ଭୁବନେଶ୍ୱର, (ବାଘୁଆବାର୍ତ୍ତା): ଶୀତ ଋତୁ ଆସୁଥିବାରୁ କୋଭିଡ୍ ବଢ଼ିବା ଆଶଙ୍କାରେ କଟକଣା କଡ଼ା କଲା ଭୁବନେଶ୍ୱର ମହାନଗର ନିଗମ(ବିଏମ୍ସି)। ବାହାଘର, ବ୍ରତଘର ଓ ଶୁଦ୍ଧିକାର୍ୟ୍ୟରେ ଲୋକସଂଖ୍ୟା ଉପରେ କଟକଣା କରାଯାଇଛି। ଏଣିକି ଏଭଳି ସାମାଜିକ କାର୍ୟ୍ୟରେ ସର୍ବାଧିକ ୫୦ ଜଣଙ୍କୁ ଅନୁମତି ମିଳିବ। କାର୍ୟ୍ୟକ୍ରମ ଆୟୋଜକ ପ୍ରବେଶ ସ୍ଥାନରେ ଥର୍ମାଲ ସ୍କ୍ରିନିଂ ବ୍ୟବସ୍ଥା କରିବେ। କେବଳ ଖାଇବା ସମୟ ଛଡ଼ା ଅନ୍ୟ ସବୁଠି ମାସ୍କ ପିନ୍ଧିବାକୁ ବାଧ୍ୟତାମୂଳକ କରାଯାଇଛି। ଗାଇଡଲାଇନ ଉଲ୍ଲଂଘନ ହେଲେ ଆୟୋଜକ ଓ ହଲ୍ ମାଲିକ ଦାୟୀ ରହିବେ। କଠୋର କଟକଣା ଯୋଗୁ ଏବେ ବହୁ କମ୍ ସଂଖ୍ୟକ କରୋନା ଆକ୍ରାନ୍ତ ଚିହ୍ନଟ ହେଉଛନ୍ତି। ଭୁବନେଶ୍ୱରରେ ଆକ୍ରାନ୍ତ ସଂଖ୍ୟା ୨୦୦ ତଳରେ ରହୁଛି। ଗତକାଲି ବିଏମ୍ସି ଅଞ୍ଚଳରୁ ୧୪୯ କରୋନା ଆକ୍ରାନ୍ତ ଚିହ୍ନଟ ହୋଇଥିବା ବେଳେ ସେଥିରୁ ୧୦୯ ଲୋକାଲ୍ କେସ୍ ରହିଛନ୍ତି। ରବିବାର ସୁଦ୍ଧା ବିଏମ୍ସି ଅଞ୍ଚଳରେ ୧୧୩୩୭୦ ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ସେଥିରୁ ୧୦୨୨ ଜଣଙ୍କ ମୃତ୍ୟୁ ଘଟିଥିବା ବେଳେ ୧୦୮୮୧୫ ଜଣ ଆରୋଗ୍ୟ ହୋଇ ଘରକୁ ଫେରିଛନ୍ତି। ବର୍ତ୍ତମାନ ୩୫୧୨ ଜଣ ବିଭିନ୍ନ କୋଭିଡ୍ ହସ୍ପିଟାଲ୍ରେ ଚିକିତ୍ସିତ ହେଉଛନ୍ତି। ତେବେ ଆଗକୁ ପାର୍ବଣ ଓ ଶୀତ ଋତୁ ଆସୁଥିବାରୁ କୋଭିଡ୍ ଗାଇଡ୍ଲାଇନ୍କୁ କଠୋର କରିଛନ୍ତି। ଦୋକାନ ବଜାର, ସପିଂ ମଲ୍ ଓ ବାହାରେ ଭିଡ ନକରିବାକୁ ଅପିଲ୍ କରାଯାଉଛି। ଏଥିପ୍ରତି ପୁଲିସ କଡ଼ା ନଜର ରଖିଛି।
ଶୀତ ଋତୁ ଆସୁଥିବାରୁ କୋଭିଡ୍ ବଢ଼ିବା ଆଶଙ୍କାରେ କଟକଣା କଡ଼ା କଲା ଭୁବନେଶ୍ୱର ମହାନଗର ନିଗମ
