୧୫ ବର୍ଷୀୟ ନାବାଳିକାକୁ ଗୁଣିଗାରେଡ଼ି ସନ୍ଦେହରେ ଘରେ ପଶି ଆକ୍ରମଣ ଓ ଭଙ୍ଗାରୁଜା

ପାରଳାଖେମୁଣ୍ଡି, (ବାଘୁଆବାର୍ତ୍ତା): ଗୁଣିଗାରେଡ଼ି ସନ୍ଦେହରେ ଘରେ ପଶି ଆକ୍ରମଣ ଏବଂ ଭଙ୍ଗାରୁଜା ହୋଇଛି । ଏଭଳି ଏକ ଅଭାବନୀୟ ଘଟଣା ଗଜପତି ଜିଲ୍ଲାର ସଦର ମହକୁମା ପାରଳାଖେମୁଣ୍ଡିର ସୁବାଷ ନଗରରେ ଘଟିଛି। ଗତ ୩୧ତାରିଖରେ ସୁବାଷନଗରର ଜଣେ ୧୫ ବର୍ଷୀୟ ନାବାଳିକା ଅସୁସ୍ଥ ହୋଇପଡିଥିବା ବେଳେ ସେ ରାଜାରାଓ ନାଗବଂଶଙ୍କ ଘର ସମ୍ମୁଖକୁ ଯାଇ ଚିତ୍କାର କରିଥିଲା । ଫଳରେ ଲୋକେ ରାଜାରାଓଙ୍କ ପରିବାର ଗୁଣି କରି ନାବାଳିକାକୁ ହଇରାଣ କରୁଥିବା ସନ୍ଦେହ କରିଥିଲେ । ଏହାପରେ ବିଳମ୍ବିତ ରାତିରେ ସୁବାଷ ନଗରର ଲୋକେ ରାଜାରାଓଙ୍କ ଘରେ ପଶି ଆକ୍ରମଣ କରିବା ସହ ଘରର ସମସ୍ତ ଆସବାବପତ୍ର ଭଙ୍ଗାରୁଜା କରିଥିଲେ । ଘଟଣାସ୍ଥଳରେ ପୁଲିସ ପହଂଚି ସେମାନଙ୍କୁ ଉଦ୍ଧାର କରିବା ସହ ଉତ୍ୟକ୍ତ ଲୋକଙ୍କୁ ଘଉଡାଇଥିଲା । ନାବାଳିକାର ଏଭଳି ଅବସ୍ଥା ପାଇଁ ସାହିର ଲୋକେ ରାଜାରାଓଙ୍କ ପରିବାରକୁ ଦାୟୀ କରିଥିଲେ। ଘଟଣା ପରଠୁ ପୁଲିସ ସେଠାରେ ଉପସ୍ଥିତ ଥିଲା। ହେଲେ ଆଜି ମଧ୍ୟାହ୍ନରେ ପୁଣି ସନ୍ଦେହ କରି ସାହି ଲୋକେ ରାଜା ରାଓଙ୍କ ଘରେ ପଶି ଟିଭି ଫ୍ରିଜ୍ ଓ ଅନ୍ୟାନ୍ୟ ଆସବାବ ପତ୍ର ଭଙ୍ଗାରୁଜା କରିଛନ୍ତି। ଖବର ପାଇ ପାରଳାଖେମୁଣ୍ଡି ଏସଡିପିଓ ଓ ଏସପି ଦାୟିତ୍ଵରେ ଥିବା ବାମ ଦେବ ସିଂ ଓ ପୁଲିସ ଅଧିକାରୀ, ପୁଲିସ ଫୋର୍ସ ପହଞ୍ଚିବା ପରେ ସ୍ଥାନୀୟ ଲୋକେ ଥମିଥିଲେ। ଗୁଣି ଗାରେଡ଼ି ଅଭିଯୋଗକୁ ନେଇ ମାମଲା ରୁଜ୍ଜୁ କରାଯାଇଥିବା ସହ ଆକ୍ରମଣ ହୋଇଥିବା ପରିବାରକୁ ସୁରକ୍ଷିତ ରଖିବା ସହ ତଦନ୍ତ ଚାଲିଥିବା କହିଛନ୍ତି ପାରଳାଖେମୁଣ୍ଡି ପୁଲିସ।