ନୟାଗଡ଼, (ବାଘୁଆବାର୍ତ୍ତା): ଜିଲ୍ଲାର ପ୍ରଥମ କୋଭିଡ୍ ୧୯ ହେଲ୍ଥ ସେଣ୍ଟର ଏବଂ ଦୁଇଟି କୋଭିଡ୍ ୧୯ କେୟାର ହସପିଟାଲକୁ ଆଜି କାର୍ଯ୍ୟକ୍ଷମ କରାଯାଇଛି । ଏହି ଚିକିତ୍ସାଳୟରେ ୧୩ ଜଣ ଡାକ୍ତରଙ୍କୁ ନିଯୁକ୍ତି ଦିଆଯାଇଥିବା ବେଳେ ଏଠାରେ ଅନ୍ୟ ରୋଗୀଙ୍କୁ ଚିକିତ୍ସା ପାଇଁ ବାରଣ କରାଯାଇଛି । ଅଂଚଳବାସୀ ନିକଟସ୍ଥ ଟାଙ୍ଗୀ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର କିମ୍ବା ରଣପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଅନ୍ୟାନ ରୋଗର ଚିକିତ୍ସା ପାଇଁ ପରାମର୍ଶ କରିବାକୁ ଜିଲ୍ଲାପାଳ ସୂଚନା ଦେଇଛନ୍ତି । ଚାନ୍ଦପୁର କୋଭିଡ୍-୧୯ ହସ୍ପିଟାଲ ପାଇଁ ମାଇକ୍ରୋବାୟୋଲୋଜିଷ୍ଟ ୧ଜଣ, ଷ୍ଟାଫ୍ ନର୍ସ୧୦ଜଣ, ଫାର୍ମାସିଷ୍ଟ ୯ଜଣ, ଲାବ୍ରୋଟରି ଟେକ୍ନିସିଆନ୍ ୭ଜଣ, ରେଡିଓଗ୍ରାଫର ୨ଜଣ, ଏବ୍ପିଏଚ୍ଡବ୍ଲୁ ମହିଳା ୫୫ଜଣ ଏବଂ ପୁରୁଷ ୧୬ଜଣ ସମୁଦାୟ ୧୦୦ଜଣ ବୈଷୟିକ ଜ୍ଞାନକୌଶଳକାରୀ କୋଭିଡ୍ ହେଲ୍ଥ ସେଣ୍ଟରରେ ନିଯୁକ୍ତି ପ୍ରଦାନ କରାଯାଇଛି । ଏଥିସହିତ ଆମ୍ବୁଲାନ୍ସର ବ୍ୟବସ୍ଥା ରହିଛି । ପ୍ରାଥମିକ ଅବସ୍ଥାରେ ଥିବା କୋଭିଡ୍ ୧୯ ରୋଗୀଙ୍କୁ ଏହି ହେଲଥ୍ ସେଣ୍ଟରରେ ଚିକିତ୍ସା କରାଯିବାର ବ୍ୟବସ୍ଥା କରାଯାଇଥିବା ବେଳେ ଅତି ଆବଶ୍ୟକ ପଡ଼ିଲେ ରୋଗୀଙ୍କୁ ଭୂବନେଶ୍ୱର ସ୍ଥାନାନ୍ତରିତ କରାଯିବ । ଏଠାରେ ବର୍ତ୍ତମାନ ସ୍ଥିତିରେ ଆଇସିୟୁ କିମ୍ବା ଭେଣ୍ଟିଲେଟର ସୁବିଧା ନଥିବା ବେଳେ ଭବିଷ୍ୟତରେ ଏହା ଉପରେ ବିଚାର କରାଯିବ ବୋଲି ଜିଲ୍ଲାପାଳ କହିଛନ୍ତି ।
ଏହି ହେଲଥ୍ ସେଣ୍ଟରରେ ମୋଟ ଦୁଇ ଶହ ଶର୍ଯ୍ୟାର ସୁବିଧା ରହିଥିବା ବେଳେ ଆଜି ସୁଦ୍ଧା ୧୦୦ ଶର୍ଯ୍ୟା କାର୍ଯ୍ୟକ୍ଷମ କରାଯାଇଛି । ଏଠାରେ କୋଭିଡ୍ ୧୯ ରୋଗର ନିଦାନ କରଣ କରାଯାଇ ଚିକିତ୍ସା କରାଯିବ ବୋଲି ଜିଲ୍ଲାପାଳ କହିବା ସହ ଆବଶ୍ୟକ ପଡ଼ିଲେ ଡାକ୍ତରଙ୍କ ସଂଖ୍ୟା ବୃଦ୍ଧି କରାଯିବ ବୋଲି କହିଛନ୍ତି । ସେହିଭଳି ନୟାଗଡ଼ ଜିଲ୍ଲା ଖଣ୍ଡପଡ଼ାରେ କାର୍ଯ୍ୟକ୍ଷମ ହୋଇଥିବା କୋଭିଡ୍ ୧୯ କେୟାର ହସ୍ପିଟାଲରେ ୭୫ ଶର୍ଯ୍ୟା ଏବଂ ପିଟିଏସ୍ଠାରେ ଅବସ୍ଥିତ କୋଭିଡ୍ ୧୯ କେୟାର ହସ୍ପିଟାଲ୍ରେ ୪୦ ଶର୍ଯ୍ୟାର ସୁବିଧା ଉପଲବ୍ଧ କରାଯାଇଥିବା ଜିଲ୍ଲାପାଳ ସୂଚନା ଦେଇଛନ୍ତି । ଅନ୍ୟପକ୍ଷେ ସ୍ୱାସ୍ଥ୍ୟ ବିଭାଗର କର୍ମଚାରୀମାନେ ମାସ୍କ ସହିତ ସ୍ୱତନ୍ତ୍ର ୟୁନିଫର୍ମ ବ୍ୟବହାର କରିବାକୁ ଜିଲ୍ଲାପାଳ କହିଥିବା ବେଳେ ସେମାନଙ୍କ ପାଇଁ କ୍ୱାରେଣ୍ଟାଇନ୍ର ବ୍ୟବସ୍ଥା ମଧ୍ୟ କରାଯାଇଥିବା ଜିଲ୍ଲାପାଳ ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି । ଚାନ୍ଦପୁର କୋଭିଡ୍ ୧୯ ହେଲ୍ଥ ସେଣ୍ଟର ପରିସରରେ ସମସ୍ତ ସ୍ୱାସ୍ଥ୍ୟ କର୍ମଚାରୀ ରହିବାର ବ୍ୟବସ୍ଥା କରାଯାଇଛି । ଏହି ଚିକିତ୍ସାଳୟ ଭିତରକୁ ଅନ୍ୟ କୈାଣସି ବ୍ୟକ୍ତିଙ୍କୁ ପ୍ରବେଶ ନିଶେଷ କରାଯାଇଛି ।
