ଭୁବନେଶ୍ବର, (ବାଘୁଆବାର୍ତ୍ତା): ଆଦର୍ଶ ଥାନା ପୋଲିସକୁ ବଡ଼ ସଫଳତା । ବିପୁଳ ପରିମାଣରେ ବ୍ରାଉନ ସୁଗାର ଜବତ କଲା ବୌଦ୍ଧ ଆଦର୍ଶ ଥାନା ପୋଲିସ। ୨୨.୭୬ ଗ୍ରାମ ଓଜନର ବ୍ରାଉନ ସୁଗାର ଜବତ ସହିତ ୩ ଜଣଙ୍କୁ ଗିରଫ କରାଯାଇଛି । ଗିରଫ ହୋଇଥିବା ତିନି ଜଣ ଯୁବକ ହେଉଛନ୍ତି ବୌଦ୍ଧ ଜିଲ୍ଲାର ପ୍ରଭାକର ପରିଡ଼ା, ଶିବାନନ୍ଦ ଗହିର ଓ ପ୍ରିତମ ଦେହୁରୀ ବୋଲି ଜଣାପଡିଛି । ଏଥିସହ ଅଭିଯୁକ୍ତଙ୍କ ଠାରୁ ନଗଦ ୧୫ ହଜାର ୯ ଶହ ଟଙ୍କା ମଧ୍ୟ ଜବତ ହୋଇଛି । ସୂଚନା ଅନୁଯାୟୀ, ବ୍ରାଉନ ସୁଗାର ବେପାର ହେଉଥିବା ନେଇ ପୋଲିସ କୌଣସି ସୂତ୍ରରୁ ଖବର ପାଇଥିଲା । ଏନେଇ ରଇଠାଣି ଛକ ରାମଜୋଇ ପୋଲ ନିକଟରେ ପୋଲିସ ଚଢାଉ କରିଥିଲା । ସେଠାରେ ତିନି ଜଣ ଅଭିଯୁକ୍ତ ବ୍ରାଉନ ସୁଗାର କାରବାର କରୁଥିବା ବେଳେ ସେମାନଙ୍କୁ ପୋଲିସ ଗିରଫ କରିଛି।ସେମାନଙ୍କ ନିକଟରୁ ୨୨.୭୬ ଗ୍ରାମ ବ୍ରାଉନ ସୁଗାର ଜବତ ହୋଇଥିବା ବେଳେ ଏହାର ଆନୁମାନିକ ମୂଲ୍ୟ ପ୍ରାୟ ୨ ଲକ୍ଷ ରୁ ଉର୍ଦ୍ଧ୍ବ ଟଙ୍କା ହେବା ନେଇ ଏସପି ସୂଚନା ଦେଇଛନ୍ତି । ତେବେ ଗିରଫ ଅଭିଯୁକ୍ତମାନେ ବାଲେଶ୍ଵର ଜିଲ୍ଲା ଜଳେଶ୍ବର ଅଞ୍ଚଳରୁ ବ୍ରାଉନ ସୁଗାର୍ ଆଣି ବୌଦ୍ଧ ଜିଲ୍ଲାରେ ବିକ୍ରି କରୁଥିବା ନେଇ କହିଛନ୍ତି ଏସପି । ତେବେ ଆଗାମୀ ଦିନରେ ଏହାକୁ ଜିଲ୍ଲାରୁ କିଭଳି ସମ୍ପୂର୍ଣ୍ଣ ଭାବେ ବନ୍ଦ କରାଯିବ ସେ ଦିଗରେ ପୋଲିସ ପକ୍ଷରୁ ପଦକ୍ଷେପ ଗ୍ରହଣ କରିବ ବୋଲି ଏସପି ରାହୁଲ ଗୋଏଲ ସୂଚନା ଦେଇଛନ୍ତି ।
