ବୋହୁର ଦୈାରାତ୍ମ : ସ୍ୱାମୀ, ଶାଶୁ, ଶ୍ୱଶୁର ଥାନାର ଦ୍ୱାରସ୍ଥ

ଖଣ୍ଡପଡ଼ା, (ବାଘୁଆବାର୍ତ୍ତା): ଖଣ୍ଡପଡ଼ା ଥାନା ଅଧିନ ଯୋଗିଆପଲ୍ଲୀ ଗ୍ରାମର ଗୋପାଳ ପାତ୍ରଙ୍କ ଘରେ ବଡ଼ ବୋହୁର ଦୈାରାତ୍ମ ଯୋଗୁଁ ପରିବାରରେ ଅଶାନ୍ତି ଦେଖାଦେଇଛି । କଥାକଥାକେ ବଡବୋହୁ ଶ୍ୱଶୁର ଗୋପାଳ ପାତ୍ର, ଶାଶୁ ଯମୁନା ପାତ୍ର ଓ ସ୍ୱାମୀ ଅନନ୍ତ ପାତ୍ରଙ୍କୁ ନାଲି ଆଖି ଦେଖାଇ ଧମକ ଦେଉଥିବା ବେଳେ ବିଭିନ୍ନ ସମୟରେ ଦୁର୍ବବ୍ୟବହାର ପ୍ରଦର୍ଶନ କରି ଆସୁଥିବା ଅଭିଯୋଗ ହେଉଛି । ଗତ ୬ମାସ ଧରି ବଡ଼ ବୋହୁର କାର୍ଯ୍ୟକଳାପରେ ତୀବ୍ର ଅସନ୍ତୋଷ ପ୍ରକାଶ କରି ଆସୁଥିବା ଗୋପାଳଙ୍କ ପରିବାରବର୍ଗ ପରିଶେଷରେ ନ୍ୟାୟ ପାଇବା ନିମନ୍ତେ ଖଣ୍ଡପଡ଼ା ଥାନା କର୍ତୃପକ୍ଷଙ୍କ ଦ୍ୱାରସ୍ଥ ହୋଇଥିବା ଜଣାଯାଇଛି । ଗୋପାଳଙ୍କ ପତ୍ନୀ ଯମୁନା ପାତ୍ର ବୋହୁର କାର୍ଯ୍ୟକଳାପ ସଂପର୍କରେ ଖଣ୍ଡପଡ଼ା ଥାନାରେ ଲିଖିତ ଅଭିଯୋଗ କରିଥିବା ଜଣାଯାଇଛି । ଘଟଣାକ୍ରମେ ଯୋଗିଆପଲ୍ଲୀ ଗ୍ରାମର ଗୋପାଳଙ୍କ ୨ ପୁଅ ନୟାଗଡ ଜିଲ୍ଲାର ଓଡଗାଁ ଥାନା ଅଧିନ କଇଁଥପଲ୍ଲୀ ଗ୍ରାମର ଜଣେ ବ୍ୟକ୍ତିଙ୍କ ୨ ଝିଅଙ୍କୁ ଗତ ୬ବର୍ଷ ତଳେ ବିବାହ କରିଥିଲେ । ୨ ଭଉଣୀ ଗୋପାଳଙ୍କ ଘରେ ୨ ଯାଆ ହୋଇଥିବା ବେଳେ ବଡ଼ ଭଉଣୀ ବିଭିନ୍ନ କଥାରେ ଘରେ ଅଶାନ୍ତି ସୃଷ୍ଟି କରି ଚାଲିଥିବା ଗୋପାଳଙ୍କ ପରିବାରବର୍ଗ ଅଭିଯୋଗ କରିଛନ୍ତି । ଗୋପାଳଙ୍କ ସାନ ବୋହୁ ଶ୍ୱଶୁର ଘରେ ଠିକରେ ଚଳୁଥିବା ବେଳେ ବଡ଼ ବୋହୁ ଅଶାନ୍ତି ସୃଷ୍ଟି କରିଥିବା ଅଭିଯୋଗ ହୋଇଛି । ସବୁ ଥାନାରେ ବୋହୁକୁ ନିର୍ଯ୍ୟାତନା ନେଇ ଅଭିଯୋଗ ହେଉଥିବା ବେଳେ ଏଠି ବୋହୁ ଦେଉଥିବା ନିର୍ଯ୍ୟାତନା ଅଭିଯୋଗରେ ପୁଲିସ କି ପଦକ୍ଷେପ ଗ୍ରହଣ କରିବ ତାହା ଜାଣିବାକୁ ଅଂଚଳ ବାସୀ ଚାହିଁ ବସିଛନ୍ତି ।