ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ ଜିଲ୍ଲା ଓଡ଼ଗାଁ ବ୍ଲକ ଅନ୍ତର୍ଗତ ଶରଣକୁଳ ପଞ୍ଚାୟତ ପରିସରରେ ଆଜି ଶରଣକୁଳ ବ୍ଲକ ମାନ୍ୟତା ଦାବିରେ ଏକ ଜରୁରୀ ବୈଠକ ଅନୁଷ୍ଠିତ ହୋଇଯାଇଛି । ଶରଣକୁଳ ବ୍ଲକ କ୍ରିୟାନୁଷ୍ଠାନ କମିଟି ଆନୁକୁଲ୍ୟରେ ଅନୁଷ୍ଠିତ ବୈଠକରେ ପୂର୍ବତନ ଜିଲ୍ଲା ପରିଷଦ ସଦସ୍ୟ ମଦନ ମୋହନ ନନ୍ଦ ସଭାପତିତ୍ୱ କରିଥିଲେ । ଏହି ବୈଠକରେ ବରିଷ୍ଠ ସମବାୟ ବିତ୍ ସନ୍ୟାସୀ ପ୍ରଧାନ, ଜିଲ୍ଲା ପରିଷଦ ସଦସ୍ୟ ଚିନ୍ମୟୀ ଦାଶ, ସରପଞ୍ଚ ମୀନାକ୍ଷୀ ପ୍ରସାଦ ସାହୁ, ସମାଜସେବୀ ଲିଙ୍କନ ସୁବୁଦ୍ଧି ପ୍ରମୂଖ ଉପସ୍ଥିତ ରହିଥିଲେ ।
ଏହି ବୈଠକରେ ୧୫ଟି ପଞ୍ଚାୟତ ସମସ୍ତ ଗ୍ରାମରୁ ମୁଖିଆମାନେ ସାମିଲ ହୋଇଥିଲେ । ଶରଣକୁଳକୁ ବ୍ଲକ ମାନ୍ୟତା ପାଇଁ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ନିଷ୍ପତ୍ତି ହୋଇଥିଲା । ସ୍ଥାନୀୟ ବିଧାୟକଙ୍କ ଦୃଷ୍ଟି ଆକର୍ଷଣ କରାଯିବା ସହ ବ୍ଲକ ପାଇଁ ଜୋରଦାର ଦାବି ଉପସ୍ଥାପନ କରିବାକୁ ନିଷ୍ପତ୍ତି ହୋଇଛି । ଶରଣକୁଳ ଅଞ୍ଚଳକୁ ବ୍ଲକ ଘୋଷଣା ପାଇଁ ସମସ୍ତ ପ୍ରକାର ଭିତ୍ତିଭୂମୀ ରହିଛି । ଶରଣକୁଳରେ ମହାବିଦ୍ୟାଳୟ, ଥାନା, ଏସଡିପିଓ ଅଫିସ୍, ଜଳସମ୍ପଦ ବିଭାଗ ସବଡିଭିଜନ ରହିଛି ।
ଏହା ସହିତ ବନାଞ୍ଚଳ କାର୍ଯ୍ୟାଳୟଠାରୁ ଆରମ୍ଭ କରି ୪ଟି ବ୍ୟାଙ୍କ ଓ ୪ଟି ଉଚ୍ଚ ବିଦ୍ୟାଳୟ ରହିଛି । ଜିଲ୍ଲାର ପ୍ରମୂଖ ପର୍ଯ୍ୟଟନ କ୍ଷେତ୍ର ତଥା ଐତିହାସିକ ଲଡ଼ୁବାବାଙ୍କ ପୀଠ ସ୍ଥଳୀ ହୋଇଥିବା ବେଳେ ନୟାଗଡ଼ ଗଞ୍ଜାମ ଜିଲ୍ଲାର ଏହା ମଧ୍ୟବର୍ତ୍ତୀ ଅଞ୍ଚଳ ଏବଂ ଗମନାଗମନ କ୍ଷେତ୍ରରେ ଶରଣକୁଳ ମୁଖ୍ୟ ସ୍ଥାନ ଅଟେ । ଯାହାକୁ ଭିତ୍ତିକରି ବ୍ଲକ ମାନ୍ୟତା ପାଇଁ ଶରଣକୁଳ ସମସ୍ତ ପ୍ରକାର ଯୋଗ୍ୟତା ରଖୁଛି ବୋଲି ବୈଠକରେ ଆଲୋଚନା ହୋଇଥିଲା । ଏହି ବୈଠକରେ ୧୫ଟି ପଞ୍ଚାୟତ ଜନପ୍ରତିନିଧିଙ୍କ ସହ ଶରଣକୁଳର ବହୁ ଜନସାଧାରଣ ସାମିଲ ହୋଇଥିଲେ ।
