କରୋନା : ହଜାରେ ଛୁଇଁଲା , ନେଲାଣି ୧୦ ମୁଣ୍ଡ

୮ ଦିନରେ ୩୮୩ ଆକ୍ରାନ୍ତ ଚିହ୍ନଟ

ନୟାଗଡ଼, (ବାଘୁଆବାର୍ତ୍ତା) : ସାରା ବିଶ୍ୱରେ ଆତଙ୍କ ସୃଷ୍ଟି କରିଥିବା କରୋନା ମହାମାରୀ ଦ୍ୱାରା ଆଜି ରାଜ୍ୟରେ ୧୭୩୪ ଜଣ ଆକ୍ରାନ୍ତ ଚିହ୍ନଟ ହୋଇଥିବା ବେଳେ ଏଥିରେ ନୟାଗଡ଼ ଜିଲ୍ଲାରୁ ୧୦୬ ଜଣ ଆକ୍ରାନ୍ତ ଚିହ୍ନଟ ହୋଇଥିବା ରାଜ୍ୟ ସରକାର ସୂଚନା ଦେଇଛନ୍ତି । ଜିଲ୍ଲାରେ ଗତକାଲି ସୁଦ୍ଧା ୯୦୫ ଆକ୍ରାନ୍ତ ଚିହ୍ନଟ ହୋଇଥିବା ବେଳେ ଆଜିର ୧୦୬କୁ ମିଶାଇ ମୋଟ ସଂଖ୍ୟା ୧୦୧୧ ବୋଲି ଜଣାଯାଇଛି । ଫଳରେ ଅଗଷ୍ଟ ପ୍ରଥମ ୮ ଦିନରେ ଜିଲ୍ଲାରେ ୩୮୩ ଜଣ ଆକ୍ରାନ୍ତ ଚିହ୍ନଟ ହୋଇଥିବା ସ୍ପଷ୍ଟ ହୋଇଛି । ଜିଲ୍ଲାରେ ଜୁଲାଇ ୩୧ ତାରିଖ ସୁଦ୍ଧା ଆକ୍ରାନ୍ତ ସଂଖ୍ୟା ୬୨୮ ରହିଥିଲା । ନୟାଗଡ଼ ଜିଲ୍ଲାରେ କରୋନା ମହାମାରୀ କାୟା ମେଲାଇ ଚାଲିଥିବା ବେଳେ ଆକ୍ରାନ୍ତ ସଂଖ୍ୟା ସହ ତାଳ ଦେଇ ମୃତ୍ୟୁ ସଂଖ୍ୟା ମଧ୍ୟ ବୃଦ୍ଧି ପାଉଛି । ନୟାଗଡ଼ ଜିଲ୍ଲାରେ ପୁଣି ଏକ କରୋନା ମୃତ୍ୟୁ ଘଟିଥିବା ଖବର ମିଳିଛି । ଏହି ବ୍ୟକ୍ତିଙ୍କ ବୟସ ୬୦ ବର୍ଷ ଏବଂ ସେ ପୁରୁଷ ବୋଲି ଜଣାଯାଇଛି । ରାଜ୍ୟ ସରକାରଙ୍କ ସୂଚନାନୁସାରେ, ଏହି ବ୍ୟକ୍ତିଙ୍କୁ ମିଶାଇ ଜିଲ୍ଲାରେ ସରକାରୀ ହିସାବ ଅନୁସାରେ ପଂଚମ କରୋନା ମୃତ୍ୟୁ ବୋଲି ଜଣାଯାଇଛି । ଜିଲ୍ଲାରେ କରୋନା କାରଣରୁ ମୋଟ ୧୦ ଜଣଙ୍କ ମୃତ୍ୟୁ ହୋଇଥିବା ବେଳେ ରାଜ୍ୟ ସରକାରଙ୍କ ସୂଚନା ଅନୁସାରେ, ଏହି ସଂଖ୍ୟା ୫ ଏବଂ କରୋନା ଆକ୍ରାନ୍ତ ହୋଇ ଅନ୍ୟ ରୋଗରେ ୨ ଜଣଙ୍କ ମୃତ୍ୟୁ ଘଟିଥିବା ସୂଚନା ରହିଛି । ଜୁଲାଇ ୧ ତାରିଖରେ ଜିଲ୍ଲାରେ ପ୍ରଥମ କରୋନା ମୃତ୍ୟୁ ଘଟିଥିଲା । ନୟାଗଡ଼ ପୈାରାଞ୍ଚଳ ଅନ୍ତର୍ଗତ ଯଦୁମଣୀ ନଗର ବାସିନ୍ଦା ତଥା ନୟାଗଡ଼ ଔଷଧ ବ୍ୟବସାୟୀଙ୍କ କରୋନା ମୃତ୍ୟୁ ଘଟିବା ପରେ ବାରମ୍ବାର ଦାବି ପରେ ସରକାର ଏହାକୁ କରୋନା ମୃତ୍ୟୁ ବୋଲି ସ୍ପଷ୍ଟ କରିଥିଲେ । ଏହା ପରେ ଦଶପଲ୍ଲା ବ୍ଲକ ଟାକେରା ପଂଚାୟତର ଜଣେ ବ୍ୟକ୍ତିଙ୍କ କରୋନା ମୃତ୍ୟୁ ହୋଇଥିବା ବେଳେ ତୃତୀୟ କରୋନା ମୃତ୍ୟୁ ଭାବେ ରଣପୁର ବ୍ଲକ ଚାନ୍ଦପୁର ପଂଚାୟତର ଜଣେ ୮୨ ବର୍ଷିୟ ମହିଳା ମୃତ୍ୟୁ ବରଣ କରିଥିବା ସୂଚନା ମିଳିଥିଲା । ସେହିଭଳି ଭାବେ ଦୁଇ ଦିନ ତଳେ ରାଜ୍ୟ ସରକାର ଅନ୍ୟ ଜଣେ କରୋନା ଆକ୍ରାନ୍ତଙ୍କ ମୃତ୍ୟୁ ଘଟିଥିବା ସୂଚନା ଦେଇଥିଲେ । ମୃତ୍ୟୁ ବରଣ କରିଥିବା କରୋନା ଆକ୍ରାନ୍ତଙ୍କ ଘର ଖଣ୍ଡପଡ଼ା ବ୍ଲକ ଫତେଗଡ଼ ଥାନା ଅନ୍ତର୍ଗତ ନିମାପାଟଣା ଗ୍ରାମ ବୋଲି ଜଣାଯାଇଛି । ମୃତ୍ୟୁ ବରଣ କରିଥିବା ୩୯ ବର୍ଷିୟ ଯୁବକ ଅନ୍ୟାନ ରୋଗରେ ଆକ୍ରାନ୍ତ ହୋଇ ଭୂବନେଶ୍ୱର ସମ୍‌ହସ୍ପିଟାଲରେ ମୃତ୍ୟୁ ବରଣ କରିଥିବା ଜିଲ୍ଲା ପ୍ରଶାସନ ପକ୍ଷରୁ ସୂଚନା ମିଳିଥିଲା । ମାତ୍ର ଏହି ୪ ଜଣଙ୍କ ବ୍ୟତିତ ଆଜି ମୃତ୍ୟୁକୁ ମିଶାଇ ଜିଲ୍ଲାରେ ୫ଟି ମୃତ୍ୟୁ ଘଟିଥିବା ସରକାର ସୂଚନା ଦେଇଥିବା ବେଳେ ଜିଲ୍ଲାରେ ଆଉ ୩ଟି ମାମଲା ଏବେ ବି ଅସ୍ପଷ୍ଟ ରହିଛି । କରୋନା କାରଣରୁ ତିନି ଜଣଙ୍କ ମୃତ୍ୟୁ ଘଟିଥିବା ଅଭିଯୋଗ ହେଉଥିବା ବେଳେ ଏହା ସ୍ପଷ୍ଟ କରାଯାଇନଥିବା ଜଣାଯାଇଛି । ନୟାଗଡ଼ ଜିଲ୍ଲା ଓଡ଼ଗାଁ ବ୍ଲକ ଅନ୍ତର୍ଗତ ପଂଚରିଡ଼ା ମାନପୁର ଗ୍ରାମର ଜଣେ ଯୁବକ ନୟାଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟରେ ମୃତ୍ୟୁ ବରଣ କରିଥିବା ବେଳେ ତାଙ୍କର ଶବ ସତ୍କାର ପରେ କରୋନା ପଜିଟିଭ୍ ରିର୍ପୋଟ ଆସିଥିଲା । ତାଙ୍କ ମୃତ୍ୟୁକୁ କରୋନା ମୃତ୍ୟୁ ଘୋଷଣା କରିବାକୁ ଦାବି ହୋଇଥିଲା । ସେହିଭଳି ଭାବେ ଚାନ୍ଦପୁର ଥାନା ଏଏସ୍‌ଆଇ କରୋନା ଆକ୍ରାନ୍ତ ହେବା ପରେ ଭୂବନେଶ୍ୱରରେ ଚିକିତ୍ସାଧିନ ଥିବା ବେଳେ ତାଙ୍କର ମୃତ୍ୟୁ ଘଟିଥିଲା । ଏହି କରୋନା ଯୋଦ୍ଧାଙ୍କୁ ଜିଲ୍ଲା ପ୍ରଶାସନ ପକ୍ଷରୁ ଶ୍ରଦ୍ଧାଞ୍ଜଳୀ ଦିଆଯାଇଥିବା ବେଳେ ତାଙ୍କର ମୃତ୍ୟୁ କାରଣ ମଧ୍ୟ ସରକାରୀ ସ୍ତରରେ ଅସ୍ପଷ୍ଟ ରହିଛି । ଗତକାଲି ନୟାଗଡ଼ ଜିଲ୍ଲା ଦଶପଲ୍ଲା ବ୍ଲକ ଅନ୍ତର୍ଗତ ଥୋଡ଼ିଆ ଦଶପଲ୍ଲାର ଜଣେ ୩୩ ବର୍ଷିୟ ଯୁବକଙ୍କ କରୋନା କାରଣରୁ ମୃତ୍ୟୁ ଘଟିଥିବା ଅଭିଯୋଗ ହୋଇଛି । ଏହି ଯୁବକ ଜଣଙ୍କ କିଛି ଦିନ ହେବ କରୋନା ଆକ୍ରାନ୍ତ ହୋଇ ଭୂବନେଶ୍ୱର କିମ୍ସ ହସ୍ପିଟାଲରେ ଚିକିତ୍ସିତ ହେଉଥିବା ବେଳେ ତାଙ୍କର ମୃତ୍ୟୁ ଘଟିଛି । ଏନେଇ ପରିବାର ଲୋକେ ଖବର ପାଇବା ପରେ ଶୋକର ଛାୟା ଖେଳି ଯାଇଛି । ଏହି ଯୁବକଙ୍କ ପôତୀ ମଧ୍ୟ ଗର୍ଭବତୀ ଅବସ୍ଥାରେ କରୋନା ଆକ୍ରାନ୍ତ ହୋଇଥିବା ବେଳେ ନିକଟରେ ତାଙ୍କର ଏକ ପୁତ୍ର ସନ୍ତାନ ଜନ୍ମ ହୋଇ ମୃତ୍ୟୁ ବରଣ କରିଥିବା ଜଣାଯାଇଛି । ଅନ୍ୟପକ୍ଷେ, ଜିଲ୍ଲାରେ ଏହି ୮ ଜଣଙ୍କ ବାଦ ଅନ୍ୟ ଦୁଇ ଜଣ କରୋନା ଆକ୍ରାନ୍ତ ହୋଇ ଅନ୍ୟ ରୋଗରେ ମୃତ୍ୟୁ ଘଟିଥିବା ରାଜ୍ୟ ସରକାର ସୂଚନା ଦେଇଛନ୍ତି । ଏହି ଦୁଇ ଜଣଙ୍କୁ ମିଶାଇଲେ ଜିଲ୍ଲାରେ ମୋଟ ମୃତ୍ୟୁ ସଂଖ୍ୟା ୧୦ ବୋଲି ଜଣାଯାଇଛି ।