ଦଶପଲ୍ଲାରେ ସୁନନ୍ଦା, ଗଣିଆରେ ଝୁନା, ନୂଆଗାଁରେ ଲକ୍ଷ୍ମୀପ୍ରିୟା, ଖଣ୍ଡପଡ଼ାରେ ଉପମା

ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ ଜିଲ୍ଲା ଦଶପଲ୍ଲା ବ୍ଲକରେ ପୁଣିଥରେ ବାଜି ମାରିଛନ୍ତି ପୂର୍ବତନ ବ୍ଲକ ଅଧ୍ୟକ୍ଷା ସୁନନ୍ଦା ସାହୁ । ଦଶପଲ୍ଲା ବ୍ଲକରେ ୨୦ ପଞ୍ଚାୟ ମଧ୍ୟରୁ ସୁନନ୍ଦାଙ୍କ ସପକ୍ଷରେ ତାଙ୍କ ଭୋଟକୁ ମିଶାଇ ୧୦ ଜଣ ସମିତିସଭ୍ୟଙ୍କ ସମର୍ଥନ ରହିଥିଲା । ତୁମାଣ୍ଡି ସମିତିସଭ୍ୟା ଅନୁପମା ମଳିକଙ୍କ ସପକ୍ଷରେ ରହିଥିବା ୧୦ ଜଣଙ୍କ ମଧ୍ୟରୁ ଜଣେ ମତଦାନରୁ ନିଜକୁ ଦୂରେଇ ରଖିଥିଲେ । ଫଳରେ ଅନୁପମା ନିଜ ଭୋଟ ସହ ୯ ଜଣଙ୍କ ସମର୍ଥନ ପାଇଥିଲେ । ନିର୍ବାଚନ ଅଧିକାରୀ ସୁନନ୍ଦାଙ୍କୁ ବ୍ଲକ ଅଧ୍ୟକ୍ଷା ଭାବେ ନିର୍ବାଚିତ ହୋଇଥିବା ଘୋଷଣା କରିଛନ୍ତି । ନୟାଗଡ଼ ଜିଲ୍ଲା ଗଣିଆ ବ୍ଲକର ୮ଟି ପଞ୍ଚାୟ ସମିତିସଭ୍ୟଙ୍କ ମଧ୍ୟରୁ ଆଡ଼କଟା ଗ୍ରାମ ପଞ୍ଚାୟତ ସମିତିସଭ୍ୟା ଝୁନା ଜେନା ଆଜି ବ୍ଲକ ଅଧ୍ୟକ୍ଷା ଭାବେ ନିର୍ବାଚିତ ହୋଇଛନ୍ତି । ଝୁନା ଏବଂ ରାସଙ୍ଗ ସମିତିସଭ୍ୟା କବିତା ସାହୁ ନିଜ ନିଜର ସମର୍ଥକଙ୍କ ସହ ନିର୍ବାଚନ ପ୍ରକୋଷ୍ଠକୁ ପ୍ରବେଶ କରି ପ୍ରାର୍ଥୀପତ୍ର ଦାଖଲ କରିଥିଲେ । ନିର୍ବାଚନ ବେଳେ ଝୁନାଙ୍କ ୫ ଜଣଙ୍କ ଭୋଟ ମିଳିଥିବା ବେଳେ କବିତାଙ୍କୁ ୩ ଟି ଭୋଟ ମିଳିଥିଲା । ନିର୍ବାଚନ ଅଧିକାରୀ ଝୁନାଙ୍କୁ ଅଧ୍ୟକ୍ଷା ଭାବେ ନିର୍ବାଚିତ ହୋଇଥିବା ଘୋଷଣା କରିଥିଲେ । ନୟାଗଡ଼ ଜିଲ୍ଲା ନୂଆଗାଁ ବ୍ଲକରେ ୨୨ ଟି ପଞ୍ଚାୟତ ମଧ୍ୟରୁ ୧୯ ଜଣଙ୍କ ସମର୍ଥନରେ ଅପ୍ରତିଦ୍ୱନ୍ଦୀ ଭାବେ ପାରାଢିପି ସମିତି ସଭ୍ୟା ଲକ୍ଷ୍ମୀପ୍ରିୟା ବେହେରା ନିର୍ବାଚିତ ହୋଇଥିବା ଜଣାଯାଇଛି । ଖଣ୍ଡପଡ଼ା ବ୍ଲକରେ ୨୨ ପଞ୍ଚାୟତ ମଧ୍ୟରୁ ୨୦ ସମିତିସଭ୍ୟାଙ୍କ ସମର୍ଥନରେ ବିଜେଡି ପ୍ରାର୍ଥୀ ଉପମା ବେହେରା ଆଜି ବ୍ଲକ ଅଧ୍ୟକ୍ଷା ଭାବେ ନିଦ୍ୱର୍ନ୍ଦରେ ନିର୍ବାଚିତ ହୋଇଛନ୍ତି ।