ଭୁବନେଶ୍ୱର, (ବାଘୁଆବାର୍ତ୍ତା): ସୋସିଆଲ୍ ମିଡିଆ କିମ୍ବା ବଜାରଘାଟରେ ପରସ୍ପରକୁ ଜାଣୁଛନ୍ତି । କିଛି ଦିନ କଥାବାର୍ତ୍ତା ପରେ ଆରମ୍ଭ ହେଉଛି ପ୍ରେମ ଆଉ ସମତିରେ ଶାରୀରିକ ସମ୍ପର୍କ । ଏହାପରେ ଆରମ୍ଭ ହୁଏ କିଛି ଧୂର୍ତ୍ତ ମହିଳାଙ୍କ ପଟୁ ବ୍ଲାକ୍ମେଲିଂ । ଯିଏ ବ୍ଲାକ୍ମେଲିଂର ଦାବି ପୂରଣ କଲା ସେ ବଞ୍ଚିଗଲା । ହେଲେ ଯିଏ କିଛି ଶୁଣିଲାନି ତା’ ନାଁରେ ଥାନାରେ ଉଠିଲା ଦୁଷ୍କର୍ମ ଅଭିଯୋଗ । ପୁଲିସ୍ ମାମଲା ରୁଜୁ କରି କିଛି ତଦନ୍ତ ନ କରି ସିଧା ଦୁଷ୍କର୍ମ ଅଭିଯୋଗରେ ତାଙ୍କୁ ଜେଲ୍ ପଠାଇ ଦେଲା । ଗତ ୮ ମାସ ଭିତରେ ଭୁବନେଶ୍ୱର ପୁଲିସ୍ ଜିଲ୍ଳାରେ ୨୦ରୁ ଅଧିକ ଏଭଳି ଘଟଣା ଘଟିଛି । କିଏ ଜେଲ୍ରେ ସଢ଼ୁଛି ତ’ ପୁଣି କିଏ ଭୟରେ ଫେରାର ହୋଇଯାଇଛି । ପୁଲିସ୍ ଠାରୁ ମିଳିଥିବା ସୂଚନା ମୁତାବକ, ଲକ୍ଷ୍ମୀସାଗର ଥାନା ଝାରପଡ଼ାର ଏକ ଆପାର୍ଟମେଣ୍ଟରେ ରହୁଥିବା ଜଣେ ମହିଳା ଅଭିଯୋଗ ଆଣିଥିଲେ ପଡୋଶୀ ତାଙ୍କୁ ଦୁଷ୍କର୍ମ କରିଛନ୍ତି । ଯାହାର ପ୍ରମାଣ ମହିଳାଙ୍କ ପାଖରେ ରହିଛି । ଏନେଇ ପୁଲିସ୍ ମାମଲା ରୁଜୁ କରି ଆରମ୍ଭ କରିଥିଲା ତନାଘନା । ତଦନ୍ତ ସମୟରେ ଜାଣିବାକୁ ପାଇଥିଲା, ଯୁବତୀ ଜଣଙ୍କ ଉକ୍ତ ଆପାର୍ଟମେଣ୍ଟର ଜଣେ ବିବାହିତ ଲୋକ (ବ୍ୟବସାୟୀ)ଙ୍କୁ ତାଙ୍କ ପ୍ରେମ ଜାଲରେ ଫସାଇଥିଲେ । ସହମତିରେ ଶାରୀରିକ ସମ୍ପର୍କ ରଖିଥିଲେ । ତେବେ ଉକ୍ତ ଅନ୍ତରଙ୍ଗ ସମୟର ଭିଡିଓ ରେକର୍ଡିଂ କରି ରଖିଥିଲେ ମହିଳା ଜଣଙ୍କ । ପରେ ସ୍ଥାନୀୟ କିଛି ବ୍ୟକ୍ତିଙ୍କ ସହ ମିଶି ସେ ବ୍ୟବସାୟୀଙ୍କୁ ୩୫ ଲକ୍ଷ ଟଙ୍କା ମାଗିଥିଲେ । ୧୦ ଲକ୍ଷ ଟଙ୍କା ଦେବାକୁ ରାଜି ହୋଇଥିଲେ ବ୍ୟବସାୟୀ । ପୂରା ଟଙ୍କା ନ ଦେଲେ ବରବାଦ କରିଦେବେ ବୋଲି ମହିଳା ଧମକ ଦେଇଥିଲେ । ଏ ସବୁ ପ୍ରମାଣ ମିଳିବା ପରେ ପୁଲିସ୍ ଅଭିଯୁକ୍ତ ବ୍ୟବସାୟୀଙ୍କୁ ଅନୁକମ୍ପା ଦେଖାଇଥିଲା । ହେଲେ ମହିଳା ଜଣଙ୍କ କମିଶନର ଓ ଡିଜିଙ୍କ ପାଖକୁ ଯିବେ ବୋଲି ଧମକ ଦେଇଥିଲେ । ସେହିଭଳି ଖଣ୍ଡଗିରି ଥାନା ଅଞ୍ଚଳରେ ମଧ୍ୟ ସମାନ ଘଟଣା ଘଟିଛି । ୬୮ ବର୍ଷର ଜଣେ ବରିଷ୍ଠ ନାଗରିକଙ୍କ ପରିବାର ଲୋକ ବାହାରେ ରହୁଛନ୍ତି । ସେ ଏଠାରେ ଏକା ରହୁଛନ୍ତି । ୨୫ ବର୍ଷର ଜଣେ ଯୁବତୀ ତାଙ୍କ ସହ ତାଙ୍କ ମଧୁସୂଦନ ପାର୍କରେ ଦେଖା ହୋଇଥିଲା । ପରେ ଉଭୟ ଫୋନ୍ ନମ୍ବର ଦିଆନିଆ ହୋଇଥିଲେ । ଯୁବତୀ ଜାଣିଲେ ବରିଷ୍ଠ ନାଗରିକ ଏକୁଟିଆ ରହୁଛନ୍ତି । ତେଣୁ ତାଙ୍କୁ ପ୍ରେମ ଜାଲରେ ଫସାଇବାକୁ ଉଦ୍ୟମ କରିଥିଲେ । ଶେଷରେ ଉଭୟଙ୍କ ମଧ୍ୟରେ ସହମତିରେ ଶାରୀରିକ ସମ୍ପର୍କ ରହିଲା । ସଂପୃକ୍ତ ବରିଷ୍ଠ ନାଗରିକ ଯୁବତୀଙ୍କ ସହ ସମ୍ପର୍କ ରଖିବା ପରେ ତାଙ୍କୁ ବିଭିନ୍ନ ଦାମୀ ଉପହାର ଦିଅନ୍ତି । ଏମିତି ଏକ ସ୍କୁଟି ମଧ୍ୟ ଦେଇଛନ୍ତି । ଦିନେ ଉକ୍ତ ଯୁବତୀ ସଂପୃକ୍ତ ବରିଷ୍ଠ ନାଗରିକଙ୍କୁ ୫ ଲକ୍ଷ ଟଙ୍କା ମାଗିଲେ । ହେଲେ ଏତେ ଟଙ୍କା ଦେବାକୁ ସଂପୃକ୍ତ ବରିଷ୍ଠ ନାଗରିକ ମନା କରି ଦେଇଥିଲେ । ଏହାପରେ ଯୁବତୀ ଜଣଙ୍କ ବିଭିନ୍ନ ଫଟୋ ଓ ଭିଡିଓ ନେଇ ଖଣ୍ଡଗିରି ଥାନାରେ ଏତଲା ଦେଇଥିଲେ । ପୁଲିସ୍ ସଂପୃକ୍ତ ବରିଷ୍ଠ ନାଗରିକଙ୍କ ବିରୋଧରେ ବଳାତ୍କାର ମାମଲା ରୁଜୁ କରିଛି । ସବୁ ଥାନାରେ ଏମିତି ଘଟଣା ଘଟିଛି । ପୁଲିସ୍ ମାମଲା ରୁଜୁ କରି ତଦନ୍ତ କରୁଛି । ଏନେଇ କମିଶନରେଟ୍ ପୁଲିସ୍ର ବରିଷ୍ଠ ଅଧିକାରୀ କହିଛନ୍ତି, କିଛି ଘଟଣାରେ ସହମତିରେ ଶାରୀରିର ସମ୍ପର୍କ ରଖି ସ୍ୱାର୍ଥ ହାସଲ ନହେଲେ ମହିଳା ଓ ଯୁବତୀ ବଳତ୍କାର ଅଭିଯୋଗ କରୁଛନ୍ତି । ପୁଲିସ୍ ତଦନ୍ତ ବେଳେ ଜାଣିବାକୁ ପାଏ ଏହା ବଳାତ୍କାର ନୁହେଁ । ଏହାପରେ ଯଦି ଅଭିଯୁକ୍ତଙ୍କୁ ପୁଲିସ୍ ଗିରଫ କରେନାହିଁ, ତେବେ ସମାଲୋଚନାର ଶିକାର ହୁଏ । ଏମିତି କି ପୁଲିସ୍ ଟଙ୍କା ନେଇ ମାମଲା ଚାପିବା କଥା ଉଠେ । ତେଣୁ ବଦନାମ ଭୟରେ ଆମ ପୁଲିସ୍ ସବୁ ଜାଣି ବି ଅଭିଯୋଗ ପାଇବା ମାତ୍ରେ ନିର୍ଦ୍ଦୋଷଙ୍କୁ ଗିରଫ କରି କୋର୍ଟ ଚାଲାଣ କରୁଛି । କେଉଁଟା ଦୁଷ୍କର୍ମ – କୌଣସି ନାରୀର ଅନିଚ୍ଛା ସତ୍ତେ୍ୱ ତା’ ସହିତ ଜୋର ଜବରଦସ୍ତ ଶାରୀରିକ ସମ୍ପର୍କ ରଖିଲେ ତାକୁ ଦୁଷ୍କର୍ମ କୁହାଯାଏ । ତା’ଛଡ଼ା ନାବାଳିକା, ମାନସିକ ଓ ଶାରୀରିକ ବିକଳାଙ୍ଗ ନାରୀ ସହ କୌଣସି ପୁରୁଷ ସହମତିରେ ଶାରୀରିକ ସମ୍ପର୍କ ରଖିଲେ ବି ତାହା ଦୁଷ୍କର୍ମରେ ଗଣତି ହେବ । ସେପଟେ ଶିକ୍ଷିତ ଓ ସାବାଳିକା ସହମତିରେ କାହା ସହ ସମ୍ପର୍କ ରଖିଲେ ତାହା ଦୁଷ୍କର୍ମ ନୁହେଁ ବୋଲି ଆଇନ୍ କହୁଛି । ୮ ମାସରେ ୧୦୫ ଦୁଷ୍କର୍ମ – ୨୦୨୧ ଜାନୁଆରୀରୁ ଅଗଷ୍ଟ ମଧ୍ୟରେ ଭୁବନେଶ୍ୱରର ବିଭିନ୍ନ ଥାନାରେ ୧୦୫ରୁ ଅଧିକ ଦୁଷ୍କର୍ମ ମାମଲା ରୁଜୁ ହୋଇଥିବା ଜଣାପଡ଼ିଛି । ୨୦୧୯ରେ ୨୨୮ ଟି ଓ ୨୦୨୦ରେ ୧୭୭ ଟି ବଳାତ୍କାର ମାମଲା ରୁଜୁ ହୋଇଥିଲା । ରାଜଧାନୀର ସର୍ବସାଧାରଣ ସ୍ଥାନ, ଯଥା ରାସ୍ତା ଘାଟ, ପାର୍କ, ସିନେମା ହଲ୍, ବସ୍ଷ୍ଟପ୍ରେ ମହିଳାମାନେ ସୁରକ୍ଷିତ ନୁହନ୍ତି । ଏ ସବୁ ସ୍ଥାନରେ ଅସାମାଜିକଙ୍କ ଶିକାର ହୋଇଛନ୍ତି ଯୁବତୀ ଓ ମହିଳମାନେ । ଏମାନଙ୍କୁ କିଏ ଅଶ୍ଳୀଳ ଇଙ୍ଗିତ କରିଛି ତ’ ପୁଣି କିଏ କମେଣ୍ଟ ମାରିଛି । ୨୦୧୯ରୁ ୨୦୨୧ ଅଗଷ୍ଟ ୩୦ ତାରିଖ ମଧ୍ୟରେ ଏଭଳି ୬୦ଟି ଘଟଣା ଘଟିଥିବା ବିଭିନ୍ନ ଥାନରେ ଅଭିଯୋଗ ହୋଇଛି । ୫ ବର୍ଷ ୧୫ଟି ମାମଲା – ସହମତିରେ ସେକ୍ସ କରି ଗତ ୫ ବର୍ଷ ମଧ୍ୟରେ ଅନେକ ବଳାତ୍କାର ଅଭିଯୋଗ ଆଣିଛନ୍ତି । ସେଥିମଧ୍ୟରୁ ୧୫ଟି ମାମଲରେ ପୁଲିସ୍ ବହୁ କଷ୍ଟ କରି ଫାଇନାଲ୍ ରିପୋର୍ଟ କରିଛି । ପୁଲିସ୍ ରିପୋର୍ଟକୁ କୌଣସି ଏତଲାକାରୀ ଚ୍ୟାଲେଞ୍ଜ କରିନାହାନ୍ତି । ନିୟମ କହୁଛି ପୁଲିସ୍ କୋର୍ଟରେ ଫାଇନାଲ୍ ରିପୋର୍ଟ ଦାଖଲ କଲା ପରେ ଏତଲକାରୀ ପାଖକୁ ଏକ ନୋଟିସ ଯାଏ । ସେଥିରେ ଉଲ୍ଲେଖ ଥାଏ ପୁଲିସ୍ ଦେଇଥିବା ରିପୋର୍ଟରେ ତୁମେ ସନ୍ତୁ୍ଷ୍ଟ ନା ନାହିଁ । ଯଦି ଏତଲାକାରୀ ମନା କରେ ତା’ହେଲେ ଉକ୍ତ ଘଟଣାର ପୁଣି ତଦନ୍ତ ହେବ । ତଦନ୍ତ ହେବା ପୂର୍ବରୁ କୋର୍ଟ ଉକ୍ତ ରିପୋର୍ଟକୁ ଭଲ ଭାବେ ଦେଖେ । ରିପୋର୍ଟ ସମ୍ପୂର୍ଣ୍ଣ ଠିକ୍ ଥାଏ ତା’ହେଲେ ତଦନ୍ତ କରିବାକୁ ଅନୁମତି ଦିଏ ନାହିଁ । ସହମତିରେ ଶାରୀରିକ ସମ୍ପର୍କ ରଖି ଅନେକ ଯୁବତୀ ଓ ମିହିଳା ଦୁ୍ଷ୍କର୍ମ ଅଭିଯୋଗ ଆଣୁଛନ୍ତି । ସୁପ୍ରିମ୍କୋର୍ଟ କହିଛନ୍ତି ଯାହା ଦୁଷ୍କର୍ମ ନୁହେଁ । ଏଥିରେ ପୁଲିସ୍ର ଅଧିକ ଭୂମିକା ରହିଛି । ହେଲେ ପୁଲିସ୍ ପରିଶ୍ରମ କରିବାକୁ ଚାହୁଁନି । ଅଭିଯୋଗ ଆସିଲେ ନିଜ ମୁଣ୍ଡରୁ ବୋଝ ହାଟାଇବାକୁ ଯାଇ ମାମଲା ରୁଜୁ କରି ଅଭିଯୁକ୍ତଙ୍କୁ କୋର୍ଟ ଚାଲାଣ କରି ଦେଉଛି । ୧୬୧/୧୬୪ରେ ବୟାନ ରେକର୍ଡ କରି କାମ ସାରି ଦେଉଛି । ଗତ କିଛି ଦିନ ତଳେ ପଶ୍ଚିମବଙ୍ଗରେ ଏକ ଘଟଣା ନଜରକୁ ଆସିଥିଲା । ଅଭିଯୁକ୍ତ ବିରୋଧରେ ଦଫା ୩୭୬ ପରବର୍ତ୍ତି ସମୟରେ ଦଫା ୪୯୩କୁ ବଦଳି ଥିଲା । ପୁଲିସ୍ ଯଦି ଏଥିପ୍ରତି ଧ୍ୟାନ ଦେବ ତା’ହେଲେ ହୁଏତ ବଳାତ୍କାର ଅଭିଯୋଗରେ ଜେଲ୍ ଯିବା ଲୋକଙ୍କ ସଂଖ୍ୟା କମିଯିବ ।
