ନୟାଗଡ଼,(ବାଘୁଆବାର୍ତ୍ତା): ଲକ୍ଡାଉନ୍ ସମୟରେ ନୟାଗଡ଼ ଜିଲ୍ଲା ରଣପୁର ବ୍ଲକ ଅନ୍ତର୍ଗତ ଚାନ୍ଦପୁର ପରିବା ବଜାରରେ ସାମାଜିକ ଦୂରତା ଅବଲମ୍ବନ ହୋଇପାରୁନଥିବା ବେଳେ ଚାଷୀମାନେ ନିଜର କଷ୍ଟ ଅର୍ଜ୍ଜତ ପନିପରିବା ବିକ୍ରି ବଟା କରିବା ନେଇ ହଇରାଣ ହେଉଛନ୍ତି । ଦୂରଦୂରନ୍ତାରୁ ଆସୁଥିବା ଚାଷୀମାନେ ବ୍ୟବସାୟୀକୁ ସୁବିଧା ନଥିବାରୁ ବାଧ୍ୟ ହୋଇ ବହୁତ କମ ଦରରେ ଗୋଦାମରେ ବିକ୍ରି କରି ଚାଲି ଯାଉଛନ୍ତି । ଗୋଦାମ ମାଲିକମାନେ ଚାଷୀଙ୍କୁ ଶୋଷଣ କରୁଥିବା ନେଇ ଅଭିଯୋଗ ମଧ୍ୟ ହେଉଛି । ଚାନ୍ଦପୁର ବଜାର ଉପରେ ଆଖପାଖ ଦଶଗୋଟି ପଂଚାୟତ ଚାଷୀମାନେ ନିର୍ଭର କରନ୍ତି । ସେମାନଙ୍କର ଉତ୍ପାଦିତ ଦ୍ରବ୍ୟ ଏହି ଅଂଚଳର କାଉଟିଙ୍କ ଉପରେ ନିର୍ଭରଶୀଳ । ମାତ୍ର ଗୋଦାମ ମାଲିକଙ୍କ ଚକ୍ରାନ୍ତରେ ଏବେ ଚାଷୀ ପେଷି ହେଉଛନ୍ତି । ସ୍ଥାନୀୟ କନ୍ଧ ନୟାଗଡ଼, କେରେଣ୍ଡାଟାଙ୍ଗି, ରାଇପଡ଼ା, ଚମ୍ପାଗଡ଼, ରାସଗୋବିନ୍ଦ ପରି ଅନେକ ଗାଁର ଚାଷୀଙ୍କ ସମେତ କଣାସ ଅଂଚଳର ଚାଷୀ ଚାନ୍ଦପୁର ଉପରେ ନିର୍ଭରଶୀଳ । ଏଣୁ ସାମାଜିକ ଦୂରତା ଅବଲମ୍ବନ ଏବଂ ଚାଷୀର ହିତପାଇଁ ପରିବା ବଜାରକୁ ମେଳନ ପଡ଼ିଆକୁ ସ୍ଥାନାନ୍ତର ପାଇଁ ଦାବି ହେଉଛି ।
