ଭୁବନେଶ୍ୱର, (ବାଘୁଆବାର୍ତ୍ତା): ବିଶ୍ୱରେ ତୀବ୍ର ଗତିରେ ବ୍ୟାପିବାରେ ଲାଗିଛି ଅଦୃଶ୍ୟ ଭୂତାଣୁ ମହାମାରୀ କରୋନା । ଏଥିରେ ପ୍ରତିଦିନ ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଉଛି । ଗତ ୨୪ ଘଣ୍ଟା ମଧ୍ୟରେ ଦେଶରେ ୭୩ ହଜାରରୁ ଅଧିକ ପଜିଟିଭ୍ ଚିହ୍ନଟ ହୋଇଛନ୍ତି । ଏହି ମଧ୍ୟରେ ୧୬୦୦ ରୁ ଅଧିକ ଲୋକଙ୍କ ଜୀବନ ନେଇଛି କରୋନା । କରୋନା ଦ୍ୱିତୀୟ ଲହରୀ ଜନସାଧାରଙ୍କ ପାଇଁ ଘାତକ ସାଜିଛି । ତେବେ ଶିଶୁମାନଙ୍କୁ କିଭଳି ଏହି ଅଦୃଶ୍ୟ ଭୂତାଣୁ ଠାରୁ ଦୂରରେ ରଖିବେ ସେ ନେଇ ବିଶେଷଜ୍ଞ ମାନଙ୍କ କିଛି ପରାମର୍ଶ ବିଷୟରେ ଜାଣନ୍ତୁ । ଦିଲ୍ଲୀ ଏମ୍ସ ଡକ୍ଟର ରାକେଶ ଗର୍ଗଙ୍କ କହିବା ଅନୁଯାୟୀ, ଏବେ ଶିଶୁମାନଙ୍କ ଉପରେ କରୋନାର ପ୍ରଭାବ ପଡୁଛି । ଏଥିପାଇଁ ସେମାନଙ୍କୁ ଘରୁ ବାହାରକୁ ଯିବାକୁ ଦିଅନ୍ତୁ ନାହିଁ । ସେମାନଙ୍କୁ ସର୍ବଦା ମାସ୍କ ଲଗାଇବାକୁ ଅଭ୍ୟାସରେ ପକାନ୍ତୁ । ତେବେ ଶିଶୁମାନଙ୍କ ଠାରେ ଖୁବ୍ କମ୍ ଲକ୍ଷଣ ଦେଖାଯାଏ, ଏଥିପ୍ରତି ସାବଧାନ୍ ରୁହନ୍ତୁ । ବହୁ ଶିଶୁଙ୍କୁ ଡାଇରିଆ ସମସ୍ୟା ହୋଇପାରେ । ଶିଶୁଙ୍କୁ କରୋନା ଠାରୁ ଦୂରେଇ ରଖିବା ପାଇଁ ସର୍ବଦା ହାତ ସାନିଟାଇଜ୍ କରାନ୍ତୁ । ସାମାଜିକ ଦୂରତ୍ୱ ରକ୍ଷା କରିବାକୁ କୁହନ୍ତୁ । ବର୍ତ୍ତମାନ ସମୟରେ ଯେଭଳି ଭାବରେ କରୋନା ବ୍ୟାପୁଛି ଅଧିକ ସତର୍କତା ଅବଲମ୍ବନ କରିବା ଉଚିତ୍ । ଥଣ୍ଡା, ଜ୍ୱର, କାଶ ହେଲେ ତୁରନ୍ତ କୋଭିଡ ଟେଷ୍ଟ କରିବା ଉଚିତ୍ । ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ଜ୍ୱର ହେଉ ହେଉ ପ୍ରାଥମିକ ପର୍ଯ୍ୟାୟରେ ଟେଷ୍ଟ କଲେ ବେଳେବେଳେ ଜଣାପଡେ ନାହିଁ, ହେଲେ କିଛି ଦିନ ପରେ ଟେଷ୍ଟ କଲେ ରିପୋର୍ଟ ପଜିଟିଭ୍ ଆସିଥାଏ । ଏଥିପାଇଁ ଶିଶୁ ଦେହରେ ଦେଖାଯାଉଥିବା ସମସ୍ତ ଲକ୍ଷଣ ବିଷୟରେ ସତର୍କ ରୁହନ୍ତୁ ।
