ୟୁରିଆ ସାର କଳାବଜାରିରେ ଚଢ଼ାଉ କଲା କୃଷି ବିଭାଗ, ୧୧୦ ବସ୍ତାରୁ ଉର୍ଦ୍ଧ୍ଵ ୟୁରିଆ ସାର ଜବତ

ପଦ୍ମପୁର, (ବାଘୁଆବାର୍ତ୍ତା): ୟୁରିଆ ସାର କଳାବଜାରି ବେଳେ ଚଢାଉ କଲା କୃଷି ବିଭାଗ। ଛତିଶଗଡ଼ ସୀମାବର୍ତ୍ତି ପଦ୍ମପୁର ଉପଖଣ୍ତ ଝାରବନ୍ଧ ବ୍ଲକ ନିତ୍ୟାନନ୍ଦପୁର ଗ୍ରାମରେ ବ୍ୟାପକ ମାତ୍ରାରେ ୟୁରିଆ ସାର କଳାବଜାରି ହେଉଥିବା କୃଷି ବିଭାଗ ଖବର ପାଇ ଚଢାଉ କରିଥିଲା। ଚଢାଉ ବେଳେ ୨ ଜଣ ବ୍ୟବସାୟୀଙ୍କ ଠାରୁ ୧୧୦ ବସ୍ତା ୟୁରିଆ ସାର ଜବତ ହୋଇଛି। ନିତ୍ୟାନନ୍ଦପୁର ଗ୍ରାମର ଡିଙ୍ଗରଲାଲ ସାହୁ ଓ ରାଜେନ୍ଦ୍ର ସାହୁଙ୍କ ସ୍ତ୍ରୀ ତାରାବାଈ ସାହୁ ବେଆଇନ ଭାବେ ୟୁରିଆ ସାର ଗଚ୍ଛିତ ରଖି ଚଢା ଦରରେ ବିକ୍ରି କରୁଥିଲେ। ଏନେଇ କୃଷି ବିଭାଗ ଖବର ପାଇବା ପରେ ଚଢାଉ କରିଥିଲା। ଚଢାଉ ବେଳେ ଡିଙ୍ଗରଲାଲ ସାହୁଙ୍କ ଠାରୁ ୫୨ ବସ୍ତା ଓ ତାରାବାଈ ସାହୁଙ୍କ ଠାରୁ ୫୮ ବସ୍ତା ୟୁରିଆ ସାର ଜବତ କରିଥିଲା କୃଷି ବିଭାଗ। ଏହି ଦୁଇ ଜଣ ବ୍ୟବସାୟୀ ବେଆଇନ ଭାବେ ୟୁରିଆ ସାର ଗଚ୍ଛିତ ରଖି ବସ୍ତା ପ୍ରତି ୪୭୦ ଟଙ୍କାରେ ବିକ୍ରି କରୁଥିଲେ। ଚାଷୀମାନଙ୍କ ଅଭିଯୋଗକୁ ଭିତ୍ତିକରି ବ୍ଲକ ସହକାରୀ କୃଷି ଅଧିକାରୀ ପ୍ରଣୟ ମନ୍ତ୍ରୀ, ଡୁଂଗୁରିପାଲି ସହକାରୀ କୃଷି ଅଧିକାରୀ ମନୋଜ ରାଉତ , ପୁଲିସ ଏଏସଆଇ ବିନୋଦ କନ୍ଧେର ଓ ସହକର୍ମୀ ଘଟଣାସ୍ଥଳରେ ପହଞ୍ଚି ଚଢାଉ କରିଥିଲେ। ଉଭୟଙ୍କ ନିକଟରୁ ୧୧୦ ବସ୍ତାରୁ ଉର୍ଦ୍ଧ୍ଵ ୟୁରିଆ ସାର ଜବତ ହୋଇଥିବା ସୂଚନା ମିଳିଛି।