ନୂଆଦିଲ୍ଲୀ, (ବାଘୁଆବାର୍ତ୍ତା): ଭୋଡାଫୋଦ-ଆଇଡିଆର ନିର୍ଦ୍ଦେଶକ ପଦ ଛାଡ଼ିଛନ୍ତି ବିର୍ଲା ଗ୍ରୁପ୍ ମୁଖ୍ୟ କୁମାର ମଙ୍ଗଲମ ବିର୍ଲା। ସେ ଉଭୟ ଅଣ କାର୍ୟ୍ୟନିର୍ବାହୀ ନିର୍ଦ୍ଦେଶକ ଓ ଅଣ କାର୍ୟ୍ୟନିର୍ବାହୀ ଅଧ୍ୟକ୍ଷ ପଦ ଛାଡ଼ିବାକୁ ପ୍ରସ୍ତାବ ଦେଇଥିଲେ। ଆଜି କମ୍ପାନୀର ବୋର୍ଡ ଅଫ ଡିରେକ୍ଟର୍ସ ତାଙ୍କ ପ୍ରସ୍ତାବକୁ ଗ୍ରହଣ କରି ନେଇଛନ୍ତି। ସେ ପଦ ଛାଡ଼ି ଥିବାରୁ ଟେଲିକମ ଭେଟରାନ ହିମାଂଶୁ କାପାନିଆଙ୍କୁ ତାଙ୍କ ସ୍ଥାନରେ ଅଣ କାର୍ୟ୍ୟନିର୍ବାହୀ ଅଧ୍ୟକ୍ଷ ପଦରେ ନିଯୁକ୍ତି ଦିଆଯାଇଛି । କିଛି ଦିନ ତଳେ କୁମାର ମଙ୍ଗଲମ ବିର୍ଲା ସମସ୍ତଙ୍କୁ ଆଶ୍ଚର୍ୟ୍ୟ କରିବା ଭଳି ଚିଠି ଲେଖିଥିଲେ । ଏହି ଚିଠି ସୋମବାର ସାମ୍ନାକୁ ଆସିବା ପରେ ହଇଚଇ ସୃଷ୍ଟି ହୋଇଥିଲା। ଏଥିରେ ସେ ଘୋର ଆର୍ଥିକ ସଙ୍କଟ ଦେଇ ଗତି କରୁଥିବା ଭୋଡାଫୋନ୍ ଆଇଡିଆକୁ ବଞ୍ଚାଇବା ଲାଗି ଏକ ଅଭିନବ ଉପାୟ ସମ୍ପର୍କରେ ସୂଚନା ଦେଇଥିଲେ । ନିଜ ଅଂଶଧନ ସେ ସରକାର କିମ୍ବା ଅନ୍ୟ ଯେକୌଣସି ଘରୋଇ ସଂସ୍ଥାକୁ ଦେଇ ଭୋଡାଫୋନ ଓ ଆଇଡିଆକୁ ଆର୍ଥିକ ସଙ୍କଟରୁ ଉଦ୍ଧାର କରିବାକୁ ପ୍ରସ୍ତାବ ରଖିଥିଲେ। ଏହି ସମୟରେ ସେ କମ୍ପାନୀର ଦାୟିତ୍ୱ ବି ଅନ୍ୟକୁ ଦେବାକୁ ପ୍ରସ୍ତୁତ ଥିବା କହିଥିଲେ। କମ୍ପାନୀ ଯେମିତି ବନ୍ଦ ନ ହେବ, ସେଥିପାଇଁ ସେ ସବୁ କିଛି କରିବାକୁ ପ୍ରସ୍ତୁତ ଥିବା ଉକ୍ତ ଚିଠିରେ ଲେଖିଥିଲେ।
