ନୟାଗଡ଼,(ବାଘୁଆବାର୍ତ୍ତା): ଓଡ଼ିଶାର ଅନନ୍ୟ ସାହିତ୍ୟାନୁଷ୍ଠାନ ଲେଖକ, ପାଠକ, ପ୍ରକାଶକ ସାମ୍ମୁଖ୍ୟ ଆନୁକୁଲ୍ୟରେ ଆଜି ଭର୍ଚ୍ଚୁଆଲ ମୋଡ ଦ୍ୱାରା ନୟାଗଡ଼ ବିଧାୟକ ତଥା କୃଷି ଓ ଉଚ୍ଚଶିକ୍ଷା ମନ୍ତ୍ରୀ ଡ. ଅରୁଣ କୁମାର ସାହୁଙ୍କ ସମ୍ପାଦିକ ପୁସ୍ତକ ‘ମଣିଷ ବ୍ୟତିରେକ’ ପାଠକାର୍ପଣ ହୋଇଯାଇଛି । ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଖଣ୍ଡପଡ଼ା ବିଧାୟକ ତଥା ସମ୍ବାଦର ସମ୍ପାଦକ ସୈାମ୍ୟ ରଞ୍ଜନ ପଟ୍ଟନାୟକ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ । ଏହି ଅବସରରେ ପୁସ୍ତକ ମଣିଷର ଶ୍ରେଷ୍ଠ ବନ୍ଧୁ ବୋଲି କୁହାଯାଏ ବୋଲି କହିଥିଲେ । । ଲେଖକ, ପାଠକ ଏବଂ ପ୍ରକାଶକଙ୍କ ତ୍ରିବେଣୀ ସଙ୍ଗମ ନହେଲେ ଭାଷା ଓ ସାହିତ୍ୟର ଉନ୍ନତୀ ସମ୍ଭବ ହେବ ନାହିଁ ବୋଲି କହିଛନ୍ତି । ଜନ, ମନ, ଧନ ଏବଂ ସମୟ ଥିଲେ ସାହିତ୍ୟର ଉନ୍ନତୀ ହେବ ବୋଲି ଆଲୋଚନା ଅବସରରେ ସୂଚନା ଦେଇଥିଲେ । ଲୋକଙ୍କର ପଢ଼ିବାର ଆଗ୍ରହ ବଢ଼ିଛି, ସୋସିଆଲ ମିଡିଆର ବିଭିନ୍ନ ମାଧ୍ୟମରେ ଲୋକମାନେ ପଢ଼ୁଛନ୍ତି ବୋଲି ସେ କହିଥିଲେ । ବିଜ୍ଞାନ ଓ କାରିଗରୀ ଏହି ସୁବିଧା ଦେଇଛି । ମଣିଷ ପ୍ରକୃତି ବିରୁଦ୍ଧରେ ଯିବା ପାଇଁ ବିଜ୍ଞାନ ଓ କାରିଗରୀ କୈାଶଳ ମଧ୍ୟ ଭରସା ଦେଇଛି ।
ଉଦଘାଟକ ଭାବେ ପ୍ରଖ୍ୟାତ ଲେଖିକା ପଦ୍ମଶ୍ରୀ ଡ. ପ୍ରତିଭା ରାୟ ଯୋଗ ଦେଇ ପୁସ୍ତକଟିକୁ ପାଠକାର୍ପଣ କରିବା ସହ ପୁସ୍ତକ ସମ୍ବନ୍ଧରେ ଅନେକ ଆଲୋଚନା କରିଥିଲେ । ୨୯ଟି ଚମତ୍କାର ଗଳ୍ପକୁ ନେଇ ପୁସ୍ତକଟି ପ୍ରକାଶ ପାଇଥିବା ବେଳେ ଏଥିରେ ପ୍ରକୃତି ଉପାଦେୟ ବହୁ ଗଳ୍ପ ରହିଥିବା କହିଥିଲେ । ମନ୍ତ୍ରୀ ଜଟିଳ ରାଜନୀତି ମଧ୍ୟରେ ଥିଲେ ବି ସାହିତ୍ୟ ମନସ୍କ ହୋଇ ପାଠକଙ୍କ ପାଇଁ ଏଭଳି ଉଦ୍ୟମ କରୁଥାନ୍ତୁ ବୋଲି ଡ. ରାୟ କହିଥିଲେ । ଡ. ସାହୁ ସମ୍ପାଦକୀୟ ଅଭିବ୍ୟକ୍ତି ରଖିବା ସମୟରେ ପଶୁ-ପକ୍ଷୀଙ୍କ ପାଖରେ ସ୍ନେହ, ଶ୍ରଦ୍ଧା ଓ ସ୍ୱାର୍ଥପରତା ମଧ୍ୟ ରହିଥିବା କହିଛନ୍ତି । ତାଙ୍କର ବିଚାର ଶକ୍ତି ଅଛି, ବୁଦ୍ଧି ଅଛି, ଆନୁଗତ୍ୟ ଅଛି । ସୃଷ୍ଟିର ଗତାନୁଗତିକ ଧାରାରେ ଯାହା ସ୍ୱାଭାବିକ ତାହା ରହିଛି ବୋଲି କହିଥିଲେ । ପଶୁ, ପକ୍ଷୀ, ବୃକ୍ଷ, ଲତା ଏବଂ ମଣିଷ ମଧ୍ୟରେ ରହିଥିବା ବିଭିନ୍ନ ପ୍ରଭେଦ ମଧ୍ୟରେ ଆଲୋଚନା କରିଥିଲେ ।
କାର୍ଯ୍ୟକ୍ରମରେ ପୁସ୍ତକର ପ୍ରକାଶକ ଶୁଭେନ୍ଦୁ ଶେଖର ରଥ ଯୋଗ ଦେଇ ବକ୍ତବ୍ୟ ରଖିଥିଲେ । ଲେଖକ ଓ ପାଠକ ମଧ୍ୟରେ ସେତୁଟିଏ ହେଉଛି ପ୍ରକାଶକ ବୋଲି ସେ କହିଥିଲେ । ପଶୁ, ପକ୍ଷୀଙ୍କୁ ନେଇ ଲେଖା ଯାଇଥିବା ଗଳ୍ପକୁ ଏକାଠି କରିବାର ଏକ ନିଆରା ପରିକଳ୍ପନା ଡ. ସାହୁ କରିଥିବା ସେ କହିଛନ୍ତି । କଥାକାର ଡ. ଅରବିନ୍ଦ ରାୟ ପୁସ୍ତକ ପରିକଳ୍ପନାର ଇତିହାସ ସଂମ୍ପର୍କରେ ଆଲୋଚନା କରିବା ସହ ପ୍ରତ୍ୟେକ ଗଳ୍ପକୁ ନେଇ ସମୀକ୍ଷା କରିଥିଲେ । ବିଶିଷ୍ଟ କଥାକାର ଡ. ଅଜୟ ସ୍ୱାଇଁ ଅନ୍ୟତମ ସମୀକ୍ଷକ ଭାବେ ଯୋଗ ଦେଇ ପୁସ୍ତକରେ ୨୯ଟି ଗଳ୍ପ ୨୯ ପ୍ରକାରର ବୋଲି ସୂଚନା ଦେଇଥିଲେ । ଉଭିଦ୍ଦ ଜଗତ ଏବଂ ପ୍ରାଣୀ ଜଗତ ଉପରେ ଗଳ୍ପ ଗୁଡ଼ିକ ପର୍ଯ୍ୟବେଷିତ ବୋଲି କହିଛନ୍ତି । ଓଡ଼ିଆ ସାହିତ୍ୟ କ୍ଷେତ୍ରରେ ଏହା ଏକ ବିରଳ ଗଳ୍ପ ସଂକଳନ ବୋଲି ଡ. ସ୍ୱାଇଁ କହିଥିଲେ । ମଣିଷ ବ୍ୟତିରେକ ପ୍ରାଣୀମାନେ ଅନେକ କଳ୍ପରେ କଥା କହୁଥିବା ଦେଖାଯାଇଛି । ପଶୁର ଡିଏନଏରେ ବିଶ୍ୱାସ ଘାତକତା ନଥିବା ଡ. ସାହୁ ପୁସ୍ତକରେ ଉଲ୍ଲେଖ କରିଥିବା ଡ. ସ୍ୱାଇଁ କହିଛନ୍ତି । ଲେଖକର କାନ ତ୍ରଣୁ, ତୃଣ ଓ ପତଙ୍ଗର ଭାଷା ବୁଝିପାରୁ ବୋଲି ସେ କହିଥିଲେ । ପକ୍ଷୀଘର ପ୍ରକାଶନର ମୁଖ୍ୟ ବନୋଜ ତ୍ରିପାଠୀ କାର୍ଯ୍ୟକ୍ରମ ସଞ୍ଚାଳନ କରିଥିଲେ । ପୁସ୍ତକଟି ଅଫ୍ଲାଇନ୍ ଏବଂ ଅନ୍ଲାଇମ ମଧ୍ୟ କିଣି ଯାଇ ପାରିବ ବୋଲି ପ୍ରକାଶକ ସୂଚନା ଦେଇଛନ୍ତି ।
