ନୟାଗଡ଼, (ବାଘୁଆବାର୍ତ୍ତା) : କଥାରେ ଅଛି, ହାଟୁଆ ହୁରୁଡ଼ିଲେ ପାଳିଏ ଚଷା ହୁରୁଡ଼ିଲେ ବରଷେ । ମାତ୍ର ନୟାଗଡ଼ ସହର ନିକଟବର୍ତ୍ତୀ ଅଂଚଳରେ ବର୍ଷ ବର୍ଷ ଧରି ଶହ ଶହ ଏକର ଚାଷ ଜମି ଏବେ ପଡ଼ିଆ ପଡ଼ିଛି । ଅନେକ ଚାଷ ଜମି କଂକ୍ରଟି ଜଙ୍ଗଲରେ ପରିଣତ ହୋଇଥିବା ବେଳେ ଅନେକ ଜମି ଜଳସେଚନ ଅଭାବ ଏବଂ ଇଚ୍ଛାଶକ୍ତିର ଅଭାବ ଆଗରେ ମୁଣ୍ଡ ନୁଆଁଇ ଗୋରୁ ଚରା ପଡ଼ିଆରେ ପରିଣତ ହୋଇଛି । ସୂଚନାନୁସାରେ, ଅନେକ ବଡ଼ ବଡ଼ ସହରରେ ନିକଟବର୍ତ୍ତୀ ଜମିକୁ ଚାଷପୋଯୋଗୀ କରିବା ପାଇଁ ଜଳସେଚନ ସୁବିଧା ରହିଥିବା ବେଳେ ନୟାଗଡ଼ ସହରରେ ସେଭଳି କୈାଣସି ସୁବିଧା ନାହିଁ । ଫଳରେ ସହର ନିକଟବର୍ତ୍ତୀ ଅଂଚଳ ବର୍ଷ ବର୍ଷ ଧରି ଚାଷ ନହୋଇ ଏବେ ଗୋରୁ ଚରା ପଡ଼ିଆରେ ପରିଣତ ହୋଇଛି । ନୟାଗଡ଼ ସହର ଉପକଂଣ୍ଠରେ ଥିବା ସିନ୍ଦୁରିଆ, ଦୁର୍ଗାପ୍ରସାଦ, ଦେଉଳପଲ୍ଳୀ, ରତନପୁର, ଲେଙ୍କୁଡ଼ିପଡ଼ା, ଧବଳେଇ, ବରପଲ୍ଲୀ, ନବଘନପୁର, ମୁକ୍ତାପୁର, ସୁବଣ୍ଣଦେଇପୁର ପ୍ରଭୃତି ଗ୍ରାମାଞ୍ଚଳକୁ ଲାଗି ରହିଥିବା ହଜାର ହଜାର ଲୋକଙ୍କ ଜମି ଏବେ ପଡ଼ିଆରେ ପରିଣତ ହୋଇଛି । ଏହା ପଛରେ ଜଳସେଚନର ଅଭାବ ସହ ଲୋକଙ୍କ ଇଚ୍ଛାଶକ୍ତିର ଅଭାବ ମୁଖ୍ୟ କାରଣ ବୋଲି ଜଣାଯାଇଛି । ଅନ୍ୟପକ୍ଷେ, ନୟାଗଡ଼ ସହର ନିକଟବର୍ତ୍ତୀ ଜମିର ମୁଲ୍ୟ ଦିନକୁ ଦିନ ବୃଦ୍ଧି ପାଉଥିବା ଏବଂ ଏହାକୁ ଘର ନିର୍ମାଣରେ ବ୍ୟବହାର କରାଯାଉଥିବାରୁ ଏଭଳି ପରିସ୍ଥିତି ସୃଷ୍ଟି ହେଉଛି । ଅନେକ ପୁରୁଣା ଚାଷୀଙ୍କ ମତନୁସାରେ, ଯେତେ କଷ୍ଟ ପଡ଼ୁ ପଛେ ପୂର୍ବରୁ ଚାଷ କରାଯାଉଥିଲା । ଏବେ ଏହି ଜମି ସୁନା ଦର ସହ ସମାନ ହେବାର ଆଜି କାଲିକା ଲୋକ ଖର୍ଚ୍ଚାନ୍ତ ହୋଇ ଚାଷ କରିବା ଅପେକ୍ଷା ଏହାକୁ ଘର ନିର୍ମାଣ ପାଇଁ ଇଚ୍ଛୁକ ବ୍ୟକ୍ତିଙ୍କୁ ବିକ୍ରି କରିବାକୁ ଶ୍ରେୟ ମଣୁଛନ୍ତି । ଜିଲ୍ଲା କୃଷି ବିଭାଗ ଲୋକଙ୍କୁ କୃଷି କାର୍ଯ୍ୟ ପାଇଁ ସଚେତନତା ନକରିବା ଏବଂ ଆବଶ୍ୟକୟୀ ସୁବିଧା ନମିଳିବାରୁ ଏଭଳି ପରିସ୍ଥିତି ସୃଷ୍ଟିର ଅନ୍ୟତମ କାରଣ ବୋଲି ଜଣାଯାଇଛି । ନୟାଗଡ଼ ସହର ଏକ ଉଚ୍ଚ ସ୍ଥାନରେ ରହିଥିବାରୁ ନିକଟବର୍ତ୍ତୀ ଅଂଚଳରୁ ଏହି ଅଂଚଳକୁ ଜଳସେଚନ ସୁବିଧା ହୋଇପାରୁ ନାହିଁ । ଏଣୁ ମହାନଦୀରୁ ସହରକୁ ପାନୀୟ ଜଳଯୋଗାଣ କରାଯିବା ଭଳି ସହର ନିକଟବର୍ତ୍ତୀ ସ୍ଥାନକୁ କୃଷି କାର୍ଯ୍ୟ ପାଇଁ ଜଳସେଚନ ସୁବିଧା କରାଯିବାର ମଧ୍ୟ ଆବଶ୍ୟକତା ରହିଛି । ଏଥିସହିତ ବିନା ଦ୍ୱିଧାରେ ସରକାରୀ ଅଧିକାରୀ ଚାଷ ଜମିକୁ ଘରବାରି ପରିବର୍ତ୍ତନ କରୁଥିବାରୁ ଏହାକୁ ମଧ୍ୟ ରୋକ ଲଗାଯିବାର ଆବଶ୍ୟକତା ରହିଛି । ସହର ଆଖପାଖ ଅଂଚଳ ଜମିକୁ କିଭଳି ପୁଣିଥରେ ଚାଷପୋଯୋଗୀ କରାଯାଇ ପାରିବ ସେ ନେଇ ଜିଲ୍ଲା କୃଷି ବିଭାଗ ସ୍ୱତନ୍ତ୍ର ଯୋଜନା ପ୍ରସ୍ତୁତ କରିବା ପାଇଁ ଦାବି ହେଉଛି ।
ଇଚ୍ଛାଶକ୍ତିର ଅଭାବ, ସହର ଚାରିପାଖରେ ଶହ ଶହ ଏକର ଚାଷ ଜମି ପଡ଼ିଆ
