ଓଡ଼ଗାଁ, (ବାଘୁଆବାର୍ତ୍ତା): ନୟାଗଡ଼ ଜିଲ୍ଲା ଓଡ଼ଗାଁ ବ୍ଲକ ଅନ୍ତର୍ଗତ ବୁଢ଼ାବୁଢ଼ୀ ଡ୍ୟାମର ପରିବେଶ ଅତ୍ୟନ୍ତ ସୁନ୍ଦର ଓ ମନୋମୁଗ୍ଧକର । ପାହାଡ଼, ପର୍ବତ ଘେରା ଏହି ଡ୍ୟାମ ନିକଟରେ ଭରା ଘଂଚ ଜଙ୍ଗଲ । ଯାହା ବଣଭୋଜି ନିମନ୍ତେ ପର୍ଯ୍ୟଟକଙ୍କୁ ଆକୃଷ୍ଟ କରୁଥିବା ବେଳେ ଏବେ ଏଠାକୁ ଲୋକମାନେ ଆସିବାକୁ ନାକ ଟେକୁଥିବା ଜଣାଯାଇଛି । ଡ୍ୟାମ ନିକଟକୁ ଯାଇଥିବା ରାସ୍ତା ଅତ୍ୟନ୍ତ ଶୋଚନୀୟ ହୋଇ ପଡ଼ିଥିବାରୁ ପର୍ଯ୍ୟଟକମାନେ ହିନସ୍ତା ଭୋଗୁଛନ୍ତି । ସୂଚନାନସୁାରେ, ନୟାଗଡ଼ ଓଡ଼ଗାଁ ରାସ୍ତାର କେନାଲ ଛକଠାରୁ ୭ କିଲୋମିଟର ଯିବା ପରେ ପଡ଼ି ଥାଏ ବୁଢ଼ାବୁଢ଼ୀ ଆଣି ଡ୍ୟାମ । ଏହା ପାଇଁ ସୁବିଧା ଜନକ ଭାବେ କେନାଲ ରାସ୍ତା ଲୋକଙ୍କ ପାଇଁ ରହିଥିବା ବେଳେ ଏହା ଏବେ ଶୋଚନୀୟ ଭାବେ ଆବଡ଼ା ଖାବଡ଼ା ହୋଇ ପଡ଼ି ରହିଛି । ପିଚୁ ଉଠି ଯିବା ସହ ରାସ୍ତାରେ ହଜାର ହଜାର ଖାଲ ସୃଷ୍ଟି ହେବା କାରଣରୁ ଆସୁଥିବା ପର୍ଯ୍ୟଟକମାନେ ଗୈାଡ଼ପୁଟ ଗ୍ରାମ ରାସ୍ତା ଦେଇ ଡ୍ୟାମରେ ପହଂଚୁଥିବା ଜଣାଯାଇଛି । ଯାହା ସମୟ ସାକ୍ଷେପ ଏବଂ ଅଧିକ ରାସ୍ତା ଅତିକ୍ରମ କରିବାକୁ ପଡ଼ୁଥିବା ଦେଖା ଯାଇଛି । ନୟାଗଡ଼ ଜିଲ୍ଲା ଦଶପଲ୍ଲାରେ ଥିବା କୁଆଁରିଆ ଡ୍ୟାମ ଭଳି ବୁଢ଼ାବୁଢ଼ୀଆଣି ଡ୍ୟାମଠାରେ ମଧ୍ୟ ବର୍ଷ ତମାମ୍ ବଣଭୋଜି ନିମନ୍ତେ ଗହଳୀ ଲାଗି ରହୁଥିବା ବେଳେ ଚଳିତ ବର୍ଷ ନୂଆବର୍ଷକୁ ପର୍ଯ୍ୟଟକ ସଂଖ୍ୟା ହ୍ରାସ ଘଟିବାର ସମ୍ଭାବନା ସୃଷ୍ଟି ହୋଇଛି । ରାସ୍ତା କଦର୍ଯ୍ୟ କାରଣରୁ ଅନେକ ପର୍ଯ୍ୟଟକ କେନାଲ ଛକଠାରୁ ଫେରି ଯାଉଥିବା ମଧ୍ୟ ଦେଖିବାକୁ ମିଳିଛି । ଜଳସେଚନ ବିଭାଗ ଅଧିନରେ ରହିଥିବା ଏହି କେନାଲ ବନ୍ଧ ମରାମତି କରିବା ପାଇଁ ବିଭାଗ ଆଗ୍ରହ ଦେଖାଉ ନଥିବା ବେଳେ ବନ୍ଧ ଉପରୁ ଘାସ କଟାରେ ଲକ୍ଷାଧିକ ଟଙ୍କା ଚଳୁ କରୁଥିବା ଅଭିଯୋଗ ହେଉଛି । ପର୍ଯ୍ୟଟକଙ୍କ ଅସୁବିଧା ଏବଂ ସ୍ଥାନୀୟ ଲୋକଙ୍କ ସୁବିଧା ପାଇଁ କେନାଲ ବନ୍ଧ ରାସ୍ତାକୁ ନୂଆବର୍ଷ ପୂର୍ବରୁ ମରାମତି କରିବାକୁ ଦାବି ହେଉଛି ।
ବୁଢ଼ାବୁଢ଼ୀ ଆଣି ଡ୍ୟାମ ରାସ୍ତା ଶୋଚନୀୟ, ହୀନସ୍ତା ଭୋଗୁଛନ୍ତି ପର୍ଯ୍ୟଟକ
