ଷଷ୍ଠଶ୍ରେଣୀ ଛାତ୍ରଙ୍କ ସହ ଟିୟୁସନ ସାର କଲେ ଅପ୍ରାକୃତିକ ଯୌନ ସମ୍ପର୍କ, ଶିକ୍ଷକକୁ ଉଠାଇ ଆଣିଲେ ପୁଲିସ

ଚନ୍ଦ୍ରଶେଖରପୁର, (ବାଘୁଆବାର୍ତ୍ତା): ଶିକ୍ଷକ ଜାତି ପାଇଁ ଆଉ ଏକ କଳଙ୍କ । ଟିଉସନ ସାରଙ୍କ କଳାକାରନାମାକୁ ନେଇ ଭୁବନେଶ୍ୱରରେ ଚର୍ଚ୍ଚା । ନୀଳାଦ୍ରିବିହାର ପଣ୍ଡା ପାର୍କ ବସ୍ତିରେ ଘଟିଛି ଏକ ଅଭାବନୀୟ ଘଟଣା । ଜଣେ ଷଷ୍ଠ ଶ୍ରେଣୀ ଛାତ୍ରଙ୍କ ସହ ଅପ୍ରାକୃତିକ ଯୌନ ସମ୍ପର୍କ ରଖିବା ଅଭିଯୋଗରେ ଟ୍ୟୁସନ ଶିକ୍ଷକଙ୍କୁ ଅଟକ ରଖିଛି ଚନ୍ଦ୍ରଶେଖରପୁର ଥାନା ପୁଲିସ । ସେ ହେଲେ ଜିନେସ ଲିମା (୨୪) । ପୁଲିସ ପେକ୍ସୋ ଆକ୍ଟରେ ଏକ ମାମଲା ରୁଜୁ କରିଛି । ପୁଲିସ ସୂଚନା ଅନୁଯାୟୀ ୧୨ ବର୍ଷୀୟ ଏହି ନାବାଳକ ଛାତ୍ର ଜଣଙ୍କ ସବୁଦିନ ପରି ଗତକାଲି ରାତିରେ ପଣ୍ଡା ପାର୍କ ବସ୍ତିରେ ରହୁଥିବା ଜିନେସଙ୍କ ପାଖକୁ ଟ୍ୟୁସନ ଯାଇଥିଲେ । କେହି ନଥିବାର ସୁଯୋଗ ନେଇ ଜିନେସ ଛାତ୍ରଙ୍କ ସହ ବଳପୂର୍ବକ ଅପ୍ରାକୃତିକ ଯୌନ ସମ୍ପର୍କ ରଖିଥିଲେ । ତେବେ କୌଶଳ କ୍ରମେ ଛାତ୍ର ଜଣଙ୍କ ସେଠାରୁ ଖସି ଆସି କାନ୍ଦି କାନ୍ଦି ପରିବାର ଲୋକଙ୍କୁ ଘଟଣା ସଂପର୍କରେ ଜଣାଇଥିଲେ । ପରିବାର ଲୋକ ଜିନେସଙ୍କୁ ଏ ବିଷୟରେ ଯାଇ ପଚାରିବାରୁ ସେ ଗାଳିଗୁଲଜ କରିଥିଲେ । ଏନେଇ ଛାତ୍ରଙ୍କ ମା ଚନ୍ଦ୍ରଶେଖରପୁର ଥାନାରେ ଲିଖିତ ଅଭିଯୋଗ କରିଥିଲେ । ପୁଲିସ ଶୁକ୍ରବାର ସକାଳୁ ଅଭିଯୁକ୍ତ ଶିକ୍ଷକଙ୍କୁ ବସ୍ତିରୁ ଉଠାଇ ନେଇ ଯାଇଥିଲା । ପୁଲିସ ଛାତ୍ରଙ୍କ ବୟାନ ରେକର୍ଡ କରିବା ସହ ଡାକ୍ତରୀ ମାଇନା କରିଛି । ଆସନ୍ତାକାଲି ତାଙ୍କୁ କୋର୍ଟଚାଲଣ କରାଯିବ ବୋଲି ପୁଲିସ କହିଛି ।