ଓଡ଼ଗାଁ,(ବାଘୁଆବାର୍ତ୍ତା): ଓଡ଼ଗାଁ ଆଦର୍ଶ ଥାନା ଅନ୍ତର୍ଗତ କୁରାଳ ବେଙ୍ଗେଇସାହିର ଶିକ୍ଷକ ଜଗନ୍ନାଥ ମିଶ୍ର(୫୦) ଓରଫ କୁଲୁଙ୍କ ଘରେ ଗତକାଲି ବିଳମ୍ବିତ ରାତିରେ କିଛି ଦୁର୍ବୁତ୍ତମାନେ ବାଡ଼ି ପଛପଟ କବାଟ ଭାଙ୍ଗି ନଗଦ ୬ ହଜାର ଟଙ୍କା ସମେତ ଇମିଟେସନ ସାମଗ୍ରୀ, ବ୍ୟାଙ୍କଖାତା, ଆବଶ୍ୟକୀୟ କାଗଜପତ୍ର, ଏଟିଏମ କାର୍ଡ଼ ଲୁଟି ନେଇଥିବା ଓଡ଼ଗାଁ ଆଦର୍ଶ ଥାନାରେ ଅଭିଯୋଗ ହୋଇଅଛି ।ଅନ୍ୟପକ୍ଷରେ ଜଗନ୍ନାଥ ମିଶ୍ରଙ୍କ ଘର ଠାରୁ ମାତ୍ର ୧୦୦ ମିଟର ଦୁରରେ ନିଶାମଣି ପ୍ରଧାନ (୪୫)ଙ୍କ ଘରୁ ସମାନ ଢଙ୍ଗରେ ଚୋରି କରିବାକୁ ଉଦ୍ୟତ ହେଉଥିବା ସମୟରେ ନିଶାମଣିଙ୍କ ନିଦ ଭାଙ୍ଗି ଯାଇଥିଲା । ଫଳରେ ଚୋରି ଉଦ୍ୟମ ପଣ୍ଡ ହେବା ସହ ଦୁର୍ବୁତ୍ତମାନେ ଚମ୍ପଟ ମାରିଛନ୍ତି । ଓଡ଼ଗାଁ ଆଦର୍ଶଥାନା ଏସଆଇ ସଞ୍ଜୟ କୁମାର ପରିଡ଼ା ଏବଂ ସ୍ନେହଲତା ପ୍ରଧାନ ଘଟଣାସ୍ଥଳରେ ପହଞ୍ଚି ତଦନ୍ତ ଚଳାଇଛନ୍ତି ।
