ଭୁବନେଶ୍ୱର/ରାଉରକେଲା, (ବାଘୁଆବାର୍ତ୍ତା): ଇନ୍ଫୋସିଟି ଥାନା ଅଞ୍ଚଳର ଏକ ଘରୋଇ ବିଶ୍ୱବିଦ୍ୟାଳୟରେ ଚାଲିଥିବା କ୍ରୀଡ଼ା ପ୍ରତିଯୋଗିତା ବଦନାମ ମୁଣ୍ଡାଇଛି । ଇଭେଣ୍ଟ ବେଳେ ଜଣେ ନାବାଳକ ଖେଳାଳିକୁ ଯୌନ ନିର୍ୟାତନା ଦିଆଯାଇଥିବା ଅଭିଯୋଗ ସାମ୍ନାକୁ ଆସିଛି । ଲଙ୍ଗ୍ ଜମ୍ପ ଇଭେଣ୍ଟରେ ଖରାପ ପ୍ରଦର୍ଶନ ଯୋଗୁଁ ସଂପୃକ୍ତ ନାବାଳକ ଖେଳାଳିଙ୍କ ଗୁପ୍ତାଙ୍ଗରେ ଅମୃତାଞ୍ଜନ ଲଗାଇ ଦେଇଥିଲେ । ନାବାଳକ ଭୋଗୁଥିବା ଯନ୍ତ୍ରଣାର ଦୃଶ୍ୟକୁ ଭିଡିଓ କରି ଭାଇରାଲ୍ କରିଥିବା ଅଭିଯୋଗ ହୋଇଛି । ଇନ୍ଫୋସିଟି ଥାନା ପୁଲିସ ନଶୁଣିବାରୁ ନାବାଳକର ବାପା’ମା ସୋମବାର ଡିସିପିଙ୍କ ଦ୍ୱାରସ୍ଥ ହୋଇଥିଲେ । ଏହାପରେ ପୁଲିସ ତତ୍ପର ହୋଇ ୩ଜଣଙ୍କୁ ଗିରଫ କରିଛି । ସେମାନେ ହେଲେ ଆଶିଷ ପାତ୍ର, ଜଗନ୍ନାଥ ଦାସ ଓ ସୁରଜ ଠାକୁର । ଆଶିଷ ହେଉଛନ୍ତି ପୀଡି଼ତଙ୍କ ଲଙ୍ଗ ଜମ୍ପ କୋଚ୍ । ସେ କୋରାପୁଟରେ ଡାକ ବିଭାଗର କର୍ମଚାରୀ । ଅଭିଯୁକ୍ତମାନଙ୍କ ବିରୋଧରେ ଆଇପିସି ଦଫା ୩୪୨ (ଅନାଯ୍ୟ ଅବରୋଧ), ୩୨୩ (ସ୍ୱେଚ୍ଛାରେ ଆଘାତ ଦେବା), ୫୦୬ (ଅପରାଧିକ ଭୟ ପ୍ରଦର୍ଶନ), ୩୪ (ଏକାଧିକ ଅଭିଯୁକ୍ତଙ୍କ ସମ୍ପୃକ୍ତି) ସହ ଆଇଟି ଆକ୍ଟ ସେକ୍ସନ ୬୭ ଓ ଜୁଭେନାଇଲ ଜଷ୍ଟିସ ଆକ୍ଟ ସେକ୍ସନ ୭୫ ଲଗାଯାଇଛି । ସୂଚନା ମୁତାବକ, ପୀଡ଼ିତ ଆଥଲେଟ୍ଙ୍କ ଘର ରାଉରକେଲା ଅଞ୍ଚଳରେ । ସେ ଦଶମ ଶ୍ରେଣୀର ଛାତ୍ର । ତାଙ୍କ ବାପା ଓ ମା’ ଉଭୟେ ରାଉରକେଲା ରିଜର୍ଭ ପୁଲିସରେ ହାବିଲଦାର ଭାବେ କାର୍ୟ୍ୟରତ ।ଗତ ୮ ତାରିଖରୁ ୧୦ ତାରିଖ ପର୍ୟ୍ୟନ୍ତ ଭୁବନେଶ୍ୱରରେ ରାଜ୍ୟ ଆଥଲେଟିକ୍ ମିଟ୍ ଚାଲିଥିଲା । ରାଉରକେଲା ଷ୍ଟିଲ୍ ପ୍ଲାଣ୍ଟ ପକ୍ଷରୁ ପୀଡି଼ତ ଓ ଅଭିଯୁକ୍ତଙ୍କ ସମେତ ୧୫ ଜଣିଆ ଟିମ୍ ଆଥ୍ଲେଟ୍ ମିଟ୍ରେ ଭାଗ ନେଇଥିଲେ । ଲଙ୍ଗ ଜମ୍ପ ଇଭେଣ୍ଟରେ ଭାଗ ନେଇଥିବା ସଂପୃକ୍ତ ନାବାଳକ ପ୍ରଥମଥର ପାଇଁ ଆଥ୍ଲେଟ ମିଟ୍ରେ ଭାଗ ନେଇଥିଲା । ୯ ତାରିଖରେ ଇଭେଣ୍ଟ ସରିବା ପରେ ତାଙ୍କ ଉପରେ ଯୌନ ନିର୍ୟାତନା ଆରମ୍ଭ ହୋଇଥିଲା । ନାବାଳକର ବାପା’ମା ଗଣମାଧ୍ୟମକୁ କହିଛନ୍ତି, ଲଙ୍ଗ ଜମ୍ପ୍ ଇଭେଣ୍ଟରେ ପୁଅ ଭଲ ପ୍ରଦର୍ଶନ କରି ପାରିଲାନି । ଇଭେଣ୍ଟ ପରେ ସିନିୟରମାନେ ତାକୁ ଡାକି ଖରାପ ଭାଷାରେ ଗାଳିଗୁଲଜ କରିଥିଲେ । କିନ୍ତୁ ରବିବାର ରାତିରେ ନିର୍ୟାତନାର ସୀମା ଟପିଥିଲା । ସେହି ରାତିରେ ଷ୍ଟିଲ୍ପ୍ଲାଣ୍ଟର କୋଚ୍ ପଞ୍ଚାୟତ ଗନ୍ତାୟତଙ୍କ ରୁମ୍ରେ ଏକ ବାର୍ଥ ଡେ’ ପାର୍ଟି ଚାଲିଥିଲା । ଅଭିଯୁକ୍ତ ଆଶିଷ, ଜଗନ୍ନାଥ, ସୁରଜଙ୍କ ସହ ଷ୍ଟିଲ୍ ପ୍ଲାଣ୍ଟ ଟିମ୍ ମ୍ୟାନେଜର ବିକ୍ରମ ମାଝି ଓ ଅନ୍ୟ ଏକ ଜଣେ କର୍ମଚାରୀ ପ୍ରସନ୍ନ ଠାକୁର ଉକ୍ତ ପାର୍ଟିରେ ଉପସ୍ଥିତ ଥିଲେ । ସମସ୍ତେ ପ୍ରଚୁର ମଦ ପିଇବା ପରେ ନାବାଳକକୁ ରୁମ୍କୁ ଡକାଯାଇଥିଲା । ରାତି ସାଢେ ୮ଟାରୁ ସାଢେ ୯ଟା ଯାଏଁ ଜବରଦସ୍ତି ଅଟକାଇ ରଖିଥିଲେ । ଖରାପ ପ୍ରଦର୍ଶନ ପାଇଁ ସୁମନକୁ ପ୍ରଥମେ ଆଣ୍ଠୁଆ ବସାଇଥିଲେ । ପରେ ସମ୍ପୂର୍ଣ୍ଣ ନିବସ୍ତ୍ର କଲେ । ନିର୍ୟାତନା ଏତିକିରେ ସରିନଥିଲା । ନାବାଳକର ଗୁପ୍ତାଙ୍ଗରେ ଅମୃତାଞ୍ଜନ ବୋଳିଦେଲେ । ଫଳରେ ଭୀଷଣ ଯନ୍ତ୍ରଣାରେ ନାବାଳକ ଛାଟିପିଟି ହେବାକୁ ଲାଗିଲେ । ସିନିଅରମାନେ ସେମାନଙ୍କ ମୋବାଇଲ୍ରେ ଏହି ଦୃଶ୍ୟର ଭିଡିଓ ବନାଇଥିଲେ । ଏମିତିକି ଅଭିଯୁକ୍ତମାନେ ଭିଡିଓ କଲ କରି ସେମାନଙ୍କ ୨-୩ଜଣ ସାଙ୍ଗଙ୍କୁ ଏହି ଦୃଶ୍ୟ ଦେଖାଇଥିଲେ । ଏମିତି ନିର୍ୟାତନା ପରେ ନାବାଳକ ତା’ ମା’ଙ୍କୁ ଫୋନ୍ କରି ଢେର୍ କାନ୍ଦିଥିଲା । କହିଥିଲା, ମା’ଟ୍ଟ ଏମାନେ ମୋର ଇଜ୍ଜତ ନେଇଗଲେ । ମୁଁ ଆଉ ବଞ୍ଚିବିନି । ଏହାପରେ ନାବାଳକ ରୁମ୍ରେ ଆତ୍ମହତ୍ୟା ଉଦ୍ୟମ କରୁଥିଲା । କୌଣସିମତେ ହଷ୍ଟେଲ କର୍ମଚାରୀ ପହଞ୍ଚି ନାବାଳକକୁ ଉଦ୍ଧାର କରିଥିଲେ । ପୀଡ଼ିତଙ୍କ ମା’ ଅଭିଯୋଗ ମୁତାବକ, ସେମାନେ ଗତକାଲି ଇନଫୋସିଟି ଥାନାରେ ଏତଲା ଦେଇଥିଲେ । ପୁଲିସ୍ ପ୍ରଥମେ ୪ ଜଣଙ୍କୁ ଥାନାରେ ଅଟକ ରଖିଥିଲା । ହେଲେ କାହା ଚାପରେ ପଡି଼ ସେମାନଙ୍କୁ ଛାଡ଼ି ଦେଇଛି । ଏମିତିକି ସେମାନଙ୍କୁ ଏତଲା ନକଲ ଦେଉନଥିଲା । ଡିସିପିଙ୍କ ହସ୍ତକ୍ଷେପ ପରେ ୩ଜଣଙ୍କୁ ଗିରଫ କରିଛି । ତଥାପି ନିର୍ୟାତନାରେ ସମ୍ପୃକ୍ତ ବିକ୍ରମ, ପଞ୍ଚାନନ ଓ ପ୍ରସନ୍ନଙ୍କ ଉପରେ କୌଣସି କାର୍ୟ୍ୟାନୁଷ୍ଠାନ ନିଆଯାଇନି ।
ଖେଳାଳିକୁ ଯୌନ ନିର୍ୟାତନା ଦିଆଯାଇଥିବା ଅଭିଯୋଗ : ନାବାଳକ ଖେଳାଳିଙ୍କ ଗୁପ୍ତାଙ୍ଗରେ ଅମୃତାଞ୍ଜନ ବୋଳି ଦେଲେ ସିନିୟର ଖେଳାଳି
