ଦଶପଲ୍ଲା, (ବାଘୁଆବାର୍ତ୍ତା): ଦଶପଲ୍ଲା ବିଜ୍ଞାପିତ ଅଞ୍ଚଳ ପରିଷଦ ଅନ୍ତର୍ଗତ ନାରାୟଣଗଞ୍ଜ ହାଟ ନିକଟରେ ବୋମା ଆତଙ୍କ ଦେଖିବାକୁ ମିଳିଛି । ରାସ୍ତାରେ କଣ ପଡ଼ିଛି ବୋଲି ଦେଖିବା ସମୟରେ ବୋମାଟି ପ୍ରଚଣ୍ଡ ଶବ୍ଦ କରି ଫୁଟିଯାଇଥିଲା । ଏଥିରେ ସାଗର ଗୁରୁତର ଭାବେ ଆହତ ହୋଇଥିଲେ । ଘଟଣାସ୍ଥଳରେ ପୋଲିସ ପହଞ୍ଚି ଅଫୁଟା ବୋମା ଜବତ କରିବା ସହ ତଦନ୍ତ ଆରମ୍ଭ କରିଛି ।
ଆଜି ସକାଳ ୧୦ଟା ସମୟରେ ନାରାୟଣଗଞ୍ଜ ହାଟରୁ ଖାଲମଡ଼ା ଗ୍ରାମର ୬୭ ବର୍ଷୀୟ ସାଗର ନାୟକ ଓ ବୁଗୁଡ଼ା ଗ୍ରାମର ୬୦ ବର୍ଷୀୟ ବିଦ୍ୟା ପ୍ରଧାନ କିଛି ରାସନ କିଣି ଫେରୁଥିବା ବେଳେ ରାସ୍ତାରେ ଦୁଇଟି ବୋମା ପଡ଼ିଥିବା ଦେଖିଥିଲେ । ଶବ୍ଦ ଶୁଣି ଘଟଣା ସ୍ଥଳରେ ଶହ ଶହ ଲୋକ ପହଞ୍ଚିବା ସହ ଦଶପଲ୍ଲା ପୋଲିସକୁ ଖବର ଦେଇଥିଲେ । ପରେ ଦଶପଲ୍ଲା ପୋଲିସ ଘଟଣାସ୍ଥଳରେ ପହଞ୍ଚି ବୋମାକୁ ନିଷ୍କ୍ରିୟ କରିବା ପାଇଁ ଚେଷ୍ଟା ଜାରି ରଖିଛି । ବୋମାକୁ ନିଷ୍କ୍ରିୟ କରିବା ପାଇଁ ଏକ ଟିମ୍ ନୟାଗଡ଼ରୁ ବାହାରିଛନ୍ତି ।





