ଦଶପଲ୍ଲା (ବାଘୁଆବାର୍ତ୍ତା ବ୍ୟୁରୋ): ୨୦୧୫ ମେ ୧ ତାରିଖରେ ରାଜ୍ୟ ସରକାର ନିରାମୟ ଯୋଜନାର ଶୁଭାରମ୍ଭ କରିଥିଲେ । ଓଡ଼ିଶା ରାଜ୍ୟ ମେଡିକାଲ ନିଗମ ମାଧ୍ୟମରେ ପ୍ରତି ଡାକ୍ତରଖାନାକୁ ଏହି ଯୋଜନାରେ ଔଷଧ ଯୋଗାଇ ଦିଆଯିବା ବ୍ୟବସ୍ଥା ରହିଛି । କର୍କଟ ଭଳି ମାରାତ୍ମକ ରୋଗର ଔଷଧ ମଧ୍ୟ ନିରାମୟ କେନ୍ଦ୍ରରେ ଉପଲବ୍ଧ ହେବ ବୋଲି କୁହାଯାଇଥିଲା । କିନ୍ତୁ ରାଜ୍ୟ ସରକାର ଗ୍ରାମାଞ୍ଚଳରେ ଥିବା ଡାକ୍ତରଖାନାମାନଙ୍କରେ କେବଳ ଆଉଟ୍ଡୋର୍ ସମୟରେ ରୋଗୀଙ୍କୁ ମାଗଣାରେ ଔଷଧ ପାଇପାରିବେ ବୋଲି ନୂତନ ନିର୍ଦ୍ଦେଶନାମା ଜାରି କରିଛନ୍ତି । 
ଅନ୍ୟପକ୍ଷରେ ଏହି ନିର୍ଦ୍ଦେଶନାମାରେ ମେଡିକାଲ କଲେଜ, କ୍ୟାପିଟାଲ ହସ୍ପିଟାଲ, ଜିଲ୍ଲା ହସ୍ପିଟାଲ, ସବ୍-ଡିଭିଜନ୍ ହସ୍ପିଟାଲ ପୂର୍ବଭଳି ୨୪ ଘଣ୍ଟିଆ ମାଗଣା ଔଷଧ ଯୋଗାଇଦେବା ବ୍ୟବସ୍ଥା ଅବ୍ୟାହତ ରହିବ । ତେଣୁ ରାଜ୍ୟ ସରକାରଙ୍କ ନୂତନ ନିର୍ଦ୍ଦେଶନାମା ଯୋଗୁଁ ଦଶପଲ୍ଲା ବିଧାନସଭା ନିର୍ବାଚନ ମଣ୍ଡଳୀର ମଧ୍ୟଖଣ୍ଡ, ଦଶପଲ୍ଲା, ଗଣିଆ ଓ ମହିପୁର ସିଏଚ୍ସି ସମେତ ନୟାଗଡ଼ ଜିଲ୍ଲାର ୧୨ଗୋଟି ସିଏଚ୍ସି ଉପରେ ନିର୍ଭର କରୁଥିବା ୧୦ ଲକ୍ଷରୁ ଊଦ୍ଧ୍ୱର୍ ଲୋକ ହନ୍ତସନ୍ତ ହେଉଛନ୍ତି । ଗ୍ରାମାଞ୍ଚଳ ଲୋକଙ୍କ ପ୍ରତି ଏଭଳି ପ୍ରତାରଣା ପ୍ରତିବାଦରେ ଶୁକ୍ରବାର ଦିନ ମଧ୍ୟଖଣ୍ଡ ସିଏଚ୍ସି ସମ୍ମୁଖରେ ବିଜେପି ନେତା ରାଘବ ମଲ୍ଲିକ ଓ ରାଷ୍ଟ୍ରିୟ କୃଷକ ମୋର୍ଚ୍ଚାର କାର୍ଯ୍ୟକାରୀ ସଦସ୍ୟ ସୁକାନ୍ତ ପାଣିଗ୍ରାହୀଙ୍କ ନେତୃତ୍ୱରେ ଏକ ପ୍ରଦିବାଦ ସଭା ଏବଂ ଗଣଧାରଣା ଅନୁଷ୍ଠିତ ହୋଇଯାଇଛି ।
ରାଜ୍ୟ ସରକାର ତୁରନ୍ତ ଏହି ତୃଟିପୂର୍ଣ୍ଣ ଘୋଷଣାକୁ ପ୍ରତ୍ୟାହାର ନକଲେ ବିଜେପି ପକ୍ଷରୁ ଆନ୍ଦୋଳନକୁ ଆହୁରି ଜୋରଦାର କରାଯିବ ବୋଲି ଶ୍ରୀ ମଲ୍ଲିକ ଆଜିର ଏହି ପ୍ରତିବାଦ ସଭାରେ ବିଜେପି ପ୍ରଶାସନକୁ ଚେତାବନୀ ଦେଇଛି । ଅନ୍ୟମାନଙ୍କ ମଧ୍ୟରେ ପ୍ରଭାତ କୁମାର କର, ପ୍ରଫୁଲ୍ଲ କୁମାର ପରିଡା, ଦିଲ୍ଲୀପ କୁମାର ହୋତା, ଅନ୍ତର୍ଯ୍ୟାମୀ ପ୍ରଧାନ, ସୁଦାମ ପରିଡା, ମୃତ୍ୟୁଞ୍ଜୟ ପ୍ରଧାନ, ରାମଚନ୍ଦ୍ର ଜେନା ପ୍ରମୁଖ ଉପସ୍ଥିତ ଥିଲେ । ମଧ୍ୟଖଣ୍ଡ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଏନ୍ଆର୍ଏଚ୍ଏମ୍ ଯୋଜନାରେ ଆସିଥିବା ଅର୍ଥରୁ ୨୭ଲକ୍ଷ ଟଙ୍କା ଆତ୍ମସାତ୍ ହୋଇଛି । ଦୋଷୀଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ନିମନ୍ତେ ବିକ୍ଷୋଭ ସମୟରେ ନେତୃମଣ୍ଡଳୀ ଦାବି କରିଛନ୍ତି ।
