ଆଖି। ଜମିରେ ଝାଳ ବୁହାଇ ଫସଲ ଅମଳ କରୁଥିବା ଚାଷୀ ଚାଷ ଉଜୁଡ଼ି ଗଲେ ମୁଣ୍ଡରେ ହାତ ଦେଉଥିବା ବେଳେ ବୀମା କରି ନକଲି ଚାଷୀ କିନ୍ତୁ ମାଲେମାଲ ହେଉଛନ୍ତି। ଚାଷୀଙ୍କ କୃଷି ବୀମାକୁ ନିଜ ନାଁରେ କରି ଏପରି ଲୁଟ୍ କରି ଚାଲିଛନ୍ତି ଦଲାଲ ଓ ଏଜେଣ୍ଟ । ଏପରି ସାଂଘାତିକ ଚଞ୍ଚକତା ବଲାଙ୍ଗିର ଜିଲ୍ଲା କଣ୍ଟାବାଞ୍ଜିରେ ହୋଇଥିବା ନଜରକୁ ଆସିଛି। ଏନେଇ ବାରମ୍ବାର କୃଷି ବିଭାଗ ଓ ଜିଲ୍ଲା ପ୍ରଶାସନ ପାଖକୁ ଦୌଡ଼ି ଦୌଡ଼ି ନୟାନ୍ତ ହେବା ପରେ ଥାନାରେ ପହଞ୍ଚିଥିଲେ ଚାଷୀ । ଏହାପରେ ଜଣଙ୍କ ପରେ ଜଣେ ନକଲି ଚାଷୀ, ଦଲାଲ ଓ ଏଜେଣ୍ଟଙ୍କୁ ମିଶାଇ ସମୁଦାୟ ୧୦ ଜଣଙ୍କୁ ଗିରଫ କରିଛି ପୁଲିସ୍ । ନକଲି ଚାଷୀମାନେ ଅସଲି ଚାଷୀଙ୍କୁ ଚକମା ଦେଇ ସେମାନଙ୍କ କୃଷି ବୀମା ହଡ଼ପ କରିବା ଅଭିଯୋଗ ହେବା ପରେ ବେଳପଡା, କଣ୍ଟାବାଞ୍ଜି, ଖପ୍ରାଖୋଲ, ବଙ୍ଗମୁଣ୍ଡା ଅଂଚଳରୁ ୧୦ ଜଣ ନକଲି ଚାଷୀଙ୍କୁ ଗିରଫ କରିଛି ପୁଲିସ୍। ଗିରଫ ତାଲିକାରେ କେବଳ ଚାଷୀ ନାହାନ୍ତି, କମନ୍ ସର୍ଭିସ ସେଣ୍ଟର ମାଲିକ ବି ରହିଛନ୍ତି।
