ଗ୍ରାମାଞ୍ଚଳରେ ମଧ୍ୟ ରଥଯାତ୍ରା ବନ୍ଦ
ଜିଲ୍ଲାରେ ୧୦୪ ସୁସ୍ଥ, ୧୨ ଚିକିତ୍ସାଧିନ
ନୟାଗଡ଼, (ବାଘୁଆବାର୍ତ୍ତା) : କରୋନା ମୁକାବିଲା ପାଇଁ ଆଗାମୀ ୪ରୁ ୬ ସପ୍ତାହ ଗୁରୁତ୍ୱପୂର୍ଣ୍ଣ । ତେଣୁ ରାଜ୍ୟ ସରକାରଙ୍କ ନିର୍ଦ୍ଦେଶ ଅନୁସାରେ, ଆଶା କର୍ମୀମାନେ ଘରକୁ ଘର ବୁଲି ଲକ୍ଷଣ ଅଛି ନା ନାହିଁ ତାହା ଯାଞ୍ଚ କରିବେ । ଏନେଇ ଆଜି ନୟାଗଡ଼ ଜିଲ୍ଲାପାଳ ଡ. ପୋମା ଟୁଡୁ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି । ସୂଚନା ମୁତାବକ ଗ୍ରାମାଞ୍ଚଳରେ ସରପଂଚ ଓ ଗୋଷ୍ଠୀ ଉନ୍ନୟନ ଅଧିକାରୀଙ୍କ ଦ୍ୱାରା ବିଭିନ୍ନ ୱାର୍ଡ଼ କମିଟି ଗଠନ କରାଯାଇଛି । ଏଥିରେ ଆଶା ଓ ଅଙ୍ଗନୱାର୍ଡ଼ମାନେ ସଂଶ୍ଲିଷ୍ଟ ରହିଛନ୍ତି । ରାଜ୍ୟ ସରକାର ୧୬ ଜୁନଠାରୁ ଏହି ପ୍ରକିୟା ଆରମ୍ଭ କରିଛନ୍ତି । ନୟାଗଡ଼ ଜିଲ୍ଲାରେ ଏହି କାର୍ଯ୍ୟକ୍ରମ ଆରମ୍ଭ କରାଯାଇଛି । ମୁଖ୍ୟତଃ ଏହି କମିଟି କରୋନା ପ୍ରରିପେକ୍ଷିରେ ପ୍ରତି ଗ୍ରାମର ଦ୍ୱାରା ଦ୍ୱାର ବୁଲି ଡେଙ୍ଗୁ, ମ୍ୟାଲେରିଆ, ଥଣ୍ଡା, କାଶ, ସର୍ଦି, ଲକ୍ଷ୍ମଣ ଦେଖା ଯାଉଥିବା ବ୍ୟକ୍ତିଙ୍କ ସଂମ୍ପର୍କରେ ସୂଚନା ଦେବେ । ସୂଚନା ଆଧାରରେ, କରୋନା ଲକ୍ଷ୍ମଣ ଥିବା ବ୍ୟକ୍ତିଙ୍କର ସ୍ୱାବ ସଂଗ୍ରହ କରାଯାଇ ପରୀକ୍ଷା ପାଇଁ ପଠାଯିବ । ଏଥିସହିତ ରଥଯାତ୍ରା ବନ୍ଦ କରାଯିବା ପାଇଁ ନିଷ୍ପତ୍ତି ନିଆଯାଇଛି । ଏହାକୁ ଗ୍ରାମାଞ୍ଚଳରେ ମଧ୍ୟ କାର୍ଯ୍ୟକାରୀ କରାଯିବ ବୋଲି ଆଜି ଜିଲ୍ଲାପାଳ ସୂଚନା ଦେଇଛନ୍ତି । ଏଥିସହିତ ଜିଲ୍ଲାରେ ମୋଟ ୧୧ ହଜାର ୪୮୨ ଜଣ ପ୍ରବାସୀଙ୍କୁ ସଂଗରୋଧରେ ରଖାଯାଇଥିଲା । ସେମାନଙ୍କ ମଧ୍ୟରୁ ୮ ହଜାର ୨୭୦ ଜଣ ସଂଗରୋଧ ସମୟ ସାରି ଘରକୁ ଫେରିଛନ୍ତି । ୩ ହଜାର ୧୭୨ ଜଣ ଏବେ ବି ସଂଗରୋଧରେ ରହିଛନ୍ତି । ୧୧୬ ଆକ୍ରାନ୍ତଙ୍କ ମଧ୍ୟରୁ ୧୦୪ ଜଣ ସୁସ୍ଥ ହୋଇଥିବା ଜିଲ୍ଲାପାଳ ସୂଚନା ଦେଇଛନ୍ତି । ଏମାନଙ୍କ ମଧ୍ୟରେ ଓଡ଼ଗାଁ ବ୍ଲକର ୨ ଜଣ ଏବଂ ରଣପୁର ବ୍ଲକର ୨ ଜଣ ବୋଲି ଜଣାଯାଇଛି । ସେହିଭଳି ନୟାଗଡ଼ ବ୍ଲକର ବାଲିକୁଦିଆ ଓ ମାନପୁରରୁ କଂଣ୍ଟେନ୍ମେଣ୍ଟ ପ୍ରତ୍ୟାହାର କରାଯାଇଛି । ଏହି ସାମ୍ବାଦିକ ସମ୍ମିଳନୀରେ ପ୍ରକଳ୍ପ ନିର୍ଦ୍ଦେଶକ ସୁବାସ ଚନ୍ଦ୍ର ରାୟ, ବନଖଣ୍ଡ ଅଧିକାରୀ ଧନରାଜ୍ ଏଚ୍.ଡି, ଅତିରିକ୍ତ ଜିଲ୍ଲାପାଳ ବିଧାନ ଚନ୍ଦ୍ର ରାୟ, ଉପଜିଲ୍ଲାପାଳ ଲଗ୍ନଜିତ ରାଉତ, ଜିଲ୍ଲା ମୁଖ୍ୟ ଚିକିତ୍ସାଧିକାରୀ ସୁଧାଶୁଂ ଷଡ଼ଙ୍ଗୀ, ସୂଚନା ଓ ଲୋକ ସଂମ୍ପର୍କ ଅଧିକାରୀ ଡ. ପ୍ରମୋଦ କୁମାର ନାୟକ ଉପସ୍ଥିତ ଥିଲେ ।
