କେନ୍ଦୁଝର, (ବାଘୁଆବାର୍ତ୍ତା): କେନ୍ଦୁଝର ଜିଲ୍ଲା ବିଜେପି ସାଧାରଣ ସମ୍ପାଦକ ଜ୍ଞାନ ରଞ୍ଜନ ସାମନ୍ତସିଂହାରଙ୍କ ବିରୋଧରେ ଚାକିରି କରାଇଦେବା ନାଁରେ ଅର୍ଥ ଆଦାୟ ଭଳି ଆସିଛି ସଙ୍ଗିନ୍ ଅଭିଯୋଗ। ଆନନ୍ଦପୁର ବ୍ଲକ୍ ଶାଳବଣି ଗ୍ରାମର ୨ଜଣ ଯୁବକ ନେତାଙ୍କ ବିରୋଧରେ ଆଣିଛନ୍ତି ଏହି ଅଭିଯୋଗ। ଟଙ୍କା ନେଇ ଆଉ ଧରାଛୁଆଁ ଦେଉନଥିବା ଅଭିଯୋଗ ହୋଇଛି। ଏହି ଘଟଣା ସହରରେ ଚର୍ଚ୍ଚାର ବିଷୟ ପାଲଟିଛି । ସୁଚନାନୁସାରେ, ମହେଶ୍ଵର ସାହୁ ଓ ଶକ୍ତି ପ୍ରସାଦ ନାଥଙ୍କ ଠାରୁ ବିଦ୍ୟୁତ୍ ବିଭାଗରେ ବିଲ୍ କଲେକ୍ସନ୍ ଓ ଧାମରା ପୋର୍ଟରେ ଚାକିରି କରାଇଦେବା କହି ଯଥାକ୍ରମେ ୪୦ ହଜାର ଓ ୨୦ ହଜାର ଟଙ୍କା ନେଇଥିଲେ ଜ୍ଞାନ। ଚାକିରି କରିଦେବା ନାଁରେ ଏହି ଦୁଇ ଜଣଙ୍କଠୁ ପ୍ରାୟ ବର୍ଷେ ହେବ ଟଙ୍କା ନେଇଥିଲେ। ହେଲେ ସେ ନା ଚାକିରି କରାଇ ଦେଇଛନ୍ତି ନା ଟଙ୍କା ଫେରାଇଛନ୍ତି। ବାଧ୍ୟ ହୋଇ ଦୁଇ ଯୁବକ ଜ୍ଞାନଙ୍କ ବିରୋଧରେ ଆନନ୍ଦପୁର ଥାନାରରେ ଏନେଇ ମାମଲା ରୁଜୁ କରିଛନ୍ତି। ପୁଲିସ୍ ମାମଲା ରୁଜୁକରି ଏ ଦିଗରେ ଉଚିତ୍ ପଦକ୍ଷପ ଗ୍ରହଣ କରିବାର ଆଶ୍ଵସନା ଦେଇଛି।
