ନୟାଗଡ଼, (ବାଘୁଆବାର୍ତ୍ତା) : ଗତ ଏକ ସପ୍ତାହ ଧରି ନୟାଗଡ଼ ଜିଲ୍ଲା ସଦରମହକୁମା ସହିତ ଉପାନ୍ତ ଅଂଚଳ ତଥା ପଶ୍ମିମ ନୟାଗଡ଼ରେ ଶୀତର ପ୍ରଭାବ ଅଧିକ ରହିଛି । ଦୀର୍ଘ ଏକ ସପ୍ତାହ ତଳୁ ସଂନ୍ଧ୍ୟା ୮ଟା ପରଠାରୁ କୁହୁଡ଼ି ଆରମ୍ଭ ହେଉଛି । ରାସ୍ତାଘାଟ ଶୂନଶାନ ହେବା ବେଳକୁ କୁହୁଡ଼ିର ଘନତ୍ୱ ବଢ଼ିବା ସହିତ ବାୟୁମଣ୍ଡଳକୁ ଆଚ୍ଛାଦିତ କରି ଦେଉଛି । ଯାହା ଫଳରେ ରାତିରେ ଯାତାୟତ କରୁଥିବା ଗାଡ଼ି ମୋଟର ସବୁ ଏକ ଅନ୍ଧକାର ପରିବେଶ ମଧ୍ୟରେ ଗତି କରୁଛି । ବାୟୁମଣ୍ଡଳର ତାପମାତ୍ର ୧୦ ଡ୍ରୀଗ୍ରୀ ସେଲସିୟସରୁ କମ ରହୁଥିବା ବେଳେ ଜଙ୍ଗଲ ପାହାଡ଼ ଅଂଚଳରେ ଏହା ଆହୁରି କମ ରହିଥିବା ଜଣାପଡ଼ିଛି । ନୂଆଗାଁ ବ୍ଲକର ଗୁମ୍ମି, ବାହାଡ଼ଝୋଲା ଆଦି ସ୍ଥାନର ଜଙ୍ଗଲ ପରିବେଶରେ ତାପମାତ୍ର କମ ରହିବା କାରଣରୁ ଅତ୍ୟଧିକ ଶୀତ ଅନୁଭୂତ ହେଉଛି । ସେହିଭଳି ଦଶପଲ୍ଲାର ଦୁଡ଼ା, ବାଣିଗୋଚ୍ଛା, କଳସଖମଣ, ଚଢେୟାପଲ୍ଲୀ, ପୋଖରୀଗୋଚ୍ଛା ଅଂଚଳରେ ଅତ୍ୟଧିକ ଶୀତ ଅନୁଭୂତ ହେଉଛି । ଗଣିଆ ବ୍ଲକର ବଡ଼ଶିଲିଙ୍ଗା, ରାସଙ୍ଗ ଅଂଚଳରେ ଅତ୍ୟଧିକ ଶୀତ ପଡ଼ୁଥିବା ବେଳେ ମହାନଦୀ ଅବବାହିକାରେ ପ୍ରବଳ ଥଣ୍ଡା ଅନୁଭୂତ ହେଉଛି । ସେହିଭଳି ନୟାଗଡ଼ ସହରଠାରୁ କଣ୍ଟିଲୋ ପର୍ଯ୍ୟନ୍ତ ଜଙ୍ଗଲପାହାଡ଼ ଘେରି ହୋଇ ରହିଥିବାରୁ ଅତ୍ୟଧିକ ଶୀତ ଅନୁଭୂତ ହେଉଛି । ବିଶେଷ କରି ଖଣ୍ଡପଡ଼ା ସୁନାମୁହଁ ଡ୍ୟାମ ଅଂଚଳରେ ହାଡ଼ ଭଙ୍ଗା ଶୀତ ଅନୁଭୂତ ହେଉଥିବା ମତପ୍ରକାଶ ପାଉଛି । ନୟାଗଡ଼ ସହରରେ ମଧ୍ୟ ପ୍ରବଳ ଶୀତ ଲାଗି ରହିବା ସହ ସାମନ୍ୟ ପବନରେ ଦେହ ଥରାଇ ଦେଉଛି । ଅନ୍ୟପକ୍ଷେ ପାଣିପାଗ ବିଭାଗ ରାଜ୍ୟର ଦଶଟି ଜିଲ୍ଲାକୁ ଆଲର୍ଟ କରିଥିବା ଜଣାପଡ଼ିଛି ।
